ជំរុញកិច្ចសហប្រតិបត្តិការទ្វេភាគីលើវិស័យការពារជាតិ រវាងវៀតណាម និងបណ្តាប្រទេសអាស៊ាន

លោកនាយឧត្តមសេនីយ៍ Nguyen Tan Cuong និងលោកឧត្តមសេនីយ៍ឯក Khamliang Outhakaysone

ក្នុងជំនួបជាមួយលោកឧត្តមសេនីយ៍ឯក Khamliang Outhakaysone រដ្ឋមន្ត្រីក្រសួងការពារប្រទេសឡាវ លោកនាយឧត្តមសេនីយ៍ Nguyen Tan Cuong សង្ឃឹមថា ដោយផ្អែកលើពិធីសាស្តីពីកិច្ចសហប្រតិបត្តិការលើវិស័យការពារជាតិ ដំណាក់កាល ២០២៥-២០២៩ ផែនការសហប្រតិបត្តិការឆ្នាំ ២០២៥ និងទស្សនៈរួមរវាងថ្នាក់ដឹកនាំជាន់ខ្ពស់នៃប្រទេសទាំងពីរ ភាគីទាំងពីរនឹងបន្តផ្តោតលើការផ្លាស់ប្តូរគណៈប្រតិភូគ្រប់លំដាប់ថ្នាក់ ការរក្សាប្រកបដោយប្រសិទ្ធភាពនូវកិច្ចប្រជុំប្រចាំឆ្នាំរវាងរដ្ឋមន្ត្រីក្រសួងការពារប្រទេសទាំង៣ វៀតណាម-ឡាវ-កម្ពុជា សមយុទ្ធរួមរវាងកងទ័ពនៃប្រទេសទាំង៣ វៀតណាម-ឡាវ-កម្ពុជានៅឡាវ និងកិច្ចសន្ទនាគោលនយោបាយការពារជាតិវៀតណាម-ឡាវលើកទី៥... លោកឧត្តមសេនីយ៍ឯក Khamliang Outhakaysone បានវាយតម្លៃថា កិច្ចសហប្រតិបត្តិការលើវិស័យការពារជាតិឡាវ-វៀតណាមនាពេលកន្លងមកនេះ ទទួលបានលទ្ធផលយ៉ាងធំធេង ដែលសក្តិសមជាសសរស្តម្ភដ៏សំខាន់មួយនៃទំនាក់ទំនងទ្វេភាគី។ លោកឧត្តមសេនីយ៍ឯក Khamliang Outhakaysone បានសម្តែងនូវជំនឿថា កិច្ចសហប្រតិបត្តិការរវាងកងទ័ពទាំងពីរនឹងកាន់តែរឹងមាំ និងបន្តមានការអភិវឌ្ឍកាន់តែខ្លាំង។

ក្នុងជំនួបជាមួយលោកនាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា លោកនាយឧត្តមសេនីយ៍ Nguyen Tan Cuong បានអះអាងថា ទំនាក់ទំនងកិច្ចសហប្រតិបត្តិការលើវិស័យការពារជាតិវៀតណាម-កម្ពុជានាពេលកន្លងមកនេះ ទទួលបានលទ្ធផលវិជ្ជមាន និងលេចធ្លោជាច្រើនក្នុងការផ្លាស់ប្តូរគណៈប្រតិភូគ្រប់ជាន់ថ្នាក់ អប់រំ និងផ្សព្វផ្សាយអំពីទំនាក់ទំនងសាមគ្គីភាពរវាងប្រទេសទាំងពីរ និងកងទ័ពទាំងពីរ រក្សាប្រកបដោយប្រសិទ្ធភាពនូវយន្តការសន្ទនាគោលនយោបាយការពារជាតិវៀតណាម-កម្ពុជា និងយន្តការពិគ្រោះយោបល់ កិច្ចសហប្រតិបត្តិការក្នុងការបណ្តុះបណ្តាលធនធានមនុស្ស ការគ្រប់គ្រងនិងការការពារព្រំដែន ការផ្លាស់ប្តូររវាងនាយទាហានវ័យក្មេង និងរវាងអ្នកដឹកនាំវ័យក្មេងនៃកងទ័ពទាំងពីរ...

លោកនាយឧត្តមសេនីយ៍ Nguyen Tan Cuong ជួបពិភាក្សាទ្វេភាគីជាមួយលោកនាយឧត្តមសេនីយ៍ ទៀ សីហា

លោកនាយឧត្តមសេនីយ៍ ទៀ សីហា វាយតំលៃកិច្ចសហប្រតិបត្តិការបណ្តុះបណ្តាល ការស្វែងរក ប្រមូល និងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្តវៀតណាម និងអ្នកជំនាញដែលពលីជីវិតក្នុងសម័យសង្គ្រាម... ដែលបន្តត្រូវបានជម្រុញដោយភាគីទាំងពីរ ហើយសម្រេចបាននូវលទ្ធផលសំខាន់ៗជាច្រើន។ លោកនាយឧត្តមសេនីយ៍ ទៀ សីហា ស្នើឲ្យវៀតណាមគាំទ្រកម្ពុជាក្នុងតួនាទីជាសហប្រធាននៃក្រុមអ្នកជំនាញ ADMM+ ស្តីពីសន្តិសុខតាមអ៊ីនធឺណិតជាមួយប្រទេសអូស្ត្រាលីក្នុងវដ្ត ២០២៤-២០២៧។

ក្នុងជំនួបជាមួយលោក Sjafrie Sjamsoeddin រដ្ឋមន្ត្រីក្រសួងការពារជាតិឥណ្ឌូនេស៊ី លោកនាយឧត្តមសេនីយ៍ Nguyen Tan Cuong បានបញ្ជាក់ពីការគាំទ្រចំពោះប្រទេសឥណ្ឌូនេស៊ីក្នុងតួនាទីជាសហប្រធានក្រុមអ្នកជំនាញ ADMM+ ស្តីពីពេទ្យយោធាជាមួយសហរដ្ឋអាមេរិកវដ្ដ ២០២៤-២០២៧។ លោកនាយឧត្តមសេនីយ៍ Nguyen Tan Cuong បានស្នើថា ភាគីទាំងពីរផ្តោតសំខាន់លើការជំរុញការផ្លាស់ប្តូរគណៈប្រតិភូគ្រប់លំដាប់ថ្នាក់ យន្តការពិគ្រោះយោបល់ និងកិច្ចសន្ទនា ការបណ្ដុះបណ្ដាល។ល។ លោករដ្ឋមន្ត្រី Sjafrie Sjamsoeddin បានវាយតម្លៃខ្ពស់ចំពោះទំនាក់ទំនងទ្វេភាគីលើវិស័យការពារជាតិនាពេលកន្លងមក ព្រមទាំងស្នើឲ្យភាគីទាំងពីរសិក្សា និងពង្រីកកិច្ចសហប្រតិបត្តិការលើវិស័យសក្តានុពល រួមទាំងឧស្សាហកម្មការពារជាតិផងដែរ។

លោកនាយឧត្តមសេនីយ៍ Nguyen Tan Cuong ប្រគល់វត្ថុអនុស្សាវរីយ៍ជូនលោក Dato' Seri Mohamed Khaled bin Nordin

ក្នុងជំនួបជាមួយលោក Dato' Seri Mohamed Khaled bin Nordin រដ្ឋមន្ត្រីក្រសួងការពារប្រទេសម៉ាឡេស៊ី លោកនាយឧត្តមសេនីយ៍ Nguyen Tan Cuong បានសម្តែងនូវសេចក្តីរីករាយដោយបានមើលឃើញថា ទំនាក់ទំនងរវាងវៀតណាម និងម៉ាឡេស៊ីមានការអភិវឌ្ឍយ៉ាងល្អនាពេលកន្លងមកនេះ។ នាពេលខាងមុខ ភាគីទាំងពីរបានឯកភាពផ្តោតសំខាន់លើការជំរុញការអនុវត្តយន្តការសន្ទនាគោលនយោបាយការពារជាតិលើកទី១ ជំរុញការចុះហត្ថលេខាលើអនុស្សរណៈយោគយល់គ្នារវាងរដ្ឋាភិបាលទាំងពីរ ស្តីពីកិច្ចសហប្រតិបត្តិការក្នុងការអនុវត្តច្បាប់ ការស្វែងរក និងជួយសង្គ្រោះនៅសមុទ្រ កសាងកិច្ចព្រមព្រៀងស្ដីពីការបង្កើតយន្តការសហការយាមល្បាតនៅដែនសមុទ្រ និងបណ្តាញទំនាក់ទំនងរវាងកងទ័ពជើងទឹកទាំងពីរ។

សូមរំលឹកថា នៅខាងក្រៅសន្និសីទ ADMM ចង្អៀត លោកនាយឧត្តមសេនីយ៍ Nguyen Tan Cuong បានជួបជាមួយលោក Phumtham Wechayachai ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃ។ ភាគីទាំងពីរបានឯកភាពបន្តជំរុញកិច្ចសហប្រតិបត្តិការទ្វេភាគីលើវិស័យការពារជាតិ ដោយរក្សាប្រកបដោយប្រសិទ្ធភាពនូវយន្តការសន្ទនាគោលនយោបាយការពារជាតិ កិច្ចពិគ្រោះយោបល់ ការផ្លាស់ប្តូររវាងកងទ័ពនៃប្រទេសទាំងពីរ ការបណ្ដុះបណ្ដាល សន្តិសុខ និងសុវត្ថិភាពដែនសមុទ្រ; គាំទ្រគ្នាទៅវិញទៅមកនៅវេទិកាពហុភាគី ជាពិសេសក្នុងក្របខ័ណ្ឌនៃ ADMM និង ADMM+៕

បកប្រែដោយ Thanh Cong