សាជីវកម្ម AIA សន្យារួមវិភាគទានរយៈពេលវែងក្នុងការអភិវឌ្ឍរបស់វៀតណាម
កប.អនឡាញ - នាព្រឹកថ្ងៃទី ១ សីហា នៅទីក្រុងហាណូយ អនុប្រធានរដ្ឋវៀតណាម លោកស្រី Vo Thi Anh Xuan បានទទួលជួបលោក Lee Yuan Siong ប្រធាននិងជាអគ្គនាយកប្រតិបត្តិនៃសាជីវកម្មធានារ៉ាប់រង AIA (សហរដ្ឋអាមេរិក)។
នៅក្នុងជំនួប លោកស្រីអនុប្រធានរដ្ឋ Vo Thi Anh Xuan បានអបអរសាទរចំពោះសាជីវកម្ម AIA បន្ទាប់ពីប្រតិបត្តិការអស់រយៈពេលជាង ២០ ឆ្នាំនៅវៀតណាមដែលបានអះអាងនូវឋានៈឈានមុខគេរបស់ខ្លួននៅក្នុងទីផ្សារធានារ៉ាប់រងអាយុជីវិត។
លោកស្រីអនុប្រធានរដ្ឋ Vo Thi Anh Xuan បានស្នើឲ្យ AIA ចែករំលែកបទពិសោធន៍ មិនត្រឹមតែក្នុងវិស័យធានារ៉ាប់រងប៉ុណ្ណោះទេ ថែមទាំងជំនាញគ្រប់គ្រងការវិនិយោគហិរញ្ញវត្ថុ បទពិសោធន៍ក្នុងការឆ្លើយតបទៅនឹងបញ្ហាប្រឈមពីអាកាសធាតុ និងហានិភ័យផ្សេងៗ ដើម្បីធានាការវិនិយោគ និងការអភិវឌ្ឍប្រកបដោយចីរភាព។ លោកស្រីអនុប្រធានរដ្ឋ Vo Thi Anh Xuan ក៏បានស្នើឲ្យ AIA បន្តលើកកម្ពស់ស្មារតីទទួលខុសត្រូវសហគមន៍ បង្កើនសកម្មភាពសប្បុរសធម៌ និងជួយសហគមន៍។
|
|
លោកស្រីអនុប្រធានរដ្ឋ Vo Thi Anh Xuan ទទួលជួបលោក Lee Yuan Siong ប្រធាន និងជាអគ្គនាយកប្រតិបត្តិនៃសាជីវកម្មធានារ៉ាប់រង AIA (រូបថត៖ vnanet.vn) |
លោក Lee Yuan Siong បានបញ្ជាក់ថា សាជីវកម្ម AIA កំពុងចាប់អារម្មណ៍ចំពោះវិស័យចំនួនពីរគឺ៖ Logistic និងការថែទាំសុខាភិបាល ហើយវៀតណាមគឺជាទីផ្សារដ៏សំខាន់សម្រាប់សាជីវកម្មអនុវត្តផែនការវិនិយោគរបស់ខ្លួន។ សាជីវកម្ម AIA នឹងបន្តខិតខំប្រឹងប្រែងដើម្បីរួមចំណែកដល់ការអភិវឌ្ឍសេដ្ឋកិច្ចសង្គមរបស់វៀតណាម ក៏ដូចជាសកម្មភាពនិងគម្រោងនានាសម្រាប់សហគមន៍នៅវៀតណាម។
លោក Lee Yuan Siong បានសម្តែងនូវក្តីជឿជាក់ថា វៀតណាមនឹងរីកចម្រើនប្រកបដោយវិបុលភាពនាពេលខាងមុខ ព្រមទាំងអះអាងជាថ្មីថា សាជីវកម្ម AIA សន្យារួមវិភាគទានរយៈពេលវែងក្នុងការអភិវឌ្ឍរបស់វៀតណាម៕
បកប្រែដោយ Huyen Trang