ជំរុញកិច្ចសហប្រតិបត្តិការលើវិស័យវិទ្យាសាស្ត្រ និងពាណិជ្ជកម្មកសិផលជាមួយសហរដ្ឋអាមេរិក
កប.អនឡាញ - ពីថ្ងៃទី ២៤ ដល់ថ្ងៃទី ២៩ ខែកុម្ភៈ គណៈប្រតិភូវៀតណាម ដឹកនាំដោយ លោក Le Quoc Doanh អនុរដ្ឋមន្រ្តីក្រសួងកសិកម្ម និងអភិវឌ្ឍន៍ជនបទ បានទៅបំពេញទស្សនកិច្ចនៅសហរដ្ឋអាមេរិក ដើម្បីជំរុញកិច្ចសហប្រតិបត្តិការ និងការផ្លាស់ប្តូរពាណិជ្ជកម្មកសិផល រវាងប្រទេសទាំងពីរ។
គណៈប្រតិភូនឹងផ្តោតទៅលើការសឹក្សាការផ្គត់ផ្គង់កសិផលរបស់សហរដ្ឋអាមេរិក ដោយផ្តល់អាទិភាពលើការនាំចូលកសិផល និងបច្ចេកវិទ្យាពីសហរដ្ឋអាមេរិកចូលមកវៀតណាម សម្រាប់ការផលិតនិងការប្រើប្រាស់ក្នុងស្រុក ព្រមទាំងរៀបចំវេទិកាធុរកិច្ចដើម្បីជំរុញពាណិជ្ជកម្មលើវិស័យកសិផល រុក្ខផល ជលផល និងតភ្ជាប់ពាណិជ្ជកម្មរវាងអង្គការអាជីវកម្មនៃប្រទេសទាំងពីរ។
ក្រៅពីនោះ គណៈប្រតិភូក៏បានស្វែងយល់អំពីវិធានការជំរុញកិច្ចសហប្រតិបត្តិការ និងផ្ទេរបច្ចេកវិទ្យាទំនើបក្នុងវិស័យកសិកម្ម ដើម្បីអភិវឌ្ឍខ្សែសង្វាក់ផលិតកម្មក្នុងស្រុក និងធ្វើការជាមួយអាជ្ញាធរសមត្ថកិច្ចអាមេរិក ដើម្បីលុបបំបាត់ការលំបាក បង្កើនកិច្ចសហប្រតិបត្តិការ និងបង្កើតលក្ខខណ្ឌអំណោយផលសម្រាប់ការនាំចេញ និងនាំចូលកសិផល រុក្ខផល ជលផល រវាងប្រទេសទាំងពីរ៕
បកប្រែដោយ Huyen Trang