ការជម្រុញពាណិជ្ជកម្មរវាងវៀតណាមនិងឡាតវី
កប.អនឡាញ - នាព្រឹកថ្ងៃទី១៧ ខែកក្កដា នៅទីក្រុងហាណូយ សភាពាណិជ្ជកម្មនិងឧស្សាហកម្មវៀតណាម(VCCI) បានសហការជាមួយនាយកដ្ឋានវិនិយោគនិងអភិវឌ្ឍឡាតវី រៀបចំវេទិកាសហគ្រាសវៀតណាម-ឡាតវី។ នេះជាសកម្មភាពនៅក្នុងក្របខ័ណ្ឌនៃដំណើរទស្សនកិច្ចការងារនៅវៀតណាមរបស់លោក Edgars Rinkevics រដ្ឋមន្រ្តីក្រសួងការបរទេសឡាតវី ដើម្បីពង្រីកកិច្ចសហប្រតិបត្តិការរវាងសហគ្រាសនៃប្រទេសទាំងពីរ។
តាំងពីពេលបង្កើតទំនាក់ទំនងការទូតនៅឆ្នាំ១៩៩២ មក ទំនាក់ទំនងមិត្តភាព កិច្ចសហប្រតិបត្តិការវៀតណាម-ឡាតវីកំពុងអភិវឌ្ឍយ៉ាងសកម្ម។ ភាគីទាំងពីរបានសហប្រតិបត្តិការយ៉ាងល្អប្រសើរនៅលើឆាកអន្តរជាតិ ជាពិសេសនៅអង្គការសហប្រជាជាតិ និងវេទិកាសហប្រតិបត្តិការអាស៊ី - អឺរ៉ុប (ASEM)។ នៅប៉ុន្មានឆ្នាំថ្មីៗនេះ កិច្ចសហប្រតិបត្តិការរវាងវៀតណាម និងឡាតវីបានរីកចម្រើន ទំហំពាណិជ្ជកម្មទ្វេភាគីនៅឆ្នាំ២០១៨ ទទួលបាន ១៨៦.១ លានដុល្លារអាមេរិក។
ក្នុងវេទិកា តំណាងនៃភាគីទាំងពីរបានឧទ្ទេសនាមអំពីទីផ្សារ និងការតភ្ជាប់រវាងសហគ្រាសវៀតណាម និងសហគ្រាសឡាតវីលើវិស័យជាច្រើន។
តំណាង VCCI បានឲ្យដឹងថា សក្តានុពលនៃកិច្ចសហប្រតិបត្តិការលើវិស័យពាណិជ្ជកម្ម វិនិយោគរវាងវៀតណាម និងឡាតវីនៅមានច្រើន។ ការរៀបចំវេទិកាសហគ្រាសវៀតណាម-ឡាតវីនឹងជួយសហគ្រាសនៃប្រទេសទាំងពីរយល់ដឹងគ្នាថែមទៀត ហើយបង្កើតកិច្ចសហប្រតិបត្តិការលើវិស័យពាណិជ្ជកម្ម។ ដំណើរទស្សនកិច្ចនៅវៀតណាមរបស់សហគ្រាសឡាតវីលើកនេះមានបំណងស្វែងយល់អំពីទីផ្សារ បរិស្ថាន និងវប្បធម៌នៃការធ្វើអាជីវកម្មរបស់វៀតណាម៕
បកប្រែដោយ Thuy Anh