កិច្ចប្រជុំលើកទី៣៧ នៃក្រុមការងារជាន់ខ្ពស់ស្តីពីការធ្វើសមាហរណកម្មសេដ្ឋកិច្ចអាស៊ាន (HLTF-EI ៣៧)
កប.អនឡាញ - ក្នុងសកម្មភាពឆ្នាំ២០២០ ដែលវៀតណាមជាប្រធានអាស៊ាន កិច្ចប្រជុំលើកទី៣៧ នៃក្រុមការងារជាន់ខ្ពស់ ស្តីអំពីការធ្វើសមាហរណកម្មសេដ្ឋកិច្ចអាស៊ាន (HLTF-EI ៣៧) បានប្រព្រឹត្តទៅនាថ្ងៃ១២ និង១៣ ខែកុម្ភៈ នៅទីក្រុងហាណូយ។ កិច្ចប្រជុំនេះបានពិភាក្សា និងដាក់ចេញនូវអនុសាសន៍សំខាន់ៗ និងយុទ្ធសាស្ត្រមួយចំនួនស្ដីពីចក្ខុវិស័យនិងកិច្ចសហប្រតិបត្តិការក្នុងការធ្វើសមាហរណកម្មសេដ្ឋកិច្ចក្នុងប្លុក និងក្រៅប្លុកអាស៊ាន។
ក្នុងឋានៈជាប្រទេសសម្របសម្រួលកិច្ចសហប្រតិបត្តិការលើវិស័យសេដ្ឋកិច្ចអាស៊ាន លោក Tran Quoc Khanh អនុរដ្ឋមន្ត្រីក្រសួងឧស្សាហ-ពាណិជ្ជកម្ម និងជាប្រធានគណៈប្រតិភូបានដឹកនាំគណៈប្រតិភូវៀតណាមអញ្ជើញចូលរួមកិច្ចប្រជុំនេះ។
|
|
ទិដ្ឋភាពនៃកិច្ចប្រជុំ (រូបថត៖ moit.gov.vn) |
ក្នុងកិច្ចប្រជុំ យោបល់របស់វៀតណាមត្រូវបានវាយតម្លៃខ្ពស់ និងចាត់ទុកជាមូលដ្ឋានសម្រាប់ការជម្រុញកិច្ចសហប្រតិបត្តិការលើវិស័យសេដ្ឋកិច្ចរវាងបណ្ដាប្រទេសអាស៊ាន។ ទន្ទឹមនឹងនោះ បណ្ដាប្រទេសអាស៊ានក៏បានពិនិត្យសំណើរបស់វៀតណាមស្ដីពីវិធីសាស្រ្តថ្មីសម្រាប់ការចរចា FTA របស់អាស៊ាន។ កិច្ចប្រជុំបានបញ្ជាក់សារជាថ្មីម្ដងទៀតលើការសន្យារបស់អាស៊ានស្ដីពីការជម្រុញពាណិជ្ជកម្ម និងវិនិយោគក្នុងតំបន់តាមរយៈការជម្រុញការចរចាកិច្ចព្រមព្រៀងពាណិជ្ជកម្មសេរីរបស់អាស៊ាន ជាពិសេសគឺជម្រុញការចរចាកិច្ចព្រមព្រៀង RCEP។
បណ្ដាអនុសាសន៍ស្តីពីយុទ្ធសាស្ត្រសហប្រតិបត្តិការនាពេលខាងមុខរបស់អាស៊ាននៅកិច្ចប្រជុំនេះនឹងដាក់ជូនកិច្ចប្រជុំរដ្ឋមន្ត្រីសេដ្ឋកិច្ចអាស៊ានចង្អៀតលើកទី២៦ នាខែមីនា ឆ្នាំ២០២០ នៅទីក្រុង Da Nang បន្ទាប់មក នឹងរាយការណ៍ជូនថ្នាក់ដឹកនាំអាស៊ាននាខែមេសា ឆ្នាំ២០២០៕
បកប្រែដោយ Thuy Anh