លុបបំបាត់អក្ខរកម្មអាស្រ័យដោយកងទ័ពការពារព្រំដែន
កប.អនឡាញ - ដោយទទួលបានវិញ្ញាបនប័ត្របញ្ចប់ការសិក្សា ដែលមានពិន្ទុល្អ ថ្នាក់លុបបំបាត់អក្ខរកម្មសម្រាប់ស្ត្រីជនជាតិ Mong នៅភូមិ Huoi Moi ឃុំ Tri Le ស្រុក Que Phong ខេត្ត Nghe An អ្នកស្រី Tho Y Xong កើតនៅឆ្នាំ ១៩៨៧ មិនអាចលាក់បាំងសេចក្តីអំណររបស់នាងបានឡើយ៖ “អាស្រ័យដោយមានថ្នាក់លុបបំបាត់អក្ខរកម្ម ឥឡូវនេះខ្ញុំបានចេះអាន សរសេរ និងគណនា។ ខ្ញុំសូមថ្លែងអំណរគុណដល់លោកគ្រូ អ្នកគ្រូ ដែលបានណែនាំ និងបង្រៀនខ្ញុំយ៉ាងច្រើន”។
អ្នកស្រី Tho Y Xong គឺជាសិក្ខាកាមម្នាក់ក្នុងចំណោមសិក្ខាកាម ៥ នាក់ ដែលទទួលបានលទ្ធផលល្អក្នុងការប្រលងដើម្បីវាយតម្លៃលទ្ធផលសម្រាប់សិក្ខាកាមនៅចុងបញ្ចប់នៃវគ្គសិក្សា ដែលរៀបចំឡើងដោយប៉ុស្តិ៍ការពារព្រំដែន Tri Le (កងទ័ពការពារព្រំដែនខេត្ត Nghe An) សហការជាមួយសាលាបឋមសិក្សា Tri Le លេខ ៤ ស្រុក Que Phong។ ក្នុងចំណោមសិក្ខាកាម ២៥ នាក់ដែលចូលរួមប្រឡងមាន ៥ នាក់ទទួលបានពិន្ទុល្អ; ១៤ នាក់ទទួលបានពិន្ទុល្អបង្គួរ; ហើយសិក្ខាកាមនៅសេសសល់ទទួលបានពិន្ទុមធ្យម។
    |
 |
|
ស្ត្រីជនជាតិ Mong ចូលរួមថ្នាក់លុបបំបាត់អក្ខរកម្ម |
លោកវរសេនីយ៍ឯកបម្រុង Ho Quoc Hai ប្រធាននយោបាយនៃប៉ុស្តិ៍ការពារព្រំដែន Tri Le បានឲ្យដឹងថា “ក្នុងអំឡុងពេលបំពេញភារកិច្ចនៅក្នុងតំបន់ មេបញ្ជាការប៉ុស្តិ៍ការពារព្រំដែនបានសង្កេតឃើញថា ស្ត្រីជនជាតិ Mong មួយចំនួននៅទីនេះមិនចេះអាន រឺសរសេរភាសាវៀតណាម ហេតុដូច្នេះ បានសហការជាមួយសាលាបឋមសិក្សា Tri Le លេខ ៤ បើកថ្នាក់លុបបំបាត់អក្ខរកម្មសម្រាប់ពួកគេ”។ ដូច្នោះហើយ ថ្នាក់រៀនត្រូវបើកចាប់ពីខែធ្នូ ឆ្នាំ ២០២០ ដែលបង្រៀនដោយលោកគ្រូ អ្នកគ្រូនៃសាលាបឋមសិក្សា Tri Le លេខ ៤ និងកម្មាភិបាលនៃប៉ុស្តិ៍ការពារព្រំដែន Tri Le។
ក្នុងរយៈពេល ៦ ខែកន្លងមក ថ្នាក់លុបបំបាត់អក្ខរកម្មសម្រាប់ស្ត្រីជនជាតិ Mong នៅភូមិ Huoi Moi បានជួយពួកគេចេះអាន សរសេរ និងគណនា រួមចំណែកលើកកម្ពស់ចំណេះដឹង ជំរុញការអភិវឌ្ឍសេដ្ឋកិច្ច និងកាត់បន្ថយភាពក្រីក្រនៅតាមតំបន់ព្រំដែន៕
បកប្រែដោយ Huyen Trang