ធនាគារអភិវឌ្ឍន៍អាស៊ីជួយគាំទ្រវៀតណាមជំរុញការអភិវឌ្ឍលើវិស័យឯកជន
កប.អនឡាញ - នាថ្ងៃទី ៧ ខែកក្កដា ធនាគារអភិវឌ្ឍន៍អាស៊ី (ADB) បានអនុម័តលើជំនួយផ្នែកបច្ចេកទេសដែលមានតម្លៃ ៤.៦ លានដុល្លារអាមេរិកដើម្បីជួយរដ្ឋាភិបាលវៀតណាមពង្រឹងទំនាក់ទំនងភាពជាដៃគូសាធារណៈនិងឯកជន ការអភិវឌ្ឍវិស័យឯកជន និងការធ្វើកំណែទម្រង់សហគ្រាសរបស់រដ្ឋ។
ការជួយគាំទ្រផ្នែកបច្ចេកទេសនេះនឹងផ្តល់យោបល់នូវគោលនយោបាយ ជួយត្រៀមរៀបចំគម្រោងហេដ្ឋារចនាសម្ព័ន្ធ និងលើកកម្ពស់បទប្បញត្ដិដើម្បីជំរុញកំណើនសេដ្ឋកិច្ចប្រកបដោយចីរភាព។ ជំនួយឥតសំណងចំនួន ២.៧ លានដុល្លារពីរដ្ឋាភិបាលកាណាដា និងជំនួយឥតសំណងចំនួន ១.៩ លានដុល្លារអាមេរិក ពីរដ្ឋាភិបាលអូស្រ្តាលីដែលគ្រប់គ្រងដោយធនាគារអភិវឌ្ឍន៍អាស៊ី។
លោក Donald Lambert អ្នកជំនាញក្នុងការអភិវឌ្ឍវិស័យឯកជនរបស់ធនាគារអភិវឌ្ឍន៍អាស៊ីបានសន្និដ្ឋានថាដើម្បីសំរេចបានគោលបំណងនៃយុទ្ធសាស្រ្តអភិវឌ្ឍន៍សេដ្ឋកិច្ចសង្គម ២០២១-២០៣០ និងរក្សាអត្រាកំណើនក្នុងកំរិត ៦% - ៧% និងសម្រេចបានគោលដៅអភិវឌ្ឍន៍ប្រកបដោយចីរភាពនោះ វៀតណាមនឹងត្រូវការលើកកម្ពស់ការកែទម្រង់សេដ្ឋកិច្ចបន្ថែមទៀត ពង្រីកតួនាទីវិស័យឯកជនក្នុងការជំរុញការអភិវឌ្ឍប្រទេសជាតិ៕
បកប្រែដោយ Pham Diep