បើកការតាំងពិព័រណ៍ ក្រោមចំណងជើង “សាមគ្គីភាព មិត្ដភាព វៀតណាម-កម្ពុជា”

អញ្ជើញចូលរួមនិងកាត់ខ្សែបូរសម្ពោធពិព័រណ៍មានលោកឧត្តមសេនីយ៍ទោ Trinh Van Quyet អនុប្រធានអគ្គស្នងការនយោបាយ។ 

ភាគីកម្ពុជាមានលោក ចាយ ណាវុធ ឯកអគ្គរាជទូតវិសាមញ្ញនិងពេញសមត្ថភាពនៃព្រះរាជាណាចក្រកម្ពុជាប្រចាំវៀតណាម។

ប្រតិភូទាំងឡាយចូលរួមកាត់ខ្សែបូរសម្ពោធពិព័រណ៍

ថ្លែងមតិក្នុងពិធីបើកការតាំងពិព័រណ៌នេះ លោកវរសេនីយ៍ឯកបំរុង Le Vu Huy នាយកសារមន្ទីរប្រវត្តិសាស្ត្រយោធាវៀតណាមបានអះអាងថា៖ វៀតណាមនិងកម្ពុជាជាប្រទេសជិតខាងទាំងពីរដែលមានទំនាក់ទំនងមិត្ដភាពជាប្រពៃណីនិងស្ថិតស្ថេរយូរអង្វែង។ កាលពីថ្ងៃទី ២៤ ខែមិថុនា ឆ្នាំ ១៩៦៧ ៥៥ មក វៀតណាមនិងកម្ពុជាបានបង្កើតទំនាក់ទំនងការទូតជាផ្លូវការ បើកទំព័រប្រវត្តិសាស្ត្រថ្មីក្នុងទំនាក់ទំនងរវាងប្រទេសទាំងពីរ។ ដោយឆ្លងកាត់ការឡើងចុះនៃប្រវត្តិសាស្ត្រ ទំនាក់ទំនងនេះកាន់តែមានភាពស្និទ្ធស្នាល ស្អិតរមួត និងត្រូវបានពូនជ្រំដោយសាច់ស្រស់ឈាមស្រស់របស់ថ្នាក់ដឹកនាំគ្រប់ជាន់ថ្នាក់និងប្រជាជននៃប្រទេសទាំងពីរ ហើយបានក្លាយទៅជាទ្រព្យសម្បត្តិរួមដែលមិនអាចកាត់ថ្លៃរបស់ប្រជាជាតិទាំងពីរ។

ទិដ្ឋភាពនៃពិធីបើកការ​តាំងពិព័រណ៌

ការ​តាំងពិព័រណ៌ ក្រោមចំណងជើងថា “សាមគ្គីភាព មិត្តភាពវៀតណាម - កម្ពុជា” បានបង្ហាញនូវរូបថត វត្ថុ ឯកសារ និងសៀវភៅជាង ២០០ ដែលឆ្លុះបញ្ចាំងពីយុទ្ធសាមគ្គីភាព ការតស៊ូរបស់ប្រទេសទាំងពីរក្នុងការប្រយុទ្ធប្រឆាំងនឹងអាណានិគមនិយមបារាំង (ដំណាក់កាលឆ្នាំ ១៩៤៥ ដល់ឆ្នាំ១៩៥៤) ; ប្រឆាំងនឹងចក្រពត្តិនិយមអាមេរិក (ដំណាក់កាលឆ្នាំ ១៩៥៤ ដល់ឆ្នាំ ១៩៧៥); កងទ័ពស្ម័គ្រចិត្តវៀតណាមដែលជួយកងកម្លាំងបដិវត្តន៍ និងប្រជាជនកម្ពុជាផ្តួលរំលំពួក ប៉ុល ពត  អៀង-សារី ឲ្យរួចផុតពីរបបប្រល័យពូជសាសន៍ និងធ្វើឲ្យប្រទេសកម្ពុជារស់ឡើងវិញ (ដំណាក់កាលឆ្នាំ ១៩៧៥ ដល់ឆ្នាំ ១៩៨៩); កិច្ចសហប្រតិបត្តិការលើគ្រប់ជ្រុងជ្រោយនិងអភិវឌ្ឍន៍រួមគ្នា  តាមពាក្យស្លោក “អ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការលើគ្រប់ជ្រុងជ្រោយ ស្ថិតស្ថេរយូរអង្វែង”។

ប្រតិភូទាំងឡាយចូលរួមទស្សនាការ​តាំងពិព័រណ៌

រូបថត វត្ថុ ឯកសារ និងសៀវភៅទាំងអស់ដែលបានតាំងបង្ហាញក្នុងពិព័រណ៌គឺជាឯកសារដ៏មានតម្លៃដែលបានរក្សាទុកនៅសារមន្ទីរប្រវត្តិសាស្ត្រយោធាវៀតណាម រួមទាំងវត្ថុនិងឯកសារថ្មីដែលទើបបានប្រមូលផ្ដុំបានផងដែរ។

ការតាំងពិព័រណ៍នេះ មានប្រធានបទធំៗចំនួនពីរគឺ៖ សាមគ្គីភាព ស្អិតរមួតវៀតណាម-កម្ពុជា និងកិច្ចសហប្រតិបត្តិការដើម្បីការអភិវឌ្ឍន៍រួមគ្នា។  ការតាំងពិព័រណ៍បានបង្ហាញជូនដល់សាធារណជន កម្មាភិបាល យុទ្ធជន និងប្រជាជនអំពីអត្ថន័យប្រវត្តិសាស្ត្ររបស់ប្រជាជាតិទាំងពីរក្នុងការតស៊ូ ការពារសន្តិភាព ឯករាជ្យភាព បង្រួបបង្រួមជាតិនិងបូរណភាពទឹកដី។ រួមទាំងស្មារតីសាមគ្គីភាពក្នុងការប្រយុទ្ធ មិត្តភាព និងកិច្ចសហប្រតិបត្តិការលើគ្រប់ជ្រុងជ្រោយរវាងវៀតណាមនិងកម្ពុជា៕

បកប្រែដោយ Pham Diep