អភិវឌ្ឍទេសចរណ៍នៅរមណីយដ្ឋានទឹកធ្លាក់ Dau Dang
កប.អនឡាញ - នាពេលថ្មីៗនេះ ដោយមានឱកាសមកដល់បឹង Ba Be យើងខ្ញុំត្រូវបានលោក Trieu Van Thuan ជនជាតិ Tay នៅភូមិ Pa Ngoi ឃុំ Nam Mau ស្រុក Ba Be (ខេត្ត Bac Kan) នាំទៅទស្សនាបឹង Ba Be។ ដោយជិះទូកផងនិងណែនាំជាមួយយើងខ្ញុំអំពីបឹង Ba Be ផង លោក Trieu Van Thuan ឲ្យដឹងថា “នៅចុងបញ្ចប់នៃដំណើរស្វែងយល់បឹង Ba Be អ្នកទេសចរនឹងបានទស្សនាទឹកធ្លាក់ដ៏អស្ចារ្យជាមួយនឹងពពុះដ៏ស្រស់ស្អាត”។
បន្ទាប់ពីជិះទូកជាងកន្លះម៉ោង យើងខ្ញុំបានឈានជើងលើច្រាំង និងដើរចូលទៅក្នុងព្រៃភ្នំដែលមានដើមឈើធំៗចោលម្លប់ត្រជាក់ជាច្រើនប្រភេទ។ យោងតាមផ្លាកសញ្ញា យើងខ្ញុំមកដល់ទឹកធ្លាក់ Dau Dang។ ប្រភពទឹកធ្លាក់នេះ បានមកពីទន្លេ Nang ដែលមានចម្ងាយប្រហែល ១៦ គីឡូម៉ែត្រ ពីទីរួមស្រុក Cho Ra ស្រុក Ba Be។ ដោយស្គាល់ភូមិសាស្ដ្រនៅទីនេះ លោក Trieu Van Tuan បានណែនាំទៀតថា “ទឹកធ្លាក់នោះមិនត្រឹមតែមានទេសភាពស្រស់ស្អាតប៉ុណ្ណោះទេ ថែមទាំងមានតម្លៃផ្គត់ផ្គង់ប្រភពទឹកទៀតផង។ ដោយមានប្រភពជលផលដ៏សំបូរពីទន្លេ Nang ដូច្នេះបងប្អូនប្រជាពលរដ្ឋមិនត្រឹមតែប្រើប្រាស់ប្រចាំថ្ងៃបុ៉ណ្ណោះទេ ថែមទាំងបំរើឱ្យភ្ញៀវទេសចរទៀតផង។
|
|
ទេសភាពធម្មជាតិនៅរមណីយដ្ឋានទឹកធ្លាក់ Dau Dang |
បន្ទាប់ពីបានស្វែងយល់ពីទឹកធ្លាក់ Dau Dang យើងខ្ញុំបានឈប់សម្រាកនៅគែមព្រៃ និងពិសារមុខម្ហូបប្រចាំតំបន់របស់អ្នកស្រុក។ អាំងត្រីនិងបង្គារនៅក្នុងតូបតូចមួយ លោកស្រី Nong Thi Ban នៅភូមិ Bo Lu ឃុំ Nam Mau បានឲ្យដឹងថា “ជលផលទាំងអស់សុទ្ធតែជាផលិតផលដែលប្រជាជនយើងខ្ញុំធ្វើនេសាទបាន។
យើងខ្ញុំមានក្ដីសប្បាយចិត្តយ៉ាងខ្លាំងដែលភ្ញៀវទេសចរជាច្រើនមកទស្សនាទឹកធ្លាក់ Dau Dang ដោយហេតុនេះ ជួយប្រជាជនរកប្រាក់ចំណូលបន្ថែម”។ អ្នកទេសចរដែលមកទស្សនាទឹកធ្លាក់ចូលចិត្ដយ៉ាងខ្លាំងណាស់ពីព្រោះក្រៅពីទស្សនាទេសភាពដ៏ស្រស់ស្អាត ពួកគេក៏អាចពិសារម្ហូបប្រចាំតំបន់ និងស្វែងយល់ពីការរស់នៅរបស់ជនជាតិភាគតិចនៅទីនេះទៀតផង។
លោក Ngon Van Son ប្រធានគណៈកម្មាធិការប្រជាជនឃុំ Nam Mau បាននិយាយថា៖ “ជាមួយនឹងធម្មជាតិស្រស់ស្អាតនៅទឹកធ្លាក់ Dau Dang យើងខ្ញុំបានលើកទឹកចិត្តបងប្អូនជនរួមជាតិចូលរួមធ្វើទេសចរណ៍សហគមន៍។ បច្ចុប្បន្ននេះនៅក្នុងឃុំ បងប្អូនជនរួមជាតិបានសាងសង់ homestay រាប់សិបខ្នង តាមរយៈនោះ ទាក់ទាញភ្ញៀវទេសចរកាន់តែច្រើន រួមចំណែកលើកស្ទួយវិស័យទេសចរណ៍ សេវាកម្ម និងលើកកម្ពស់ជីវភាពរបស់ប្រជាជននៅទីនោះ”៕
បកប្រែដោយ Pham Diep