ជម្រុញកិច្ចសហការក្នុងការអនុវត្តទំនាក់ទំនងភាពជាដៃគូអភិវឌ្ឍអ៊ីតាលី-អាស៊ាន
កប.អនឡាញ - តាមការអញ្ជើញរបស់ក្រសួងមហាផ្ទៃ និងក្រសួងការបរទេសអ៊ីតាលី នាថ្ងៃទី២៥ ខែកញ្ញា គណៈកម្មាធិការនៃបណ្ដាប្រទេសអាស៊ានប្រចាំទីក្រុងរ៉ូម (ACR) បានទៅបំពេញទស្សនកិច្ចនៅវិទ្យាស្ថានបណ្តុះបណ្តាលកម្លាំងអនុវត្តច្បាប់អន្តរក្រសួងអ៊ីតាលី ដើម្បីផ្លាស់ប្តូរយោបល់ និងត្រៀមរៀបចំកិច្ចប្រជុំជាន់ខ្ពស់ប៉ូលីសអ៊ីតាលី - អាស៊ាន ដែលនឹងប្រព្រឹត្តទៅពីថ្ងៃទី៩ ដល់ថ្ងៃទី១៣ ខែវិច្ឆិកា នៅទីក្រុងរ៉ូម។ កិច្ចប្រជុំនេះគឺជាសកម្មភាពសំខាន់ដំបូងបង្អស់របស់ប្រទេសអ៊ីតាលី ក្នុងផែនការអនុវត្តទំនាក់ទំនងភាពជាដៃគូអភិវឌ្ឍជាមួយអាស៊ាន។
ក្នុងឱកាសនេះ មេបញ្ជាការរងនៃប៉ូលីសអ៊ីតាលីលោកស្រី Alessandra Guidi បានចែករំលែកអំពីសក្តានុពលនៃកិច្ចសហប្រតិបត្តិការរវាងកម្លាំងប៉ូលីសទាំងពីរ ក្នុងបរិបទពិភពលោកដែលកំពុងប្រឈមនឹងបញ្ហាសន្តិសុខថ្មីៗជាច្រើន ជាពិសេស ក្រោមឥទ្ធិពលនៃការរីករាលដាលនៃជំងឺ Covid-19។
|
|
លោកស្រីឯកអគ្គរដ្ឋទូតវៀតណាម Nguyen Thi Bich Hue ថ្លែងនៅវិទ្យាស្ថានបណ្តុះបណ្តាលកម្លាំងអនុវត្តច្បាប់អន្តរក្រសួងអ៊ីតាលី (រូបថត៖ vnanet.vn) |
អគ្គលេខាធិការក្រសួងការបរទេស និងកិច្ចសហប្រតិបត្តិការអន្តរជាតិអ៊ីតាលី លោកស្រី Elisabetta Belloni បានវាយតម្លៃខ្ពស់ចំពោះតួនាទីកាន់តែសំខាន់របស់អាស៊ានចំពោះសន្តិសុខក្នុងតំបន់និងលើពិភពលោក។ លោកស្រីសង្កត់ធ្ងន់ថា ការដែលភាគីទាំងពីរបង្កើតទំនាក់ទំនងភាពជាដៃគូអភិវឌ្ឍនឹងចូលរួមចំណែកក្នុងការជម្រុញទំនក់ទំនងសហប្រតិបត្តិការលើវិស័យជាច្រើនរវាងអ៊ីតាលី និងអាស៊ានឡើងកំរិតថ្មី។
ក្នុងឋានៈជាប្រធានគណៈកម្មាធិការ ACR លោកស្រីឯកអគ្គរដ្ឋទូតវៀតណាម Nguyen Thi Bich Hue បានតាងនាមឯកអគ្គរដ្ឋទូតអាស៊ានប្រចាំទីក្រុងរ៉ូមទាំងឡាយបញ្ជាក់ថា គណៈកម្មាធិការ ACR នឹងសហការយ៉ាងជិតស្និទ្ធជាមួយស្ថាប័នមានសមត្ថកិច្ចរបស់អ៊ីតាលី ដើម្បីរៀបចំដោយជោគជ័យកិច្ចប្រជុំជាន់ខ្ពស់ប៉ូលីសអ៊ីតាលី - អាស៊ាន ចូលរួមចំណែកបើកទំព័រថ្មីសម្រាប់កិច្ចសហប្រតិបត្តិការរវាងតំបន់ទាំងពីរ៕
បកប្រែដោយ Thuy Anh