ការផ្តល់ជំនួយជាគ្រឿងឧបភោគបរិភោគ និងសំភារៈបរិក្ខារពេទ្យជូនអាណិកជនវៀតណាមនៅកម្ពុជា ដើម្បីបង្ការ និងប្រយុទ្ធប្រឆាំងនឹងជំងឺរាតត្បាត Covid-19
កប.អនឡាញ - នារសៀលថ្ងៃទី ៤ ខែឧសភា នៅច្រកទ្វារព្រំដែនអន្តរជាតិ Le Thanh (ស្រុក Duc Co ខេត្ត Gia Lai) មន្ទីរកិច្ចការបរទេស សហការជាមួយគណៈកម្មាធិការរណសិរ្សមាតុភូមិវៀតណាមប្រចាំខេត្ត បញ្ជាការដ្ឋានកងទ័ពការពារព្រំដែនខេត្ត គណៈគ្រប់គ្រងតំបន់សេដ្ឋកិច្ចខេត្ត រួមជាមួយសម្ព័ន្ធអង្គការមិត្តភាពខេត្ត និងមន្ទីរសុខាភិបាលខេត្ត Gia Lai បានប្រគល់គ្រឿងឧបភោគបរិភោគ និងសំភារៈបរិក្ខារពេទ្យជូនអាណិកជនវៀតណាមនៅខេត្តរតនគិរី និងស្ទឹងត្រែង។
តាមរយៈសមាគមខ្មែរ - វៀតណាមសាខាខេត្តរតនគិរី និងសាខាខេត្តស្ទឹងត្រែង គណៈប្រតិភូរបស់ខេត្ត Gia Lai បានប្រគល់ទឹកសម្លាប់មេរោគចំនួន ២,១០០ ដប ម៉ាស់សុខាភិបាលចំនួន ៥០០ ប្រអប់ គ្រឿងឧបភោគបរិភោគ និងសំភារៈបរិក្ខាពេទ្យគិតជាទឹកប្រាក់ជាង ១៨៥ លានដុង ជូនអាណិកជនវៀតណាមចំនួន ៨៩១ គ្រួសារនៅខេត្តទាំងពីរ និងអាណិកជនវៀតណាមក្រីក្រចំនួន ២២៥ គ្រួសារនៅខេត្តមួយចំនួន។
|
|
ពិធីប្រគល់គ្រឿងឧបភោគបរិភោគ និងសំភារៈបរិក្ខាពេទ្យជូនអាណិកជនវៀតណាមនៅកម្ពុជា (រូបថត៖ nhandan.com.vn) |
ជំនួសមុខគណៈប្រតិភូ លោក Do Le Nam អនុប្រធានមន្ទីរកិច្ចការបរទេសខេត្ត Gia Lai បានពាំនាំការផ្ដាំផ្ញើសួរសុខទុក្ខ និងចែករំលែកនូវការលំបាកដែលអាណិកជនវៀតណាមរស់នៅខេត្តរតនគិរី និងស្ទឹងត្រែង កំពុងប្រឈមនឹងក្នុងបរិបទការវិវឌ្ឍដ៏ស្មុគស្មាញនៃជំងឺរាតត្បាត Covid-19។ លោកបានរំពឹងថា បងប្អូនអាណិកជនវៀតណាមនឹងខិតខំប្រឹងប្រែងអនុវត្តយ៉ាងម៉ឺងម៉ាត់នូវវិធានការបង្ការ និងប្រយុទ្ធប្រឆាំងនឹងជំងឺរាតត្បាត ស្របតាមបទបញ្ជារបស់ប្រទេសសាមី ដើម្បីធានាសុខភាព រួមគ្នាជំនះពុះពារគ្រាលំបាកនេះ។
ក្នុងឱកាសនេះដែរ គណៈកម្មាធិការរណសិរ្សមាតុភូមិវៀតណាមប្រចាំខេត្ត បានប្រគល់អំណោយដល់ប៉ុស្តិ៍ការពារព្រំដែនច្រកទ្វារព្រំដែនអន្តរជាតិ Le Thanh (ស្រុក Duc Co) និងប៉ុស្តិ៍នគរបាលច្រកទ្វារព្រំដែនអន្តរជាតិអូរយ៉ាដាវ រួមមានម៉ាស់ចំនួន ២,៥០០ ប្រអប់ និងទឹកថ្នាំលាងដៃដើម្បីបង្ការ និងប្រយុទ្ធប្រឆាំងនឹងជំងឺរាតត្បាត Covid-19៕
បកប្រែដោយ Huyen Trang