ពង្រឹងកិច្ចសហប្រតិបត្តិការលើវិស័យការពារជាតិរវាងវៀតណាមនិងថៃ
កប.អនឡាញ - នាថ្ងៃទី ១៩ កញ្ញា កិច្ចសន្ទនាគោលនយោបាយការពារជាតិវៀតណាម - ថៃ លើកទី ៣ បានប្រព្រឹត្តទៅនៅទីក្រុងហូជីមិញ។
លោកឧត្តមសេនីយ៍ឯក Nguyen Chi Vinh អនុរដ្ឋមន្ត្រីក្រសួងការពារប្រទេសវៀតណាម និងលោកនាយឧត្តមសេនីយ៍ Natt Intracharoen អគ្គលេខាធិការប្រចាំការនៃក្រសួងការពារជាតិថៃបានធ្វើជាសហអធិបតីនៃកិច្ចសន្ទនានេះ។ អញ្ជើញចូលរួមកិច្ចសន្ទនានេះមានលោកឧត្តមសេនីយ៍ឯក Pham Ngoc Minh អនុប្រធានអគ្គសេនាធិការនៃកងទ័ពប្រជាជនវៀតណាម រួមជាមួយមន្ត្រីជាន់ខ្ពស់ជាច្រើនរូបទៀតនៃកងទ័ពនៃប្រទេសទាំងពីរ។
កិច្ចសន្ទនាគោលនយោបាយការពារជាតិវៀតណាម - ថៃគឺជាយន្តការប្រចាំឆ្នាំដែលត្រូវបានរៀបចំឡើងក្នុងបំណងពិភាក្សា និងឯកភាពលើបញ្ហាយុទ្ធសាស្ត្រ និងទិសដៅសហប្រតិបត្តិការលើវិស័យការពារជាតិនៃប្រទេសទាំងពីរ រួមចំណែកជំរុញថែមទៀតនូវទំនាក់ទំនងមិត្តភាពល្អប្រសើររវាងប្រទេសទាំងពីរនិយាយរួម និងរវាងក្រសួងការពារជាតិនៃប្រទេសទាំងពីរជាដោយឡែក និងកិច្ចសហប្រតិបត្តិការលើវិស័យការពារជាតិបន្តគឺជាសរសរស្តម្ភសំខាន់មួយនៃទំនាក់ទំនងរវាងប្រទេសទាំងពីរ។
|
|
ប្រតិភូចូលរួមកិច្ចសន្ទនាថតរួបរួមគ្នា |
នៅក្នុងកិច្ចសន្ទនានេះ ភាគីទាំងពីរបានផ្លាស់ប្តូរយោបល់គ្នាយ៉ាងទូលំទូលាយលើបញ្ហាសន្តិសុខក្នុងតំបន់ និងអន្តរជាតិ។ ភាគីទាំងពីរបានវាយតម្លៃថា ក្នុងរយៈពេលកន្លងមកកិច្ចសហប្រតិបត្តិការរវាងក្រសួងការពារជាតិនៃប្រទេសទាំងពីរបានបន្តអភិវឌ្ឍយ៉ាងខ្លាំងដោយទទួលបានលទ្ធផលជាក់ស្តែងជាច្រើន។ ភាគីទាំងពីរបានឯកភាពថា នាពេលខាងមុខនឹងបន្តអនុវត្តខ្លឹមសារសហប្រតិបត្តិការឱ្យបានពេញលេញ និងមានប្រសិទ្ធភាព ដោយផ្តោតលើការជម្រុញខ្លឹមសារមួយចំនួនដូចជា៖ ការផ្លាស់ប្តូរគណៈប្រតិភូ ការផ្លាស់ប្តូរនាយទាហានវ័យក្មេង ការបណ្តុះបណ្តាល កិច្ចសហប្រតិបត្តិការក្នុងវិស័យរក្សាសន្តិភាពនៃអង្គការសហប្រជាជាតិ សកម្មភាពបោសសម្អាតមីនលក្ខណៈមនុស្សធម៌ ការប្រឆាំងភេរវកម្ម និងកិច្ចសហប្រតិបត្តិការរវាងបណ្តាអង្គភាពកងទ័ពនៃប្រទេសទាំងពីរ រួមទាំងពង្រឹងកិច្ចសហប្រតិបត្តិការរវាងបណ្តាកងកម្លាំងនៅលើសមុទ្រ ក៏ដូចជាការប្រយុទ្ធប្រឆាំងនឹងឧក្រិដ្ឋកម្មឆ្លងដែន និងការគាំទ្រលើគំនិតផ្តួចផ្តើមរបស់គ្នាទៅវិញទៅមកផងដែរ៕
បកប្រែដោយ Duy Hoan