ជួយគាំទ្រសហគ្រាសវៀតណាមក្នុងការនាំទំនិញចូលទៅកាន់ទីផ្សារអឺរ៉ុប
កប.អនឡាញ - អឺរ៉ុបកំពុងជាទីផ្សារនាំចេញធំ និងមានសក្តានុពលសម្រាប់សហគ្រាសវៀតណាម ជាពិសេសលើវិស័យវាយនភណ្ឌ ជលផល គ្រឿងសង្ហារឹម និងផលិតផលឈើ។ ដើម្បីទទួលប្រសិទ្ធភាពពីទីផ្សារនេះ សហគ្រាសវៀតណាមគប្បីស្វែងយល់ច្បាស់អំពីស្តង់ដារគុណភាព បច្ចេកទេស ក៏ដូចជានិន្នាការនៃទីផ្សារ។
នេះជាខ្លឹមសារដែលអ្នកជំនាញបានវិភាគនៅឯសិក្ខាសាលាតាមប្រព័ន្ធវីដេអូ “ការចូលក្នុងទីផ្សារអឺរ៉ុប” ដែលរៀបចំឡើងដោយមជ្ឈមណ្ឌលជម្រុញពាណិជ្ជកម្ម និងវិនិយោគទីក្រុងហូជីមិញ (ITPC) និងសភាពាណិជ្ជកម្ម និងឧស្សាហកម្មបារាំងប្រចាំនៅវៀតណាម នារសៀលថ្ងៃទី៧ ខែកក្កដា។
លោក Nguyen Tuan នាយករង ITPC បានឲ្យដឹងថា កិច្ចសហប្រតិបត្តិការពាណិជ្ជកម្មវៀតណាម-អឺរ៉ុប ទទួលបានលទ្ធផលយ៉ាងសកម្មនៅពេលកន្លងមក ហើយត្រូវបានព្យាករណ៍ថានឹងមានកំណើនខ្លាំងថែមទៀត ដោយសារការចូលជាធរមាននៃកិច្ចព្រមព្រៀងពាណិជ្ជកម្មសេរីសហភាពអឺរ៉ុប - វៀតណាម (EVFTA)។
លោក Adam Koulaksezian នាយកនៃសភាពាណិជ្ជកម្ម និងឧស្សាហកម្មបារាំងនៅវៀតណាម (CCIFI) បានឲ្យដឹងថា បច្ចុប្បន្ន វៀតណាមគឺជាដៃគូពាណិជ្ជកម្មធំទី១៥ របស់ EU និងជាដៃគូធំជាងគេរបស់ EU ក្នុងអាស៊ាន។ ការនាំចេញនាំចូលកំពុងអភិវឌ្ឍ និងត្រូវបានព្យាករណ៍ថានឹងបន្តមានកំណើន នៅពេលខាងមុខនេះ ហើយជាឱកាសធំសម្រាប់ការនាំចេញរបស់វៀតណាម៕
បកប្រែដោយ Thuy Anh