វៀតណាមបញ្ជូនពលរដ្ឋពីសហរដ្ឋអាមេរិក និងជប៉ុន វិលត្រឡប់មកប្រទេសវិញប្រកបដោយសុវត្ថិភាព
កប.អនឡាញ - នៅថ្ងៃទី ៥ និងថ្ងៃទី ៦ ខែសីហា ស្ថាប័នមានសមត្ថកិច្ចវៀតណាម ស្ថានតំណាងវៀតណាមប្រចាំនៅសហរដ្ឋអាមេរិក និងក្រុមហ៊ុនអាកាសចរណ៍ជាតិវៀតណាម បានសហការជាមួយស្ថាប័នមានសមត្ថកិច្ចសហរដ្ឋអាមេរិករៀបចំជើងហោះហើរដើម្បីបញ្ជូនពលរដ្ឋវៀតណាមជិត ៣៥០ នាក់ ពីសហរដ្ឋអាមេរិក វិលត្រឡប់មកប្រទេសវិញ ប្រកបដោយសុវត្ថិភាព។
|
|
ស្ថានអគ្គកុងស៊ុលវៀតណាមប្រចាំនៅហ៊ូស្តុន សហរដ្ឋអាមេរិកជួយពលរដ្ឋបំពេញបែបបទនៅអាកាសយានដ្ឋាន (រូបថត៖ Vieetnam&Thegioi) |
អ្នកដំណើរទាំងអស់នេះរួមមាន ក្មេងៗ មនុស្សចាស់ អ្នកឈឺ ស្ដ្រីមានផ្ទៃពោះ និស្សិតគ្មានទីស្នាក់នៅដោយសារការបិទអន្តេវាសិកដ្ឋាន និងករណីដែលជួបការលំបាកផ្សេងទៀត។
ដោយមានគោលដៅធានាសុខភាពដល់ពលរដ្ឋ និងទប់ស្កាត់ការរីករាលដាលនៃជំងឺរាតត្បាត ក្រុមហ៊ុនអាកាសចរណ៍ បានចាត់វិធានការយ៉ាងម៉ឺងម៉ាត់អំពីសន្តិសុខ សុវត្ថិភាព និងអនាម័យក្នុងពេលហោះហើរ។ បន្ទាប់ពីចុះចតនៅអាកាសយានដ្ឋានអន្តរជាតិ Noi Bai នៃទីក្រុងហាណូយ ជាភ្លាមៗ ពលរដ្ឋទាំងនេះត្រូវបានពិនិត្យសុខភាព និងដាក់ឲ្យនៅកន្លែងដាច់ដោយឡែកពីគេតាមការកំណត់។
គួររំលឹកថា នៅថ្ងៃទី ៥ ខែសីហា ស្ថាប័នមានសមត្ថកិច្ចវៀតណាម ស្ថានទូតវៀតណាមប្រចាំនៅជប៉ុននិងក្រុមហ៊ុនអាកាសចរណ៍ VietJet វៀតណាម បានសហការជាមួយស្ថាប័នមានសមត្ថកិច្ចជប៉ុនរៀបចំជើងហោះដើម្បីបញ្ជូនពលរដ្ឋចំនួន ២២០ នាក់ពីប្រទេសជប៉ុន វិលប្រឡប់មកប្រទេសវិញ។ បន្ទាប់ពីចុះចតនៅអាកាសយានដ្ឋានអន្តរជាតិ Cam Ranh ខេត្ដ Khanh Hoa ភ្លាមៗ ពលរដ្ឋទាំងនេះត្រូវបានពិនិត្យសុខភាពនិងដាក់ឲ្យនៅកន្លែងដាច់ដោយឡែកពីគេតាមការកំណត់៕
បកប្រែដោយ Pham Diep