ជំរុញកិច្ចសហប្រតិបត្តិការលើវិស័យការពារជាតិរវាងវៀតណាម និងឥណ្ឌា
កប.អនឡាញ - នារសៀលថ្ងៃទី ១៣ ខែកញ្ញា នៅទីស្នាក់ការក្រសួងការពារប្រទេស លោកឧត្តមសេនីយ៍ឯក Nguyen Chi Vinh អនុរដ្ឋមន្ត្រីក្រសួងការពារប្រទេសវៀតណាមបានទទួលជួបឯកអគ្គរដ្ឋទូតឥណ្ឌាប្រចាំនៅវៀតណាម លោក Pranay Verma ដែលចូលជួបសម្តែងការគួរសមក្នុងឱកាសលោកទទួលបេសកកម្មថ្មីនៅប្រទេសវៀតណាម។
នៅក្នុងជំនួបនេះ លោកឧត្តមសេនីយ៍ឯក Nguyen Chi Vinh បានសង្កត់ធ្ងន់ថា កិច្ចសហប្រតិបត្តិការលើវិស័យការពារជាតិរវាងវៀតណាមនិងឥណ្ឌាក្នុងរយៈពេលប៉ុន្មានឆ្នាំថ្មីៗនេះត្រូវបានពង្រីកដោយឥតឈប់ឈរ កាន់តែស៊ីជម្រៅ និងមានប្រសិទ្ធភាពជាក់ស្តែង។ លោកឧត្តមសេនីយ៍ឯក Nguyen Chi Vinh រំពឹងថាក្នុងឋានៈរបស់ខ្លួន លោកឯកអគ្គរដ្ឋទូត Pranay Verma នឹងយកចិត្តទុកដាក់ ហើយចូលរួមវិភាគទានជាវិជ្ជមានដើម្បីជំរុញទំនាក់ទំនងវៀតណាម - ឥណ្ឌានិយាយរួម និងកិច្ចសហប្រតិបត្តិការរវាងកងទ័ពនៃប្រទេសទាំងពីរនិយាយដោយឡែកឲ្យកាន់តែរីកច្រើនថែមទៀត ជាពិសេសការត្រៀមសំរាប់កិច្ចសន្ទនាគោលនយោបាយការពារជាតិថ្នាក់អនុរដ្ឋមន្រ្តី លើកទី ១២ ដែលនឹងប្រព្រឹត្តិទៅនាខែតុលាខាងមុខនេះនៅប្រទេសវៀតណាម។
|
|
លោកឧត្តមសេនីយ៍ឯក Nguyen Chi Vinh ទទួលជួបលោកឯកអគ្គរដ្ឋទូត Pranay Verma |
លោកឯកអគ្គរដ្ឋទូត Pranay Verma បានអះអាងថា ការពង្រីកកិច្ចសហប្រតិបត្តិការលើវិស័យការពារជាតិរវាងប្រទេសទាំងពីរនាពេលកន្លងមកទាំងខ្លឹមសារនិងវិសាលភាពគឺជាមូលដ្ឋានសម្រាប់បញ្ជាក់ថាកិច្ចសហប្រតិបត្តិការលើវិស័យការពារជាតិគឺជាសសរស្តម្ភនៃទំនាក់ទំនងភាពជាដៃគូយុទ្ធសាស្ត្រលើគ្រប់ជ្រុងជ្រោយរវាងឥណ្ឌា និងវៀតណាម។ លោកឯកអគ្គរដ្ឋទូត Pranay Verma បានអះអាងថានឹងប្រឹងប្រែងអស់ពីសមត្ថភាពដើម្បីធ្វើឱ្យកិច្ចសន្ទនាគោលនយោបាយការពារជាតិវៀតណាម - ឥណ្ឌាលើកទី ១២ ទទួលបានជោគជ័យ៕
បកប្រែដោយ Duy Hoan