ផ្តល់កិត្តិយសជូនគ្រូពេទ្យប្រជាជន និងផ្តល់កិត្ដិនាមជាគ្រូពេទ្យឆ្នើមក្នុងជួរកងទ័ព

ថ្លែងមតិក្នុងជំនួបនេះ លោកនាយឧត្តមសេនីយ៍ Phan Van Giang បានកត់សម្គាល់ កោតសរសើរ និងអបអរសាទរចំពោះសមិទ្ធិផលនានារបស់គ្រូពេទ្យយោធា គ្រូពេទ្យឆ្នើមដែលលើកតម្កើងនៅថ្ងៃនេះ។ លោករដ្ឋមន្ត្រីក្រសួងការពារប្រទេស បានបញ្ជាក់ថា៖ ក្នុងរយៈពេល ៧០ ឆ្នាំកន្លងទៅ កម្មាភិបាលនិងយុទ្ធជនគ្រប់ជំនាន់នៃពេទ្យយោធាបានពង្រីកប្រពៃណីដ៏ត្រចេះត្រចងរបស់កងទ័ពប្រជាជនវៀតណាមវិរភាព សាមគ្គី ច្នៃប្រឌិត ខ្លួនទីពឹងខ្លួន ជំនះពុះពារការលំបាក បំពេញយ៉ាងល្អនូវភារកិច្ចថែទាំ និងការពារសុខភាពរបស់កម្មាភិបាល យុទ្ធជន និងប្រជាជន រួមចំណែកយ៉ាងសំខាន់ក្នុងការអភិវឌ្ឍរបស់វិស័យវេជ្ជសាស្ដ្ររបស់ប្រទេស ក៏ដូចជារួមចំណែកក្នុងបុព្វហេតុតស៊ូរំដោះជាតិ កសាងកងទ័ព ពង្រឹងការការពារជាតិ និងការពារមាតុភូមិសង្គមនិយមវៀតណាមយ៉ាងរឹងមាំ។

លោកនាយឧត្តមសេនីយ៍ Phan Van Giang ថ្លែងក្នុងជំនួប

ក្រៅពីនេះ បច្ចេកទេសទំនើបៗជាច្រើនត្រូវបានអនុវត្តន៍ និងអភិវឌ្ឍដោយក្រុមគ្រូពេទ្យយោធា ហើយក្លាយជាបច្ចេកទេសទំនើប និងត្រួសត្រាយក្នុងវិស័យវេជ្ជសាស្ត្ររបស់ប្រទេសជាតិ។ វេជ្ជបណ្ឌិតយោធាបានអនុវត្តដោយជោគជ័យនូវបច្ចេកទេសពិបាក ព្យាបាលជំងឺធ្ងន់ធ្ងរជាច្រើន អនុវត្ដបច្ចេកទេសវេជ្ជសាស្ត្រទំនើបបំផុតរបស់ពិភពលោក រួមចំណែកយ៉ាងសំខាន់ក្នុងការនាំយកវេជ្ជសាស្ដ្រវៀតណាមរីកចម្រើន។ ជាពិសេសគឺកម្មាភិបាល យុទ្ធជនក្នុងកងទ័ពទាំងមូល និងប្រជាពលរដ្ឋទាំងអស់សុទ្ធតែដឹងគុណចំពោះគ្រូពេទ្យយោធា ដែលមិនថា ជួបការលំបាក ទុក្ខវេទនាក៏ដោយ ក៏ជួយការពារសុខភាពរបស់ប្រជាជន។

លោកនាយឧត្តមសេនីយ៍ Phan Van Giang ជូនផ្កា និងគ្រឿងអនុស្សាវរីយ៍ជូនគ្រូពេទ្យចំនួន ១០ រូប ដែលទទួលកិត្ដិនាមជាគ្រូពេទ្យប្រជាជន

លោកឧត្តមសេនីយ៍ឯក Trinh Van Quyet និងលោកស្រី Dao Hong Lan រដ្ឋមន្ដ្រីក្រសួងសុខាភិបាលផ្ដល់កិត្ដិនាមដល់គ្រូពេទ្យឆ្នើម

លោកនាយឧត្តមសេនីយ៍ Phan Van Giang បានសង្កត់ធ្ងន់ថា ដើម្បីបំពេញភារកិច្ចប្រកបដោយជោគជ័យនាពេលខាងមុខ ក្រុមគ្រូពេទ្យយោធា និងបុគ្គលិកពេទ្យត្រូវបន្តអនុវត្តប្រកបដោយប្រសិទ្ធភាពនូវសេចក្ដីសម្រេចចិត្ដ និងសេចក្តីណែនាំរបស់បក្ស គណៈកម្មាធិការបក្សយោធាមជ្ឈិម និងក្រសួងការពារប្រទេស កសាងវិស័យវេជ្ជសាស្រ្តយោធារឹងមាំ មានជំនាញល្អ ត្រៀមខ្លួនទទួល និងបំពេញល្អនូវភារកិច្ចដែលបានប្រគល់ជូន។

ទន្ទឹមនឹងនោះ ពង្រឹងការអប់រំនយោបាយ សតិអារម្មណ៍ គុណធម៌ សីលធម៌ និងរបៀបរស់នៅ រួមជាមួយនឹងការងារជ្រើសរើស ការបណ្តុះបណ្តាល និងអភិវឌ្ឍក្រុមគ្រូពេទ្យដែលមានគុណធម៌ និងទេពកោសល្យ មានការទទួលខុសត្រូវ និងលក្ខណៈសម្បត្តិគ្រប់គ្រាន់ និងសមត្ថភាពគ្រប់ជ្រុងជ្រោយ ដើម្បីឆ្លើយតបនឹងតម្រូវការនៃការកសាងកម្លាំងពេទ្យយោធាទំនើប៕

បកប្រែដោយ Pham Diep