គណៈប្រតិភូក្រសួងការពារប្រទេសវៀតណាមចូលរួមកិច្ចប្រជុំតាមប្រព័ន្ធវីដេអូដើម្បីពិភាក្សាលើការត្រៀមរៀបចំសម្រាប់ការប្រកួតកីឡាយោធាឆ្នាំ ២០២២
កប.អនឡាញ - នារសៀលថ្ងៃទី២២ ខែមេសា កិច្ចប្រជុំតាមប្រព័ន្ធវីដេអូលើកទី២ ដើម្បីពិភាក្សាអំពីការត្រៀមរៀបចំការប្រកួតកីឡាយោធាអន្តរជាតិឆ្នាំ២០២២ (Army Games 2022) ក្រោមអធិបតីភាពក្រសួងការពារជាតិសហព័ន្ធរុស្ស៊ីបានប្រព្រឹត្តទៅដោយមានការចូលរួមពីតំណាងក្រសួងការពារជាតិនៃបណ្តាប្រទេសដែលចូលរួមការប្រកួតនេះ។
គណៈប្រតិភូក្រសួងការពារប្រទេសវៀតណាមដឹកនាំដោយលោកឧត្តមសេនីយ៍ត្រី Pham Van Ty អនុប្រធាននាយកដ្ឋានជួយសង្គ្រោះបានចូលរួមកិច្ចប្រជុំនៅឯទីក្រុងហាណូយ។ អញ្ជើញចូលរួមក៏មានតំណាងអនុព័ន្ធយោធានៃសហព័ន្ធរុស្ស៊ីប្រចាំនៅវៀតណាមផងដែរ។
|
|
អត្តពលិកវៀតណាមចូលរួមប្រកួតវិញ្ញាសាតំបន់គ្រោះថ្នាក់នៅ Army Games 2021 (រូបថត៖ qdnd.vn) |
បន្ទាប់ពីស្តាប់តំណាងក្រសួងការពារជាតិនៃសហព័ន្ធរុស្ស៊ីជូនដំណឹងអំពីស្ថានភាពត្រៀមរៀបចំការប្រកួត និងមតិមួយចំនួននៃបណ្តាប្រទេសចូលរួម ប្រធានគណៈប្រតិភូវៀតណាមជូនដំណឹងអំពីការរៀបចំ និងការធានារបស់វៀតណាមសម្រាប់បណ្តាប្រទេសដែលចូលរួមប្រកួតវិញ្ញាសា "តំបន់គ្រោះថ្នាក់" ដែលវៀតណាមធ្វើជាម្ចាស់ផ្ទះ រួមទាំងការផ្ញើសំបុត្រអញ្ជើញបណ្តាប្រទេសចូលរួម និងជូនដំណឹងថាវៀតណាមគ្រោងនឹងចូលរួមប្រកួតវិញ្ញាសាចំនួន ១៤ ក្នុងព្រឹត្តិការណ៍ Army Games ឆ្នាំ២០២២។
គួររំលឹកថា នាថ្ងៃទី ១៥ មេសា ក្នុងកិច្ចប្រជុំពិគ្រោះយោបល់តាមប្រព័ន្ធវីដេអូជាមួយរុស្ស៊ី លោកឧត្តមសេនីយ៍ត្រី Do Dinh Thanh មេបញ្ជាការនៃបញ្ជការដ្ឋានរថក្រោះរថពាសដែក ប្រធានគណៈប្រតិភូក្រសួងការពារប្រទេសវៀតណាមក៏បានស្នើទៅភាគីរុស្ស៊ីលើបញ្ហាមួយចំនួនទាក់ទិននឹងក្រុមរថក្រោះរបស់វៀតណាមដើម្បីចូលរួមប្រកួតវិញ្ញាសា "រថក្រោះធ្វើដំណើរឆ្ពោះទៅមុខ" នៅ Army Games 2022 ឲ្យទទួលបានលទ្ធផលល្អបំផុត៕
បកប្រែដោយ Duy Hoan