ស្តាប់ប្រជាជននិយាយ និយាយឲ្យប្រជាជនយល់ និងធ្វើឲ្យប្រជាជនជឿទុកចិត្ដ
កប.អនឡាញ - អនុវត្តចលនារៀនភាសាបរទេស និងភាសាជនជាតិភាគតិចសម្រាប់កម្មាភិបាលនិងយុទ្ធជននៃកងទ័ពការពារព្រំដែន នាពេលកន្លងមក ប៉ុស្តិ៍ការពារព្រំដែន Na Loi កងទ័ពការពារព្រំដែនខេត្ត Nghe An បានមានភាពម្ចាស់ការក្នុងការបង្កើតផែនការរៀនភាសាជនជាតិភាគតិច ដើម្បីរួមចំណែកលើកកម្ពស់ប្រសិទ្ធភាពនៃការឃោសនា បំពេញតាមតម្រូវការនៃភារកិច្ចក្នុងស្ថានភាពថ្មី។
កាលពីខែមិថុនា ឆ្នាំ ២០១៧ មក លោកវរសេនីយ៍ត្រី Hoang Van Cong កម្មាភិបាលនៃប៉ុស្តិ៍ការពារព្រំដែន Na Loi ត្រូវបានកងទ័ពការពារព្រំដែនខេត្ដចាត់បញ្ជូនទៅបំពេញការងារនៅឃុំ Dooc May ស្រុក Ky Son ដើម្បីកាន់តំណែងជាលេខារងគណៈកម្មាធិការបក្សឃុំ។
នេះជាឃុំដែលជនជាតិ Mong រស់នៅ ១០០%។ ជាមនុស្សម្នាក់មិនចេះភាសាជនជាតិភាគតិច ដូច្នេះនៅពេលដែលគាត់ទៅឃោសនា ឬទៅធ្វើស្រែចំការ ឬ ណែនាំប្រជាកសិករក្នុងការផលិត គាត់ត្រូវមានអ្នកបកប្រែ ដូច្នេះប្រសិទ្ធភាពនៃការងារមិនខ្ពស់នោះទេ ហើយក៏មិនយល់ពីគំនិត និងអារម្មណ៍របស់អ្នកភូមិ។
|
|
កម្មាភិបាលលនិងយុទ្ធជននៃប៉ុស្តិ៍ការពារព្រំដែន Na Loi (កងទ័ពការពារព្រំដែនខេត្ត Nghe An) រៀនភាសា Mong |
ដើម្បីយល់ពីគំនិតនិងអារម្មណ៍របស់អ្នកភូមិ លោក Hoang Van Cong បានឧស្សាហ៍ព្យាយាមរៀនភាសាជនជាតិ Mong ដែលរៀបចំដោយអង្គភាព។ រៀនពេលយប់ ពេលថ្ងៃធ្វើការនៅឃុំ និងឆ្លៀតពេលទំនេរដើម្បីរៀនមេរៀនឡើងវិញ។ លោកវរសេនីយ៍ត្រី Hoang Van Cong បានចែករំលែកថា៖ “ទន្ទឹមនឹងការសិក្សាដោយខ្លួនឯង រាល់ពេលដែលខ្ញុំទៅសួរសុខទុក្ខព្រឹទ្ធាចារ្យភូមិ មេភូមិ ឬ ទៅធ្វើស្រែចំការ ឬ ពេលទទួលទានអាហារជាមួយជនរួមជាតិ Mong… ខ្ញុំសុទ្ធតែស្ដាប់ដោយយកចិត្តទុកដាក់ ដើម្បីលើកកម្ពស់លទ្ធភាពស្ដាប់ និងនិយាយ។
ដោយសារការខិតខំប្រឹងប្រែងនិងការឧស្សាហ៍ព្យាយាមសិក្សា ដូច្នេះការនិយាយភាសា Mong របស់ Hoang Van Cong កាន់តែមានភាពប្រសើរឡើង ហើយគាត់កាន់តែមានទំនុកចិត្ដនៅពេលជួបប្រាស្រ័យទាក់ទងជាមួយអ្នកភូមិ។ ក្នុងដំណើរការពិភាក្សាការងារ អ្វីៗដែលមិនយល់ គាត់សុំការពន្យល់ពីជនរួមជាតិ។ អាស្រ័យហេតុនេះ គាត់កាន់តែមានភាពស្និទ្ធស្នាលនិងត្រូវបានអ្នកភូមិស្រឡាញ់រាប់អាន ការឃោសនានិងផ្សព្វផ្សាយគោលការណ៍របស់បក្ស គោលនយោបាយ និងច្បាប់របស់រដ្ឋដល់ជនរួមជាតិក៏កាន់តែងាយស្រួល និងមានប្រសិទ្ធភាពថែមទៀត។
ថ្នាក់នីមួយៗមានរយៈពេលប្រហែល ៦ ខែ ដែលត្រូវបានរៀបចំនៅព្រឹកថ្ងៃចន្ទ និងរៀងរាល់យប់ថ្ងៃពុធ។ ជាជនជាតិ Mong ម្នាក់ លោកអនុសេនីយ៍ឯកបំរុង Lau Ba Nenh យុទ្ធជនឈ្លបយកការណ៍នៃប៉ុស្តិ៍ការពារព្រំដែន Na Loi ត្រូវបានប្រគល់ភារកិច្ចរៀបចំកម្មវិធីសិក្សានិងបង្រៀនភាសា Mong សម្រាប់កម្មាភិបាលនិងយុទ្ធជនក្នុងអង្គភាព។ លោកអនុសេនីយ៍ឯកបំរុង Lau Ba Nenh បាននិយាយថា ដើម្បីជួយកម្មាភិបាលនិងយុទ្ធជនសិក្សាបានងាយយល់ អាចនិយាយជាមួយបងប្អូនដោយភាសា Mong ខ្ញុំយកចិត្ដទុកដាក់ដល់របៀបសរសេរ ការអាននិងបញ្ចេញសំឡេង ទំនៀមទម្លាប់ និងវប្បធម៌ប្រពៃណីរបស់ជនជាតិ Mong។
|
|
ការត្រួតពិនិត្យភាសាជនជាតិ Mong សម្រាប់យុទ្ធជននៃប៉ុស្តិ៍ការពារព្រំដែន Na Loi |
លោកអនុសេនីយ៍ឯក Nguyen Xuan Thanh ប្រធាននយោបាយនៃប៉ុស្តិ៍ការពារព្រំដែន Na Loi បានឲ្យដឹងថា៖ “ដើម្បីបំពេញភារកិច្ចនយោបាយ ការដែលកម្មាភិបាល និងយុទ្ធជនស្តាប់ និយាយនិងយល់ភាសា Mong នឹងជួយបង្កលក្ខណៈងាយស្រួលសម្រាប់ការចលនាមហាជន ជាពិសេសការផ្សព្វផ្សាយគោលការណ៍របស់បក្ស គោលនយោបាយ និងច្បាប់របស់រដ្ឋដល់ប្រជាជន។ ដូច្នេះហើយ ក្នុងរយៈពេលប៉ុន្មានឆ្នាំកន្លងមកនេះ មេបញ្ជាការនៃអង្គភាពបានរៀបចំថ្នាក់រៀនភាសា Mong ជូនកម្មាភិបាលនិងយុទ្ធជនទាំងអស់នៅអង្គភាព”។
ការដែលកម្មាភិបាលនិងយុទ្ធជននៃអង្គភាពចេះភាសាជនជាតិភាគតិចមួយចំនួននៅភូមិសាស្ដ្របានបង្កលក្ខណៈងាយស្រួលសម្រាប់ការបំពេញការងារនិងនិយាយជាមួយអ្នកភូមិ។ អាស្រ័យហេតុនេះ ការឃោសនានិងផ្សព្វផ្សាយជនរួមជាតិគោរពគោលការណ៍របស់បក្ស គោលនយោបាយនិងច្បាប់របស់រដ្ឋ ជាមួយគ្នានោះ មិនស្តាប់និងមិនធ្វើតាមទស្សនៈខុសឆ្គង ការបំភ្លៃការពិតរបស់មុខសញ្ញាអាក្រក់។
អាចនិយាយបានថា តាមរយៈការបំផុសចលនារៀនភាសាជនជាតិភាគតិចក្នុងចំណោមកម្មាភិបាលនិងយុទ្ធជននៃកងទ័ពការពារព្រំដែនខេត្ត Nghe An បាននិងកំពុងរួមចំណែកលើកកម្ពស់ប្រសិទ្ធភាពក្នុងការបំពេញការងារកសាងនិងការពាររឹងមាំនូវអធិបតេយ្យភាព សន្តិសុខនៅតាមព្រំដែនជាតិក្នុងស្ថានភាពថ្មី៕
បកប្រែដោយ Pham Diep