ការបង្កើតកម្មវិធីទូរស័ព្ទដើម្បីជួយគាំទ្រពលករវៀតណាមនៅឯបរទេស
កប.អនឡាញ - នៅរសៀលថ្ងៃទី ២៤ ខែកុម្ភៈ ក្រសួងការងារ យុទ្ធជនពិការ និងសង្គមកិច្ច ឲ្យដឹងថាខ្លួនកំពុងអនុវត្តវិធានការដំណោះស្រាយ និងផែនការជាច្រើន ដើម្បីធានាបាននូវអត្ថប្រយោជន៍ជាអតិបរមាសម្រាប់ពលករវៀតណាមនៅឯបរទេស ជាពិសេសនៅប្រទេសកូរ៉េខាងត្បូង ជប៉ុន តៃវ៉ាន់(ចិន) ក្នុងករណីជម្ងឺ COVID-១៩ ផ្ទុះឡើងនៅប្រទេស និងតំបន់ដែនដីទាំងនេះ។
គួរឲ្យកត់សម្គាល់ថា ក្រសួងការងារ យុទ្ធជនពិការ និងសង្គមកិច្ចបានបង្កើតកម្មវិធីទូរស័ព្ទសម្រាប់ជួយគាំទ្រជាបន្ទាន់ដល់ពលករវៀតណាមនៅឯបរទេស ជាពិសេសនៅកូរ៉េខាងត្បូង និងជប៉ុន។
ក្រសួងការងារ យុទ្ធជនពិការ និងសង្គមកិច្ច ធ្វើស្ថិតិយ៉ាងជាក់លាក់លើចំនួនពលករ និងអ្នកជំនាញបរទេសដែលកំពុងបំពេញការងារនៅតាមមូលដ្ឋាននីមួយៗ ជាពិសេសចំនួនពលករ និងអ្នកជំនាញដែលនឹងវិលត្រឡប់មកវៀតណាមវិញនាពេលខាងមុខនេះ។ បច្ចុប្បន្ននេះ ក្រសួងកំពុងធ្វើការជាមួយស្ថាប័នពាក់ព័ន្ធនានាដើម្បីចាត់វិធានការដាក់ឲ្យនៅដាច់ដោយឡែក ឬព្យាបាលជម្ងឺសម្រាប់ពលករនិងអ្នកជំនាញបរទេសដែលនឹងត្រឡប់មកវៀតណាមវិញ រួមទាំងវិធានការនានាសម្រាប់ជួយគាំទ្រសហគ្រាសក្នុងករណីកង្វះពលករ និងអ្នកជំនាញបរទេស ក៏ដូចជាផ្អាកការផ្តល់អាជ្ញាប័ណ្ណសំរាប់ពលករបរទេសក្នុងករណីមានការផ្ទុះឡើងនូវជម្ងឺឆ្លងនេះនៅឯប្រទេសជាច្រើន៕
បកប្រែដោយ Duy Hoan