ត្រៀមខ្លួនសម្រាប់ការដាក់ឲ្យ​ដំណើរការមជ្ឈមណ្ឌលហិរញ្ញវត្ថុអន្តរជាតិនៅទីក្រុងហូជីមិញ

នៅក្នុងកម្មវិធីសន្ទនា "CEO 500-Tea Connect" ក្នុងក្របខ័ណ្ឌនៃវេទិកាសេដ្ឋកិច្ចសរដូវស្លឺកឈើជ្រុះឆ្នាំ ២០២៥ ដែលបានធ្វើឡើងនៅទីក្រុងហូជីមិញ លោក   Pham Minh Chinh នាយករដ្ឌមន្រ្តីវៀតណាម ឲ្យដឹងថា ដើម្បីក្លាយជាទីក្រុងធំៗមួយ ទីក្រុងហូជីមិញត្រូវមានលក្ខខណ្ឌចំនួន ៥។ លក្ខខណ្ឌទីមួយគឺដើមទុន ដែលក្នុងនោះទីក្រុងត្រូវផ្តោតលើការអភិវឌ្ឍមជ្ឈមណ្ឌលហិរញ្ញវត្ថុអន្តរជាតិ។ ក្រៅពីធនធានផ្ទៃក្នុង ទីក្រុងត្រូវមានកិច្ចសហប្រតិបត្តិការជាមួយ​សហគមន៍អន្តរជាតិក្រោម​ពាក្យស្លោក "ចែករំលែកផលប្រយោជន៍ និងហានិភ័យ"។

លោក   Pham Minh Chinh នាយករដ្ឌមន្រ្តីវៀតណាម អញ្ជើញជាសក្ខីភាពនៃសេចក្តីថ្លែងការណ៍រួមនៃកិច្ចសហប្រតិបត្តិការរវាងទីក្រុងហូជីមិញ និងវេទិកាសេដ្ឋកិច្ចពិភពលោក (WEF) ស្តីពីការផ្លាស់ប្តូរបៃតង

លោក Nguyen Van Duoc ប្រធានគណៈកម្មាធិការប្រជាជនទីក្រុងហូជីមិញ បានសន្យាថា ទីក្រុងកំពុងបំពេញលក្ខខណ្ឌល្អបំផុត ដើម្បីត្រៀមខ្លួនសម្រាប់ការដាក់ឲ្យ​ដំណើរការមជ្ឈមណ្ឌលហិរញ្ញវត្ថុអន្តរជាតិ បង្កើតបរិយាកាសអំណោយផល តម្លាភាពដើម្បីទាក់ទាញវិនិយោគិន។ ទីក្រុងអំពាវនាវឲ្យសហគ្រាសក្នុងស្រុក និងក្រៅប្រទេសឱ្យបន្តរួមដំណើរ សហការនិងចែករំលែកផលប្រយោជន៍ ដើម្បីកសាងទីក្រុងហូជីមិញ ឱ្យក្លាយជាទីក្រុងធំអន្តរជាតិ ជាមជ្ឈមណ្ឌលសេដ្ឋកិច្ច ហិរញ្ញវត្ថុ វិទ្យាសាស្ត្រ និងបច្ចេកវិទ្យាដ៏ស្វាហាប់ និងច្នៃប្រឌិតនៃតំបន់។

យោងតាមផែនការ មជ្ឈមណ្ឌលហិរញ្ញវត្ថុអន្តរជាតិនៅទីក្រុងហូជីមិញនឹងត្រូវបានបញ្ចប់ក្នុងរយៈពេល ៥ ឆ្នាំ ជាមួយនឹងទុនវិនិយោគបឋមសរុបសម្រាប់​គម្រោងទាំងមូលដែលត្រូវបានប៉ាន់ប្រមាណប្រហែល ១៧២,០០០ ពាន់លានដុង (ស្មើនឹង ៧ ពាន់លានដុល្លារអាមេរិក)។ គម្រោងនេះត្រូវបានសាងសង់នៅសង្កាត់ Sai Gon, Ben Thanh និង Thu Thiem ជាមួយនឹងសកម្មភាពប្តូរប្រាក់បរទេស fintech ប្រតិបត្តិការឌីជីថល និង logistics ។ អគារដូចជា Saigon Trade Center, Saigon Tower, MPlaza, Techcombank, Prudential Headquarter... កំពុងមានទីស្នាក់ការកណ្តាលក្រុមហ៊ុនធានារ៉ាប់រង ហិរញ្ញវត្ថុ និងធនាគារ។ មិនយូរប៉ុន្មានទេ អគារមជ្ឈមណ្ឌលហិរញ្ញវត្ថុអន្តរជាតិ Saigon Marina ទើបបានដាក់ឲ្យប្រើប្រាស់ជាផ្លូវការនៅសង្កាត់ Sai Gon ទីក្រុងហូជីមិញ។ នេះគឺជាកន្លែងដែលប្រមូលផ្ដុំបញ្ញា ធនធានហិរញ្ញវត្ថុ និងបច្ចេកវិទ្យា តភ្ជាប់លំហូរសេដ្ឋកិច្ចសកល។

លើសពីនេះ គណៈកម្មាធិការប្រជាជនទីក្រុងបានអញ្ជើញតំណាងមជ្ឈមណ្ឌលហិរញ្ញវត្ថុអន្តរជាតិ Astana (Kazakhstan) មកពិភាក្សាអំពីកិច្ចសហប្រតិបត្តិការក្នុងការសាងសង់មជ្ឈមណ្ឌលហិរញ្ញវត្ថុអន្តរជាតិ។ ទីក្រុងក៏បានរៀបចំគណៈប្រតិភូទៅសិក្សាបទពិសោធន៍នៅមជ្ឈមណ្ឌលទីផ្សារ​សកលអាប៊ូដាប៊ី (អេមីរ៉ាតអារ៉ាប់រួម) ផ្សារភាគហ៊ុន Nasdaq (សហរដ្ឋអាមេរិក) និងបានចុះហត្ថលេខាលើអនុស្សរណៈនៃការយោគយល់គ្នាជាមួយអង្គភាពទាំងនេះ។

ដោយមានការត្រៀមរៀបចំយ៉ាងហ្មត់ចត់ លោក Tran Luu Quang លេខាគណៈកម្មាធិការបក្សទីក្រុងហូជីមិញ  បានបញ្ជាក់ថា៖ ទីក្រុងកំពុងលើកកម្ពស់តួនាទីនាំមុខ បង្កើនកម្លាំងចលករសម្រាប់ការអភិវឌ្ឍដល់តំបន់នានា បង្កើតលំហសេដ្ឋកិច្ចដែលមានលក្ខណៈព្រមៗគ្នា និងមានប្រសិទ្ធភាពជាងមុន។ ក្នុងបរិបទដែលមជ្ឈមណ្ឌលហិរញ្ញវត្ថុអន្តរជាតិដែលកំពុងត្រូវបានបង្កើតឡើង អាទិភាពកំពូលរបស់ទីក្រុងគឺបង្កើតលក្ខខណ្ឌអំណោយផលបំផុតសម្រាប់វិនិយោគិន។ ការបង្កើតមជ្ឈមណ្ឌលហិរញ្ញវត្ថុទំនើប តម្លាភាពនិងសមាសហរណកម្មនឹងពង្រីកឱកាសទាក់ទាញទីផ្សារទុនវិនិយោគនិងសេវាកម្មហិរញ្ញវត្ថុ ដោយហេតុនេះជួយឱ្យវិនិយោគិនមានអារម្មណ៍សុវត្ថិភាពក្នុងការអនុវត្តគម្រោង និងពង្រីកប្រតិបត្តិការនៅក្នុងទីក្រុង៕

បកប្រែដោយ Pham Diep