អាល្លឺម៉ង់ចង់ពង្រឹងកិច្ចសហប្រតិបត្តិការជាមួយវៀតណាមលើវិស័យសន្តិសុខតាមអ៊ីនធឺណិត AI និងបណ្តុះបណ្តាលវិជ្ជាជីវៈ

លោកស្រី Margarete Barth ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណៈរដ្ឋសហព័ន្ធអាល្លឺម៉ង់ប្រចាំនៅវៀតណាម បានអះអាងដូច្នេះនៅក្នុងសន្និសីទសារព័ត៌មានស្ដីពីបណ្ដាព្រឹត្តិការណ៍អបអរសាទរខួបលើកទី ៥០ នៃការបង្កើតទំនាក់ទំនងការទូតរវាងវៀតណាមនិងអាល្លឺម៉ង់ (ថ្ងៃទី ២៣ ខែកញ្ញា ឆ្នាំ១៩៧៥ / ថ្ងៃទី ២៥ ខែកុម្ភៈ ឆ្នាំ២០២៥) ដែលប្រព្រឹត្តទៅនាថ្ងៃទី១៤ ខែកុម្ភៈ។

ដោយពិនិត្យមើលឡើងវិញនូវព្រឹត្តិការណ៍សំខាន់ៗ និងសមិទ្ធិផលគួរឲ្យចាប់អារម្មណ៍ក្នុងទំនាក់ទំនងរវាងប្រទេសទាំងពីរ លោកស្រី Margarete Barth បានឲ្យដឹងថា កិច្ចសហប្រតិបត្តិការរវាងប្រជាជន និងប្រជាជនគឺជាមូលដ្ឋានគ្រឹះរវាងប្រទេសទាំងពីរ ជាកម្លាំងចលករសម្រាប់ការអនុវត្តកិច្ចសហប្រតិបត្តិការលើវិស័យវប្បធម៌ និងវិស័យសេដ្ឋកិច្ចនាពេលកន្លងមកនេះ។ នេះត្រូវបានបង្ហាញតាមរយៈចំនួនភ្ញៀវទេសចរអាល្លឺម៉ង់កាន់តែជាច្រើនមកកាន់ប្រទេសវៀតណាមជារៀងរាល់ឆ្នាំ។ នៅឆ្នាំ ២០២៤ ភ្ញៀវទេសចរអាល្លឺម៉ង់ជាង ២៥ ម៉ឺននាក់បានមកវៀតណាម។ បច្ចុប្បន្ន អាណិកជនវៀតណាមជាង ២០០,០០០ នាក់កំពុងរស់នៅ សិក្សា និងធ្វើការនៅប្រទេសអាល្លឺម៉ង់។

លោកស្រី Margarete Barth ថ្លែងមតិក្នុងសន្និសីទសារព័ត៌មាន

ដោយវាយតម្លៃថា វៀតណាមមានដំណើរការធ្វើសមាហរណកម្មប្រកបដោយជោគជ័យ លោកស្រី Barth បានឲ្យដឹងថា នេះជាឱកាសសម្រាប់កិច្ចសហប្រតិបត្តិការសេដ្ឋកិច្ច និងវិនិយោគរវាងភាគីទាំងពីរ។ បច្ចុប្បន្ន អាល្លឺម៉ង់កំពុងវិនិយោគជាង ៣.៦ ពាន់លានដុល្លារនៅវៀតណាម និងមានធុរកិច្ចអាល្លឺម៉ង់ចំនួន ៥៣០ ដែលកំពុងធ្វើអាជីវកម្មដោយជោគជ័យនៅវៀតណាម បង្កើតការងារប្រហែល ៥០.០០០។

លោកស្រី Barth បានឲ្យដឹងថា នាពេលខាងមុខ សន្តិសុខតាមអ៊ីនធឺណិត AI និងបណ្តុះបណ្តាលវិជ្ជាជីវៈ គឺជាវិស័យដែលអាល្លឺម៉ង់ចង់ពង្រឹងកិច្ចសហប្រតិបត្តិការជាមួយវៀតណាម។ ទន្ទឹមនឹងនោះ កិច្ចសហប្រតិបត្តិការជាមួយវៀតណាមក្នុងក្របខ័ណ្ឌអង្គការសហប្រជាជាតិ និងការរក្សាសន្តិភាពក៏ជាវិស័យដែលអាល្លឺម៉ង់មានការយកចិត្តទុកដាក់ផងដែរ។ លោកស្រី Barth សង្ឃឹមថា ផលិតផលវៀតណាមកាន់តែច្រើន ជាពិសេសគ្រឿងអេឡិចត្រូនិក អាហារ និងទឹកត្រីនឹងត្រូវបាននាំចេញទៅកាន់ប្រទេសអាល្លឺម៉ង់។

នៅឆ្នាំ២០២៥ វៀតណាម និងអាល្លឺម៉ង់ប្រារព្ធខួប ៥០ ឆ្នាំនៃការបង្កើតទំនាក់ទំនងការទូត។ នេះគឺជាឱកាសមួយសម្រាប់ភាគីទាំងពីរក្រឡេកមើលអតីតកាល ក៏ដូចជាសង្កត់ធ្ងន់លើបច្ចុប្បន្នកាល ហើយឆ្ពោះទៅសក្តានុពលសម្រាប់កិច្ចសហប្រតិបត្តិការលើវិស័យជាច្រើននាពេលអនាគត។ លោកស្រីឯកអគ្គរដ្ឋទូតបានឲ្យដឹងថា សកម្មភាពនានាក្នុងក្របខ័ណ្ឌនៃខួបលើកទី ៥០ នៃការបង្កើតទំនាក់ទំនងការទូតរវាងប្រទេសអាល្លឺម៉ង់និងវៀតណាមនឹងរួមមាន រាត្រីការប្រគុំតន្ត្រី "Berlin ចាំងពន្លឺ" ដោយមានការចូលរួមពីលោកស្រី Katharine Mehrling​ តារាចម្រៀងដ៏ល្បីល្បាញលើពិភព; ការសម្តែងដោយ Thomas Anderson នៃក្រុម Modern Talking; “មហោស្រពអាល្លឺម៉ង់” នៅបឹង Hoan Kiem; ពិធីចុះហត្ថលេខារវាងសហព័ន្ធបាល់ទាត់វៀតណាម និង Bundesliga អាល្លឺម៉ង់។ល៕

បកប្រែដោយ Thuy Anh