ក្រសួងអប់រំនិងបណ្តុះបណ្តាលវៀតណាមបានសហការជាមួយអង្គការ UNICEF ក្នុងការឆ្លើយតបទៅនឹងជំងឺ Covid-19
កប.អនឡាញ - រដ្ឋមន្រ្តីក្រសួងអប់រំនិងបណ្តុះបណ្តាលវៀតណាម លោក Phung Xuan Nha បានចូលរួមប្រជុំតាមប្រព័ន្ធវីឌីអូ ជាមួយលោកស្រី Rana Flowers ប្រធានតំណាងមូលនិធិកុមារ (UNICEF) ប្រចាំនៅវៀតណាមដើម្បីពិភាក្សាលើខ្លឹមសារមួយចំនួននៃកិច្ចសហប្រតិបត្តិការនិងការជួយគាំទ្ររបស់អង្គការ UNICEF ដល់វិស័យអប់រំវៀតណាមក្នុងការប្រយុទ្ធប្រឆាំងនឹងជំងឺ Covid-19 ក៏ដូចជាការកាត់បន្ថយផលប៉ះពាល់នៃការប្រែប្រួលអាកាសធាតុលើកុមារនិងលើកកម្ពស់ការអប់រំឌីជីថលដែរ។
|
|
រដ្ឋមន្រ្តីក្រសួងអប់រំនិងបណ្តុះបណ្តាលវៀតណាម លោក Phung Xuan Nha(រូបថត៖ baochinhphu.vn) |
ក្នុងឱកាសនេះ លោក Phung Xuan Nha រដ្ឋមន្រ្តីក្រសួងអប់រំនិងបណ្តុះបណ្តាលវៀតណាម បានស្នើសុំអង្គការ UNICEF ជួយគាំទ្រដល់ក្រសួងអប់រំនិងបណ្ដុះបណ្ដាលវៀតណាមក្នុងការបំពេញបន្ថែមប្រព័ន្ធបង្រៀនដើម្បីបង្រៀនតាមប្រព័ន្ធទូរទសន៍យ៍។ លោកស្រី Rana Flowers បានយល់ព្រមជាមួយការលើកឡើងរបស់ក្រសួងអប់រំនិងបណ្តុះបណ្តាលវៀតណាម។ លោកស្រីបានឲ្យដឹងថា អង្គការ UNICEF បានកៀរគរថវិកាប្រមាណ ៨០០,០០០ ដុល្លារអាមេរិកដើម្បីជួយគាំទ្រដល់វិស័យអប់រំរបស់វៀតណាមដើម្បីឆ្លើយតបនឹងជំងឺ Covid-19 ។
បច្ចុប្បន្ន អង្គការ UNICEF កំពុងផ្លាស់ប្តូរយោបល់ជាមួយដៃគូនានា ក្រុមហ៊ុនបច្ចេកវិទ្យា សំដៅបង្កើតកម្មវិធីបង្រៀនដោយឥតគិតថ្លៃសម្រាប់សិស្សវៀតណាមនិងលើកកម្ពស់ការអភិវឌ្ឍបច្ចេកទេសឌីជីថលដើម្បីជួយទ្រទ្រង់ដល់ការសិក្សារៀនសូត្រតាមប្រព័ន្ធវីឌីអូ៕
បកប្រែដោយ Pham Diep