អាណិកជនវៀតណាមនៅសាធារណរដ្ឋឆែកជួយឧបត្ថម្ភនូវថវិកា ៥០០ លានដុង ជូនមូលនិធិវ៉ាក់សាំង Covid-19
កប.អនឡាញ- នាព្រឹកថ្ងៃទី ១១ មិថុនា គណៈកម្មាធិការរដ្ឋទទួលបន្ទុកអាណិកជនវៀតណាមនៃក្រសួងការបរទេសវៀតណាមបានរៀបចំពិធីទទួលថវិការៃអង្គាសដោយអាណិកជនវៀតណាមនៅសាធារណរដ្ឋឆែក។
នៅក្នុងពិធីនេះ លោក Nguyen Van Tam អនុប្រធានសមាគមន៍អាណិកជនវៀតណាមប្រចាំសាធារណរដ្ឋឆែក និងលោកស្រី Ta Pham Bich Thuy សមាជិកាអចិន្ត្រៃយ៍នៃគណៈកម្មាធិការសមាគមន៍អាណិកជនវៀតណាមនៅសាធារណរដ្ឋឆែក និងជាប្រធានសមាគមន៍នារីវៀតណាមនៅសាធារណរដ្ឋឆែកបានផ្តល់ថវិកា ៥០០ លានដុងដើម្បីជួយគាំទ្រដល់មូលនិធិវ៉ាក់សាំង Covid-19។
នៅក្នុងពិធីនេះ អនុរដ្ឋមន្រ្តីក្រសួងការបរទេស និងជាប្រធានគណៈកម្មាធិការទទួលបន្ទុកអាណិកជនវៀតណាម លោក Pham Quang Hieu បានថ្លែងអំណរគុណចំពោះមនោសញ្ចេតនាល្អ ការគាំទ្រ ការចែករំលែកពីប្រជាជនវៀតណាមនៅសាធារណរដ្ឋឆែកបានពួតដៃជាមួយជនរួមជាតិក្នុងការប្រយុទ្ធប្រឆាំងនឹងជំងឺរាតត្បាត Covid-19។
លោក Nguyen Van Tam បានមានប្រសាសន៍ថា អំណោយរបស់បងប្អូនប្រជាជននៅសាធារណរដ្ឋឆែកនេះ ទោះបីជាមានតម្លៃមិនធំធេងក៏ដោយ ក៏វាបង្ហាញពីមនោសញ្ចេតនា និងការទទួលខុសត្រូវរបស់អាណិកជនចំពោះប្រទេសជាតិ៕
បកប្រែដោយ Pham Diep