កិច្ចសន្ទនាគោលនយោបាយការពារជាតិរវាងវៀតណាម និងសហរដ្ឋអាមេរិក
កប.អនឡាញ - នាព្រឹកថ្ងៃទី ១១ ខែធ្នូ (តាមម៉ោងសហរដ្ឋអាមេរិក) នៅទីស្នាក់ការក្រសួងការពារជាតិសហរដ្ឋអាមេរិកនៅទីក្រុងវ៉ាស៊ីនតោន បានប្រព្រឹត្ដទៅកិច្ចសន្ទនាគោលនយោបាយការពារជាតិរវាងវៀតណាម - សហរដ្ឋអាមេរិកឆ្នាំ ២០១៩។ គណៈប្រតិភូក្រសួងការពារប្រទេសវៀតណាមដឹកនាំលោកឧត្តមសេនីយ៍ឯក Nguyen Chi Vinh អនុរដ្ឋមន្រ្តីក្រសួងការពារប្រទេស និងគណៈប្រតិភូក្រសួងការពារជាតិសហរដ្ឋអាមេរិកដឹកនាំដោយ លោក Randall Shriver ឧបការីរដ្ឋមន្រ្តីក្រសួងការពារជាតិសហរដ្ឋអាមេរិក។
|
|
ទិដ្ឋភាពនៃកិច្ចសន្ទនាគោលនយោបាយការពារជាតិរវាងវៀតណាម - សហរដ្ឋអាមេរិកឆ្នាំ ២០១៩ |
នៅឯកិច្ចសន្ទនា ភាគីទាំងពីរបានផ្លាស់ប្តូរទស្សនៈអំពីស្ថានភាពពិភពលោកនិងតំបន់ ព្រមទាំងវាយតម្លៃលើលទ្ធផលនៃកិច្ចសហប្រតិបត្តិការក្នុងឆ្នាំ២០១៩ និងកំណត់ទិសដៅនៃកិច្ចសហប្រតិបត្តិការក្នុងឆ្នាំ ២០២០ និងឆ្នាំបន្តបន្ទាប់ដោយអនុលោមតាមអនុស្សរណៈយោគយល់គ្នាស្តីពីការជំរុញកិច្ចសហប្រតិបត្តិការការពារជាតិទ្វេភាគីនៅឆ្នាំ ២០១១ និងសេចក្តីថ្លែងការណ៍រួមស្តីពីចក្ខុវិស័យនៃទំនាក់ទំនងការពារជាតិវៀតណាម - សហរដ្ឋអាមេរិកនៅឆ្នាំ ២០១៥ ហើយអនុវត្ដនូវខ្លឹមសារដែលបានព្រមព្រៀងក្នុងដំណើរទស្សនកិច្ចកាលពីខែវិច្ឆិកាឆ្នាំ ២០១៩ របស់លោក Mark Esper រដ្ឋមន្រ្តីក្រសួងការពារជាតិសហរដ្ឋអាមេរិក រួមចំណែកជំរុញទំនាក់ទំនងភាពជាដៃគូគ្រប់ជ្រុងជ្រោយរវាងវៀតណាម - សហរដ្ឋអាមេរិក។
លោកឧត្តមសេនីយ៍ឯក Nguyen Chi Vinh បានផ្លាស់ប្តូរយោបល់អំពីសៀវភៅសការពារប្រទេសថ្មីរបស់វៀតណាមនិងគំនិតផ្តួចផ្តើមមួយចំនួនរបស់វៀតណាមក្នុងឆ្នាំ២០២០ វៀតណាមជាប្រធានអាស៊ាន និងស្នើឲ្យសហរដ្ឋអាមេរិកគាំទ្រវៀតណាមទទួលតួនាទីប្រធានអាស៊ានក្នុងឆ្នាំ ២០២០ ប្រកបដោយជោគជ័យ។
រីឯលោក Randall Schriver បានអះអាងថា សហរដ្ឋអាមេរិកយកចិត្តទុកដាក់យ៉ាងខ្លាំងចំពោះទំនាក់ទំនងភាពជាដៃគូគ្រប់ជ្រុងជ្រោយជាមួយវៀតណាម ព្រមទាំងមានបំណងចង់ឲ្យវៀតណាមកាន់តែរឹងមាំ ឯករាជ្យជាតិ សម្បូររុងរឿង និងដើរតួនាទីកាន់តែសំខាន់នៅក្នុងតំបន់ឥណ្ឌូ - ប៉ាស៊ីហ្វិក។
លោក Randall Schriver បានសង្កត់ធ្ងន់ថា កិច្ចសហប្រតិបត្តិការការពារជាតិបន្ដជាចំណុចសំខាន់មួយក្នុងទំនាក់ទំនងទ្វេភាគីរវាងវៀតណាមនិងសហរដ្ឋអាមេរិក ព្រមទាំងប្ដេជ្ញាចិត្ដបន្តជំរុញកិច្ចសហប្រតិបត្តិការការពារជាតិរវាងប្រទេសទាំងពីរឲ្យកាន់តែរីកច្រើននិងមានប្រសិទ្ធភាពនាពេលខាងមុខ ជាពិសេសលើវិស័យសន្តិសុខដែនសមុទ្រ រក្សាសន្ដិភាពរបស់អង្គការសហប្រជាជាតិ ជំនួយមនុស្សធម៌ និងសង្គ្រោះគ្រោះមហន្តរាយធម្មជាតិ ... ក្រៅពីនេះលោក Randall Schriver បានសង្កត់ធ្ងន់ថា ការជំនះផលវិបាកនៃសង្គ្រាមជាមូលដ្ឋាននៃកិច្ចសហប្រតិបត្តិការការពារជាតិទ្វេភាគី។
ក្នុងឱកាសនេះដែរ លោក Randall Schriver ក៏បានថ្លែងអំណរគុណចំពោះការខិតខំរបស់វៀតណាមក្នុងការជួយសហរដ្ឋអាមេរិកស្វែងរកយោធិនដែលបាត់ខ្លួននៅសម័យសង្គ្រាម ព្រមទាំងលោកបញ្ជាក់ថានឹងជួយទ្រទ្រង់វៀតណាមស្វែងរកយុទ្ធជនវៀតណាមដែលពលីជីវិតនៅសម័យសង្គ្រាមផងដែរ៕
បកប្រែដោយ Pham Diep