ជំនួបប្រាស្រ័យមិត្តភាពការពារជាតិព្រំដែនវៀតណាម-កម្ពុជាលើកទី២ ចាប់ផ្តើមនៅខេត្តស្វាយរៀង

១៤ វិច្ឆិកា ២០២៥ (10:25)

កប.អនឡាញ - បន្ទាប់ពីបញ្ចប់សកម្មភាពនានានៅខេត្ត Tay Ninh នៅព្រឹកថ្ងៃទី១៤ ខែវិច្ឆិកា ជំនួបប្រាស្រ័យមិត្តភាពការពារជាតិព្រំដែនវៀតណាម-កម្ពុជាលើកទី២ បានបន្តជាមួយនឹងសកម្មភាពនានានៅខេត្តស្វាយរៀង ដោយចាប់ផ្តើមជាមួយនឹងពិធីទទួលបដិសណ្ឋារកិច្ចគណៈប្រតិភូវៀតណាមនៅច្រកទ្វារព្រំដែនអន្តរជាតិបាវិត។

គណៈប្រតិភូវៀតណាមដឹកនាំដោយលោកនាយឧត្តមសេនីយ៍ Phan Van Giang សមាជិកការិយាល័យនយោបាយ អនុលេខា នៃគណៈកម្មាធិការបក្សយោធាមជ្ឈិម រដ្ឋមន្ត្រីក្រសួងការពារប្រទេស។ ពិធីទទួលបដិសណ្ឋារកិច្ចត្រូវបានធ្វើឡើងយ៉ាងឱឡារិក ក្រោមអធិបតីភាពរបស់លោកនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា។

ពិធីជូនដំណើរគណៈប្រតិភូវៀតណាមទៅកាន់កម្ពុជា ដើម្បីចូលរួមសកម្មភាពនានាក្នុងក្របខ័ណ្ឌនៃជំនួបប្រាស្រ័យមិត្តភាព

ជំនួបប្រាស្រ័យមិត្តភាពការពារជាតិព្រំដែនវៀតណាម-កម្ពុជាលើកទី២ បានធ្វើឡើងចាប់ពីថ្ងៃទី១៣ ដល់ថ្ងៃទី១៤ ខែវិច្ឆិកា នៅខេត្ត Tay Ninh ប្រទេសវៀតណាម និងខេត្តស្វាយរៀង ប្រទេសកម្ពុជា។ ម្សិលមិញ (ថ្ងៃទី១៣ ខែវិច្ឆិកា) គណៈប្រតិភូនៃប្រទេសទាំងពីរបានចូលរួមក្នុងសកម្មភាពដ៏មានអត្ថន័យជាច្រើននៅក្នុងខេត្ត Tay Ninh ដូចជា៖ ដាំដើមឈើមិត្តភាពនៅច្រកទ្វារព្រំដែនអន្តរជាតិ Moc Bai ទស្សនាលំហាត់សមពេទ្យយោធារួមគ្នារវាងកងទ័ពប្រទេសទាំងពីរ ចូលរួមពិធីសម្ពោធអគារសម្រាកស្នាក់នៅរបស់កុមារនៅសាលាបឋមសិក្សា Ben Cau (ភូមិ Thuan Lam ឃុំ Ben Cau) ចូលរួមពិធីចងសម្ព័ន្ធមេត្រីភាពនៅសងខាងព្រំដែនរវាងភូមិ Long Cuong (ឃុំ Long Thuan ខេត្ត Tay Ninh) និងភូមិអូរតាមោ ឃុំមនោរម្យ ស្រុកស្វាយទាប ខេត្តស្វាយរៀង និងជួបពិភាក្សា ចុះហត្ថលេខា និងធ្វើជាសាក្សីនៃការផ្លាស់ប្តូរឯកសារសហប្រតិបត្តិការ។

រដ្ឋមន្ត្រីក្រសួងការពារជាតិកម្ពុជាទទួលស្វាគមន៍រដ្ឋមន្ត្រីក្រសួងការពារប្រទេសវៀតណាមនៅច្រកទ្វារព្រំដែនអន្តរជាតិបាវិត

លោកនាយឧត្តមសេនីយ៍ ទៀ សីហា ឧទ្ទេសនាមជូនលោកនាយឧត្តមសេនីយ៍ Phan Van Giang អំពីសមាសភាពនៃភាគីកម្ពុជា

លោកនាយឧត្តមសេនីយ៍ ទៀ សីហា ទទួលស្វាគមន៍លោកនាយឧត្តមសេនីយ៍ Phan Van Giang និងគណៈប្រតិភូវៀតណាមដែលអញ្ជើញចូលរួមជំនួបប្រាស្រ័យ

ជំនួបប្រាស្រ័យមិត្តភាពការពារជាតិព្រំដែនវៀតណាម-កម្ពុជាលើកទីពីរ គឺជាព្រឹត្តិការណ៍ និងសកម្មភាពការបរទេសការពារជាតិដ៏សំខាន់មួយក្នុងឆ្នាំ២០២៥ ដែលមានអត្ថន័យក្នុងទិដ្ឋភាពជាច្រើន ដែលរួមចំណែកដោយផ្ទាល់ដល់ការពង្រឹងទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការគ្រប់ជ្រុងជ្រោយរវាងវៀតណាម និងកម្ពុជា ជាការអនុវត្តជាក់ស្តែងនូវខ្លឹមសារដែលបានព្រមព្រៀងគ្នាដោយថ្នាក់ដឹកនាំជាន់ខ្ពស់នៃប្រទេសទាំងពីរនៅក្នុងកិច្ចប្រជុំកំពូលរវាងការិយាល័យនយោបាយនៃបក្សកុម្មុយនិស្តវៀតណាម និងគណៈអចិន្រ្តៃយ៍គណៈកម្មាធិការកណ្តាលគណបក្សប្រជាជនកម្ពុជាកាលពីខែកុម្ភៈ ឆ្នាំ២០២៥។ ក្នុងពេលជាមួយគ្នានេះ តាមរយៈជំនួបប្រាស្រ័យនេះនឹងបន្តពង្រឹងមិត្តភាព សាមគ្គីភាព និងលើកកម្ពស់កិច្ចសហប្រតិបត្តិការជាក់ស្តែង និងមានប្រសិទ្ធភាពរវាងកងកម្លាំងគ្រប់គ្រងការពារព្រំដែន អាជ្ញាធរមូលដ្ឋាន និងប្រជាជននៅតំបន់ព្រំដែននៃប្រទេសទាំងពីរ រួមចំណែកដល់ការកសាងព្រំដែនវៀតណាម-កម្ពុជា ប្រកបដោយសន្តិភាព មិត្តភាព ស្ថិរភាព សហប្រតិបត្តិការ និងអភិវឌ្ឍ។