លោក Pham Minh Chinh នាយករដ្ឋមន្ត្រីវៀតណាម អញ្ជើញទៅទស្សនាវិទ្យាស្ថានពេទ្យយោធា

អញ្ជើញទៅទស្សនា និងអបអរសាទរវិទ្យាស្ថានពេទ្យយោធា និងមន្ទីរពេទ្យលេខ ១០៣ លោកនាយករដ្ឋមន្ត្រី Pham Minh Chinh បានអះអាងថា វិស័យពេទ្យយោធាវៀតណាម មានតួនាទីសំខាន់ជាពិសេសក្នុងការអនុវត្តបេសកកម្មការពារសុខភាពរបស់កម្មាភិបាល និងយុទ្ធជន រួមចំណែករក្សាកម្លាំងរបស់កងទ័ព; ទន្ទឹមនឹងនោះ ចូលរួមពិនិត្យសុខភាព ជួយសង្គ្រោះគ្រោះមហន្តរាយធម្មជាតិ និងជំងឺរាតត្បាតជូនប្រជាជន។

លោកនាយករដ្ឋមន្ត្រី Pham Minh Chinh ថ្លែងនៅវិទ្យាស្ថានពេទ្យយោធា

លោកនាយករដ្ឋមន្ត្រី Pham Minh Chinh បានសង្កត់ធ្ងន់ថា នាពេលខាងមុខ វិទ្យាស្ថានពេទ្យយោធាចាំបាច់ត្រូវអភិវឌ្ឍដោយឥតឈប់ឈរក្នុងតួនាទីជាសាកលវិទ្យាល័យវេជ្ជសាស្ត្រឪសថសាស្រ្តឈានមុខគេមួយនៅវៀតណាម និងជាសាកលវិទ្យាល័យជាតិសំខាន់មួយ និងក្លាយជាមជ្ឈមណ្ឌលបណ្តុះបណ្តាល ស្រាវជ្រាវវិទ្យាសាស្ត្រ អភិវឌ្ឍ និងអនុវត្តបច្ចេកទេសជឿនលឿនក្នុងវិស័យវេជ្ជសាស្ត្រយោធា និងវេជ្ជសាស្ត្រទូទៅនៃប្រទេស និងអន្តរជាតិ។

លោកនាយករដ្ឋមន្ត្រី Pham Minh Chinh ផ្តល់ផ្កា និងអំណោយអបអរសាទរដល់វិទ្យាស្ថានពេទ្យយោធា

ដើម្បីសម្រេចបាននូវគោលដៅនោះ លោកនាយករដ្ឋមន្ត្រី Pham Minh Chinh បានដាក់ចេញនូវតម្រូវការសំខាន់ៗចំនួន ៦ សម្រាប់វិទ្យាស្ថានពេទ្យយោធា និងមន្ទីរពេទ្យលេខ ១០៣ រួមមាន៖ ការផ្លាស់ថ្មី និងលើកកម្ពស់គុណភាពនៃការអប់រំ និងបណ្តុះបណ្តាល ផ្តោតលើការបណ្តុះបណ្តាលធនធានមនុស្សវេជ្ជសាស្ត្រប្រកបដោយគុណភាពខ្ពស់; ផ្តោតលើការអភិវឌ្ឍបច្ចេកទេស ការអភិវឌ្ឍវេជ្ជសាស្ត្រយោធាទំនើប ដើម្បីឆ្លើយតបទៅនឹងជម្លោះបច្ចេកវិទ្យាខ្ពស់; បន្តធ្វើឱ្យប្រសើរឡើងនូវគុណវុឌ្ឍិវិជ្ជាជីវៈ; អនុវត្តឱ្យបានល្អនូវគោលនយោបាយខាងក្រោយរបស់កងទ័ព; ពង្រឹង និងពង្រីកកិច្ចសហប្រតិបត្តិការអន្តរជាតិក្នុងការបណ្តុះបណ្តាល និងស្រាវជ្រាវវិទ្យាសាស្ត្រ; បន្តចូលរួមយ៉ាងសកម្ម និងប្រកបដោយប្រសិទ្ធភាពក្នុងបេសកកម្មរក្សាសន្តិភាពរបស់អង្គការសហប្រជាជាតិ។ល៕

បកប្រែដោយ Huyen Trang