ការត្រួតពិនិត្យលើការត្រៀមរៀបចំពិព័រណ៍ការពារជាតិអន្តរជាតិឆ្នាំ ២០២០
កប.អនឡាញ - នាព្រឹកថ្ងៃទី ២៥ ខែកុម្ភៈ នៅទីស្នាក់ការក្រសួងការពារប្រទេស លោកឧត្តមសេនីយ៍ឯក Nguyen Chi Vinh អនុរដ្ឋមន្រ្តីក្រសួងការពារប្រទេសវៀតណាម បានដឹកនាំកិច្ចប្រជុំត្រួតពិនិត្យការត្រៀមរៀបចំពិព័រណ៍ការពារជាតិអន្តរជាតិឆ្នាំ ២០២០។ អញ្ជើញចូលរួមកិច្ចប្រជុំនេះក៏មានលោកឧត្តមសេនីយ៍ទោ Le Huy Vinh អនុប្រធានអគ្គសេនាធិការ កងទ័ពប្រជាជនវៀតណាមផងដែរ។
|
|
លោកឧត្តមសេនីយ៍ឯក Nguyen Chi Vinh ដឹកនាំកិច្ចប្រជុំ |
ពិព័រណ៍ការពារជាតិអន្តរជាតិឆ្នាំ ២០២០ នឹងប្រព្រឹត្តទៅនៅទីក្រុងហាណូយនាចុងខែតុលាខាងមុខ ក្នុងឱកាសក្រសួងការពារប្រទេសវៀតណាមរៀបចំកិច្ចប្រជុំរដ្ឋមន្ត្រីការពារជាតិអាស៊ាន (ADMM) និងកិច្ចប្រជុំរដ្ឋមន្ត្រីការពារជាតិអាស៊ានបូក (ADMM+)។ នៅក្នុងពិព័រណ៍នេះនឹងបង្ហាញនូវផលិតផលអាវុធ និងបរិក្ខាររបស់សាជីវកម្មក្រុមហ៊ុនការពារជាតិធំៗក្នុងតំបន់អាស៊ាននិងនៅលើពិភពលោក។
ការតាំងពិព័រណ៍នេះត្រូវបានរៀបចំឡើងសំដៅបង្កើនទំនាក់ទំនងអន្តរជាតិក្នុងក្របខ័ណ្ឌនៃកិច្ចសហប្រតិបត្តិការទ្វេភាគីនិងពហុភាគីក្នុងឱកាសវៀតណាមទទួលតួនាទីជាប្រធានអាស៊ាន។ នេះក៏ជាឱកាសដើម្បីបង្ហាញសមត្ថភាពបច្ចេកវិទ្យា អាវុធ និងបរិក្ខារដែលផលិតដោយក្រុមហ៊ុនឧស្សាហកម្មការពារជាតិរបស់វៀតណាម រួមចំណែកការពារប្រទេសជាតិ និងបង្កើនកិច្ចសហប្រតិបត្ដិការអន្ដរជាតិក្នុងវិស័យឧស្សាហកម្មការពារជាតិ។
ថ្លែងក្នុងកិច្ចប្រជុំ លោកឧត្តមសេនីយ៍ឯក Nguyen Chi Vinh បានវាយតម្លៃខ្ពស់ចំពោះការត្រៀមរៀបចំរបស់ស្ថាប័ននិងអង្គភាពពាក់ព័ន្ធដោយបានសហការត្រៀមរៀបចំពិព័រណ៍ និងផ្តោតលើការធានាសន្តិសុខនិងសុវត្ថិភាព តាមរយៈនោះបង្កការជឿទុកចិត្តពីដៃគូនានាជាមួយវៀតណាមនៅពេលចូលរួមពិព័រណ៌ការពារជាតិនៅវៀតណាម៕
បកប្រែដោយ Pham Diep