លោករដ្ឋមន្ត្រី Phan Van Giang ទទួលជួបឯកអគ្គរដ្ឋទូតឥណ្ឌា និងឯកអគ្គរដ្ឋទូតកូរ៉េខាងត្បូង
កប.អនឡាញ - នាថ្ងៃទី ១ មិថុនា នៅទីស្នាក់ការក្រសួងការពារប្រទេស លោកឧត្តមសេនីយ៍ឯក Phan Van Giang សមាជិកការិយាល័យនយោបាយ លេខារងនៃគណៈកម្មាធិការបក្សយោធាមជ្ឈិម រដ្ឋមន្រ្តីក្រសួងការពារប្រទេសវៀតណាម បានទទួលជួបឯកអគ្គរដ្ឋទូតវិសាមញ្ញ និងពេញសមត្ថភាពឥណ្ឌាប្រចាំវៀតណាម លោក Pranay Verma ។
នៅក្នុងជំនួបនេះ លោករដ្ឋមន្រ្តី Phan Van Giang បានចែករំលែកនូវការលំបាក និងការបាត់បង់ដែលប្រជាជនឥណ្ឌាកំពុងជួបប្រទះដោយសារការផ្ទុះឡើងនៃជំងឺរាតត្បាត Covid-19 ហើយបានបង្ហាញនូវទំនុកចិត្តលើវិធានការសកម្មរបស់រដ្ឋាភិបាលឥណ្ឌា រួមជាមួយនឹងការជួយគាំទ្រប្រកបដោយប្រសិទ្ធភាពពីកងទ័ព ប្រជាជនឥណ្ឌានឹងជំនះការលំបាកនេះក្នុងពេលឆាប់ៗ។ លោករដ្ឋមន្រ្តី Phan Van Giang បានបញ្ជាក់ថា ក្នុងរយៈពេលកន្លងមក ទំនាក់ទំនងមិត្តភាពជាប្រពៃណី និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងវៀតណាម និងឥណ្ឌា បានបន្តអភិវឌ្ឍយ៉ាងល្អលើវិស័យជាច្រើនដូចជា នយោបាយ ការពារជាតិ សន្តិសុខ សេដ្ឋកិច្ច វប្បធម៌ អប់រំ និងការជួបប្រាស្រ័យផ្លាស់ប្តូររវាងប្រជាជន និងប្រជាជន។ វៀតណាមយកចិត្តទុកដាក់យ៉ាងខ្លាំងចំពោះការអភិវឌ្ឍទំនាក់ទំនងគ្រប់ជ្រុងជ្រោយ និងជាក់ស្តែងជាមួយប្រទេសឥណ្ឌា ដោយចាត់ទុកថានេះជាកត្តាសំខាន់មួយដែលរួមចំណែកក្នុងការអនុវត្តប្រកបដោយជោគជ័យនៃការកសាង និងអភិវឌ្ឍន៍ប្រទេសជាតិ ដើម្បីសន្តិភាព ស្ថិរភាព និងវិបុលភាពរួមក្នុងតំបន់ និងពិភពលោក។
    |
 |
|
លោកឧត្តមសេនីយ៍ឯក Phan Van Giang ទទួលជួបឯកអគ្គរដ្ឋទូតវិសាមញ្ញ និងពេញសមត្ថភាពឥណ្ឌាប្រចាំវៀតណាម លោក Pranay Verma |
លោកឯកអគ្គរដ្ឋទូត Pranay Verma បានអបអរសាទរលោកឧត្តមសេនីយ៍ឯក Phan Van Giang ដែលត្រូវបានតែងតាំងជារដ្ឋមន្រ្តីក្រសួងការពារប្រទេសវៀតណាម ហើយបានបង្ហាញជំនឿថា ក្នុងតួនាទីថ្មី លោកឧត្តមសេនីយ៍ឯក Phan Van Giang នឹងចូលរួមចំណែកជាក់ស្តែងក្នុងការអភិវឌ្ឍទំនាក់ទំនងរវាងប្រទេសទាំងពីរនិយាយរួម និងកងទ័ពទាំងពីរនិយាយដោយឡែក។
ភាគីទាំងពីរបានវាយតម្លៃខ្ពស់ចំពោះលទ្ធផលនៃកិច្ចសហប្រតិបត្តិការការពារជាតិនាពេលកន្លងមក ជាពិសេសការអនុវត្តយ៉ាងសកម្មនូវរាល់ខ្លឹមសារសហប្រតិបត្តិការទាំងឡាយដែលក្នុងនោះមានអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការការពារជាតិទ្វេភាគី ក៏ដូចជាកិច្ចព្រមព្រៀងផ្សេងទៀតដែលថ្នាក់ដឹកនាំជាន់ខ្ពស់នៃប្រទេសទាំងពីរ និងក្រសួងការពារជាតិទាំងពីរ បានចុះហត្ថលេខា។ នាពេលកន្លងមក ទោះបីមានការវិវត្តស្មុគស្មាញនៃការរីករាលដាល Covid-19 ក៏ដោយ ក៏ភាគីទាំងពីរនៅតែបន្តរក្សាកិច្ចសហប្រតិបត្តិការលើវិស័យការពារជាតិ។ កិច្ចសហប្រតិបត្តិការក្នុងវិស័យនានាដូចជា ឧស្សាហកម្មការពារជាតិ សន្តិសុខសមុទ្រ ការបណ្តុះបណ្តាល ការថែរក្សាសន្តិភាពរបស់អង្គការសហប្រជាជាតិ និងការស្រាវជ្រាវយុទ្ធសាស្រ្ត ត្រូវបានភាគីទាំងពីរយកចិត្តទុកដាក់ជម្រុញយ៉ាងខ្លាំង ដោយទទួលបានលទ្ធផលជាក់ស្តែងជាច្រើន។
ភាគីទាំងពីរបានបញ្ជាក់ពីការប្តេជ្ញាចិត្ត ដោយមិនទុកឱ្យការរីករាលដាលនៃ Covid-19 ប៉ះពាល់ដល់ការអនុវត្តកិច្ចសហប្រតិបត្តិការការពារជាតិរវាងប្រទេសទាំងពីរនាពេលខាងមុខឡើយ រួមទាំងការចុះហត្ថលេខាលើសេចក្តីថ្លែងការណ៍ចក្ខុវិស័យរួមស្តីពីទំនាក់ទំនងទ្វេភាគីវៀតណាម - ឥណ្ឌា សម្រាប់ដំណាក់កាល ២០២១-២០២៥ ។
*នាព្រឹកថ្ងៃដដែល លោករដ្ឋមន្ត្រី Phan Van Giang បានទទួលជួបឯកអគ្គរដ្ឋទូតកូរ៉េខាងត្បូងប្រចាំវៀតណាម។
នៅក្នុងជំនួបនេះ លោករដ្ឋមន្ត្រី Phan Van Giang បានវាយតម្លៃខ្ពស់ចំពោះការរួមចំណែករបស់លោកឯកអគ្គរដ្ឋទូត Park Noh-wan ក្នុងការជំរុញទំនាក់ទំនងរវាងវៀតណាម និងកូរ៉េខាងត្បូងលើវិស័យជាច្រើនដែលក្នុងនោះមានកិច្ចសហប្រតិបត្តិការការពារជាតិ។ ព្រមទាំងថ្លែងអំណរគុណរដ្ឋាភិបាល និងបណ្តាអង្គការ ធុរកិច្ច និងបុគ្គលនៃកូរ៉េខាងត្បូងនៅវៀតណាម ដែលបានជួយឧបត្ថម្ភប្រជាជនវៀតណាមក្នុងការប្រយុទ្ធប្រឆាំងនឹង Covid-19។ លោករដ្ឋមន្រ្តី Phan Van Giang បានសង្កត់ធ្ងន់ថា ក្នុងរយៈពេលប៉ុន្មានឆ្នាំកន្លងមកនេះ ទំនាក់ទំនងភាពជាដៃគូយុទ្ធសាស្ត្រវៀតណាម - កូរ៉េខាងត្បូង មានការរីកចម្រើនយ៉ាងខ្លាំងក្លា ដោយបាននាំមកនូវប្រសិទ្ធភាពជាក់ស្តែង ដែលក្នុងនោះកិច្ចសហប្រតិបត្តិការការពារជាតិទ្វេភាគីតែងតែត្រូវបានយកចិត្តទុកដាក់យ៉ាងខ្លាំងដោយមានការអភិវឌ្ឍថ្មី និងជាក់ស្តែង ជាពិសេសបន្ទាប់ពីភាគីទាំងពីរចុះហត្ថលេខាលើសេចក្តីថ្លែងការណ៍ចក្ខុវិស័យរួមស្តីពីកិច្ចសហប្រតិបត្តិការការពារជាតិដល់ឆ្នាំ២០៣០។
|
|
 |
|
លោករដ្ឋមន្ត្រី Phan Van Giang បានទទួលជួបឯកអគ្គរដ្ឋទូតកូរ៉េខាងត្បូងប្រចាំវៀតណាម |
លោកឯកអគ្គរដ្ឋទូត Park Noh-wan បានអបអរសាទរលោកឧត្តមសេនីយ៍ឯក Phan Van Giang ដែលបានតែងតាំងជារដ្ឋមន្រ្តីក្រសួងការពារប្រទេស ហើយជឿជាក់ថាក្នុងតួនាទីថ្មី លោកឧត្តមសេនីយ៍ឯក Phan Van Giang នឹងបន្តចូលរួមចំណែកជាក់ស្តែង និងមានប្រសិទ្ធភាពក្នុងទំនាក់ទំនង កិច្ចសហប្រតិបត្តិការរវាងប្រទេសទាំងពីរវៀតណាម និងកូរ៉េខាងត្បូងនិយាយរួម និងរវាងកងទ័ពទាំងពីរនិយាយដោយឡែក ដែលកំពុងមានការអភិវឌ្ឍប្រកបដោយចីរភាព។ ភាគីទាំងពីរបានឯកភាពគ្នា នាពេលខាងមុខនឹងបន្តពង្រឹង និងជំរុញកិច្ចសហប្រតិបត្តិការការពារជាតិលើវិស័យជាច្រើនដូចជាការផ្លាស់ប្តូរគណៈប្រតិភូ ការកសាងយន្តការកិច្ចសហប្រតិបត្តិការទ្វេភាគី ការរៀបចំការផ្លាស់ប្តូរគ្រប់ជាន់ថ្នាក់ ការបណ្តុះបណ្តាលកម្មាភិបាល សន្តិសុខសមុទ្រ ការប្រយុទ្ធតាមប្រព័ន្ធអ៊ិនធឺណិត ការជំនះផលវិបាកសង្គ្រាម ឧស្សាហកម្មការពារជាតិ ជាពិសេសការជួយគាំទ្រវៀតណាមឲ្យបន្តអនុវត្ត “គម្រោងវៀតណាម - កូរ៉េខាងត្បុងក្នុងការជំនះផលវិបាកនៃគ្រាប់បែក គ្រាប់មីនក្រោយសង្គ្រាម”៕
បកប្រែដោយ Thanh Cong