អង្គការសុខភាពពិភពលោក៖ កម្ពុជាពិនិត្យពិចារណាបើកឡើងវិញលើគ្រប់វិស័យ
កប.អនឡាញ - អង្គការសុខភាពពិភពលោកប្រចាំកម្ពុជានៅថ្ងៃទី ១១ ខែតុលា បានស្នើឱ្យក្រសួងសុខាភិបាលនៃប្រទេសនេះពិចារណាបើកឡើងវិញលើវិស័យទាំងអស់ ជាពិសេសការធ្វើអាជីវកម្ម បន្ទាប់ពីអង្គការសុខភាពពិភពលោកឃើញថា កម្ពុជាឆ្លើយតបទៅនឹងជំងឺកូវីដ ១៩ ប្រកបដោយប្រសិទ្ធភាព និងនិរន្តរភាព។
កាសែត Khmer Times បានស្រង់សម្តីតំណាងអង្គការសុខភាពពិភពលោកប្រចាំនៅកម្ពុជា លោកស្រី Li Ailan ដែលនិយាយថា ប្រសិនបើឆ្លើយតបនឹងការរីករាលដាលនៃជំងឺកូវីដ ១៩ បានល្អ កម្ពុជាអាចបើកឡើងវិញដោយសុវត្ថិភាព។
|
|
កម្ពុជាទទួលវ៉ាក់សាំងកូវីដ ១៩ នៅព្រលានយន្តហោះភ្នំពេញកាលពីថ្ងៃទី ២០ ខែសីហា ឆ្នាំ២០២១ (រូបថត៖ vnanet.vn) |
លោកស្រីបាននិយាយថា វិស័យនីមួយៗអាចបើកឡើងវិញដោយសុវត្ថិភាព និងការទទួលខុសត្រូវ ដោយមានតុល្យភាពគោលនយោបាយផ្អែកលើហានិភ័យលើវិធានការសុខភាពសាធារណៈ និងសង្គមដែលរួមបញ្ចូលនូវការណែនាំពីវិស័យសុខាភិបាល។
ប៉ុន្ដែលោកស្រី Li Ailan ក៏បានសម្តែងការព្រួយបារម្ភផងដែរថា ការបើកដំណើរការសេដ្ឋកិច្ចឡើងវិញដែលគ្មានការរៀបចំផែនការនិងការគ្រប់គ្រងហានិភ័យឲ្យបានល្អអាចនាំមកករណីឆ្លងជំងឺកូវីដ ១៩ នឹងកើនឡើង មន្ទីរពេទ្យនឹងលើសពីចំណុះ ហើយប្រតិបត្តិការសេដ្ឋកិច្ចអាចនឹងត្រូវបិទម្តងទៀត។
នៅថ្ងៃដដែល អ្នកនាំពាក្យក្រសួងសុខាភិបាលកម្ពុជា លោកស្រី ឱ វណ្ណឌីន បានសម្តែងក្តីសង្ឃឹមថា កម្ពុជានឹងរួចផុតពីជំងឺរាតត្បាតនេះ ហើយវិលត្រឡប់ទៅរកជីវិតធម្មតាថ្មី ប្រសិនបើប្រជាជនបន្តអនុវត្តវិធានការបង្ការការរីករាលដាលជំងឺកូវីដ ១៩ ឱ្យបានត្រឹមត្រូវនិងទៀងទាត់៕
បកប្រែដោយ Pham Diep