នាំតំបន់លំនៅដ្ឋាននៅតំបន់ឆ្ងាយដាច់ស្រយាលឱ្យមកជិតទីកណ្តាលភូមិ ឃុំ វិញ
កប.អនឡាញ - យោងតាមការស្ថិតិរបស់គណៈកម្មាធិការជនជាតិនៃខេត្ត Son La បានឲ្យដឹងថា បច្ចុប្បន្ននេះ ខេត្តមានតំបន់លំនៅដ្ឋានចំនួន ៣២២ តំបន់ ដែលនៅឆ្ងាយពីទីកណ្តាលភូមិ ឃុំ។ ទាំងនេះគឺជាតំបន់ជួបការលំបាកបំផុត ដោយមិនសូវទទួលបានគោលនយោបាយទេ ដូច្នេះវាទាមទារឱ្យអាជ្ញាធរមូលដ្ឋានត្រូវមានផែនការជាក់លាក់ដើម្បីផ្តល់អាទិភាព និងជួយគាំទ្រ។
យើង និងកម្មាភិបាលនៃផ្នែកជនជាតិស្រុក Bac Yen ខេត្ត Son La បានទៅភូមិ Nam Long ឃុំ Hang Chu ដែលជាភូមិមួយក្នុងចំណោមភូមិលំបាកបំផុតនៅក្នុងស្រុក Bac Yen។ យើងត្រូវចំណាយពេលពីរម៉ោងដើម្បីទៅដល់ Nam Long ប៉ុន្តែការធ្វើដំណើរមិនបានបញ្ចប់នៅទីនេះទេ។ ដោយក្រឡេកមើលទៅលើភ្នំដ៏ឆ្ងាយដែលគ្របដណ្តប់ដោយពពកពេញមួយឆ្នាំ កម្មាភិបាលម្នាក់មកពីការិយាល័យជនជាតិស្រុក Bac Yen បានប្រាប់យើងថា “កន្លែងនៅលើកំពូលភ្នំមួយទៀតគឺជាតំបន់លំនៅដ្ឋាន Hua Nga មាន ១៩ គ្រួសារ ដោយមានមនុស្ស ៩៨ នាក់ ជាជនជាតិ Mong រស់នៅ។ ដោយសារតំបន់លំនៅដ្ឋាននៅឆ្ងាយពេកពីទីកណ្តាលភូមិ ឃុំនោះ បានជាគោលការណ៍ គោលនយោបាយរបស់បក្ស និងរដ្ឋស្ទើរតែទាំងអស់មិនអាចទៅដល់បានទេ។
|
|
រក្សាអត្តសញ្ញាណវប្បធម៌នៅខេត្ត Son La (រូបថត៖ vnanet.vn) |
យោងតាម លោក Dinh Trung Dung ប្រធានគណៈកម្មាធិការជនជាតិខេត្ត Son La បានឲ្យដឹងថា បច្ចុប្បន្ននេះ ខេត្តមានតំបន់លំនៅដ្ឋានចំនួន ៣២២ តំបន់ ដែលនៅឆ្ងាយពីទីកណ្តាលភូមិ ឃុំ ដែលត្រូវការការយកចិត្តទុកដាក់ និងការថែទាំ ដែលក្នុងនោះ ៨ តំបន់នៅឆ្ងាយពីទីកណ្តាលភូមិជាង ១០ គីឡូម៉ែត្រ; ៣៤ តំបន់ជាង ៥ គីឡូម៉ែត្រ; ១៥២ តំបន់ជាង ២ គីឡូម៉ែត្រ; និង ១២៨ តំបន់តិចជាង ២ គីឡូម៉ែត្រ។ ទាក់ទងនឹងសមាសភាពជនជាតិភាគតិច ក្រុមជនជាតិដែលរស់នៅឆ្ងាយជាងគេពីទីកណ្តាលភូមិគឺជនជាតិ Thai ដែលមាន ១៦១ តំបន់ ជនជាតិ Mong មានចំនួន ១០២ តំបន់។ នេះគឺជាតំបន់មានភាពអន់ថយអំពីសេដ្ឋកិច្ចសង្គមនៃខេត្ត Son La។ តំបន់លំនៅដ្ឋានទាំងនេះមានអាកាសធាតុចម្រុះ និងស្មុគស្មាញ។ ប្រជាជនតែងតែជួបប្រទះគ្រោះរាំងស្ងួត សន្សើមប្រៃក្នុងរដូវរងារ ភ្លៀងលាយទឹកកក និងទឹកជំនន់ នៅរដូវវស្សា។ ចាប់ពីឆ្នាំ ២០១៣ ដល់បច្ចុប្បន្ន ដោយសារឥទ្ធិពលនៃការប្រែប្រួលអាកាសធាតុ ធ្វើអោយតំបន់លំនៅដ្ឋានជាច្រើនបានរងគ្រោះដោយទឹកជំនន់ បណ្តាលឲ្យបាត់បង់អាយុជីវិត និងខូចខាត់ទ្រព្យសម្បត្តិរបស់ប្រជាពលរដ្ឋ។
ដើម្បីជួយប្រជាជននៅតំបន់ដាច់ស្រយាល ក្នុងឆ្នាំ ២០១៧ គណៈកម្មការជនជាតិខេត្ត Son La បានផ្តល់យោបល់ជូនក្រុមប្រឹក្សាប្រជាជនខេត្តចេញសេចក្តីសម្រេចចិត្តលេខ ៥៦/NQ-HDND ដោយអនុម័តលើគម្រោងរៀបចំ និងជួយគាំទ្រតំបន់លំនៅដ្ឋានដែលនៅឆ្ងាយពីទីកណ្តាលភូមិក្នុងខេត្ត ក្នុងអំឡុងឆ្នាំ ២០១៧-២០២៥។ គម្រោងនេះនឹងត្រូវអនុវត្តជាពីរដំណាក់កាល គឺដំណាក់កាលទី ១ (២០១៧-២០២០) ពិចារណាបង្កើតភូមិថ្មីចំនួន ១៥ ដំណាក់កាលទី ២ (២០២១-២០២៥) នឹងបន្តជួយគាំទ្រការវិនិយោគលើហេដ្ឋារចនាសម្ព័ន្ធ ជួយគាំទ្រផលិតកម្ម ដើម្បីជួយប្រជាជនរក្សាលំនឹងជីវភាពរស់នៅ។
លោក Dinh Trung Dung ក៏បានបន្ថែមថា ដោយភូមិសាស្ត្រស្មុគស្មាញ ភ្នំខ្ពស់ ទន្លេ ស្ទឹងជាច្រើនដូចជាខេត្ត Son La នោះ ការផ្តល់អាទិភាពដល់តំបន់នៅឆ្ងាយពីទីកណ្តាលភូមិ និងភូមិគឺពិតជាចាំបាច់ណាស់។ ទោះជាយ៉ាងណាក៏ដោយ នៅក្នុងដំណើរការអនុវត្ត អាជ្ញាធរមូលដ្ឋានត្រូវមានភាពបត់បែន និងត្រួតពិនិត្យយ៉ាងតឹងរ៉ឹងជាងមុន ដើម្បីឱ្យសេចក្តីសម្រេចចិត្តនេះមានប្រសិទ្ធភាព និងជួយតំបន់លំនៅដ្ឋានទាំងនេះឱ្យរួចផុតភាពអន់ថយនៃសេដ្ឋកិច្ចសង្គម៕
បកប្រែដោយ Duy Hoan