អ្នកនយោបាយអន្តរជាតិ អបអរសាទរលោកស្រី Liz Truss ដែលត្រូវបានជ្រើសរើសជានាយករដ្ឋមន្ត្រីចក្រភពអង់គ្លេស
បន្ទាប់ពីគណបក្សអភិរក្សដែលកំពុងកាន់អំណាចនៅចក្រភពអង់គ្លេសនៅថ្ងៃទី ៥ ខែកញ្ញា បានប្រកាសលទ្ធផលនៃការបោះឆ្នោតចុងក្រោយ ដែលបញ្ជាក់ថាលោកស្រី Liz Truss រដ្ឋមន្ត្រីការបរទេស បានវ៉ាដាច់លោក Rishi Sunak អតីតរដ្ឋមន្ត្រីហិរញ្ញវត្ថុ ដើម្បីក្លាយជាអ្នកស្នងតំណែងពីលោក Boris Johnson នាយករដ្ឋមន្ត្រី ហើយអ្នកនយោបាយអង់គ្លេស និងប្រទេសជាច្រើនបានបញ្ជូនសារអបអរសាទរចូនចំពោះលោកស្រី Liz Truss។
ចែករំលែកនៅលើបណ្តាញសង្គម Twitter លោក Boris Johnson នាយករដ្ឋមន្ត្រីអង់គ្លេស និងលោក Rishi Sunak អតីតរដ្ឋមន្ត្រីក្រសួងហិរញ្ញវត្ថុ បានអំពាវនាវឱ្យគណៈបក្សអភិរក្ស រួបរួមគ្នាដើម្បីគាំទ្រការដឹកនាំរបស់លោកស្រី Liz Truss នាំចក្រភពអង់គ្លេសរួចផុតពីវិបត្តិនាបច្ចុប្បន្ន។
|
|
លោកស្រី Liz Truss ថ្លែងមតិក្នុងទីក្រុងឡុងដ៍ នាថ្ងៃទី៥ ខែកញ្ញា ឆ្នាំ២០២២ (រូបថត៖ vnanet.vn) |
លោកស្រី Ursula von der Leyen ប្រធានគណៈកម្មការអឺរ៉ុប (EC) បានអបអរសាទរចំពោះលោកស្រី Truss ហើយបានអំពាវនាវឱ្យទីក្រុងឡុងដ៍ និងទីក្រុងប្រ៊ុចសែល សហប្រតិបត្តិការគ្នាដើម្បីអនុវត្តឱ្យបានពេញលេញនូវកិច្ចព្រមព្រៀងទ្វេភាគី។ ចែករំលែកនៅលើ Twitter លោកស្រី von de Leyen បានចាត់ទុកថា EU និងអង់គ្លេសគឺជាដៃគូដែលប្រឈមមុខនឹងបញ្ហារួមគ្នា តាំងពីការប្រែប្រួលអាកាសធាតុរហូតដល់វិបត្តិនៅអ៊ុយក្រែន។ ប្រធាន EC សង្ឃឹមថា ភាគីទាំងពីរនឹងមានទំនាក់ទំនងស្ថាបនា។
ក្នុងពេលជាមួយគ្នានោះ លោក Olaf Scholz អធិការបតីអាល្លឺម៉ង់ បានអបអរសាទរលោកស្រី Truss ចំពោះមុខតំណែងថ្មី ហើយបានសម្តែងក្តីសង្ឃឹមថា ភាគីទាំងពីរនឹងសហការគ្នាយ៉ាងជិតស្និទ្ធក្នុងគ្រាលំបាកទាំងនេះ ក្នុងនាមជាដៃគូ និងមិត្តភក្តិ។ ស្រដៀងគ្នានេះដែរ លោក Michael Martin នាយករដ្ឋមន្ត្រីអៀរឡង់ និង លោក Mateusz Morawiecki នាយករដ្ឋមន្ត្រីប៉ូឡូញ បានអបអរសាទរលោកស្រី Truss និងបង្ហាញក្តីសង្ឃឹមសម្រាប់ការបន្តកិច្ចសហប្រតិបត្តិការលើបញ្ហាទ្វេភាគី និងលើពិភពលោកផងដែរ។
ពីប្រទេសឥណ្ឌា លោក Narendra Modi នាយករដ្ឋមន្ត្រី បានអបអរសាទររដ្ឋមន្ត្រីការបរទេសអង់គ្លេស ហើយជឿជាក់ថា ក្រោមការដឹកនាំរបស់លោកស្រី ទំនាក់ទំនងភាពជាដៃគូយុទ្ធសាស្ត្រលើគ្រប់ជ្រុងជ្រោយរវាងឥណ្ឌា-អង់គ្លេស នឹងត្រូវបានពង្រឹងបន្ថែមទៀត៕
តាម vovworld.vn