ការបង្កើតមូលនិធិជួយគាំទ្រសកម្មភាពបោសសម្អាតគ្រាប់បែក និងមីននៅវៀតណាម
កប.អនឡាញ - នាថ្ងៃទី ២២ ខែកញ្ញា (ម៉ោងនៅទីក្រុងហាណូយ) នៅទីក្រុង Washington D.C. (សហរដ្ឋអាមេរិក) បានប្រព្រឹត្ដទៅពិធីបង្កើតមូលនិធិសម្រាប់សកម្មភាពបោសសម្អាតគ្រាប់បែក និងមីននៅវៀតណាមដែលរៀបចំដោយគម្រោង RENEW តាមទម្រង់ចូលរួមផ្ទាល់ និងតាមប្រព័ន្ធវីដេអូ។ អញ្ជើញចូលរួមពិធីមានលោក Tim Rieser ជំនួយការគោលនយោបាយការបរទេសជាន់ខ្ពស់របស់សមាជិកព្រឹទ្ធសភា Patrick Leahy (ប្រធានគណៈកម្មាធិការថវិកាព្រឹទ្ធសភាអាមេរិក) និងតំណាងទីភ្នាក់ងារអាមេរិកសម្រាប់ការអភិវឌ្ឍន៍អន្តរជាតិ (USAID)។
ថ្លែងក្នុងពិធីនេះ លោក Chuck Searcy សហស្ថាបនិក និងជាប្រធានគម្រោង RENEW ហើយក៏ជាអតីតយោធិនអាមេរិក បានលើកឡើងពីសមិទ្ធិផលរបស់គម្រោងបន្ទាប់ពីរយៈពេលជាង ២០ ឆ្នាំដែលដំណើរការនៅខេត្ត Quang Tri នៃប្រទេស វៀតណាម និងសង្កត់ធ្ងន់លើភាពជោគជ័យនៃគម្រោង ដោយមានការរួមចំណែកដ៏ធំធេងពីម្ចាស់ជំនួយនិងអ្នកគាំទ្រវៀតណាម។ លោកបានឲ្យដឹងថា ព្រឹត្តិការណ៍នេះគឺសំដៅបង្កើតមូលនិធិសម្រាប់បង្កើនសកម្មភាពបោសសម្អាតគ្រាប់បែក និងមីននៅខេត្ត Quang Ngai ដែលជាមូលដ្ឋានបន្សល់ទុកគ្រាប់បែក មីន និងយុទ្ធភ័ណ្ឌមិនទាន់ផ្ទុះជាច្រើននៅសេសសល់ដែលកំពុងគំរាមកំហែងដល់សុវត្ថិភាពរបស់ប្រជាជន។
ការរៃអង្គាសថវិកាបានសម្រេចគោលដៅរៃអង្គាសប្រាក់ចំនួន ១០០,០០០ ដុល្លារអាមេរិកសម្រាប់សកម្មភាពបោសសម្អាតគ្រាប់បែក និងមីននៅខេត្ត Quang Ngai ហើយទន្ទឹមនឹងនោះបានបង្កើតលក្ខខណ្ឌអំណោយផលដើម្បីផ្សព្វផ្សាយសារមនុស្សធម៌អំពីការជំនះផលវិបាកនៃសង្គ្រាមវៀតណាម ពង្រឹងបន្ថែមទៀតនូវទំនាក់ទំនងទ្វេភាគីវៀតណាម-អាមេរិក៕
បកប្រែដោយ Pham Diep