វៀតណាម និង អាស៊ានចែករំលែកបទពិសោធន៍ស្តីពីការប្រយុទ្ធប្រឆាំងនឹងឧក្រិដ្ឋកម្មគ្រឿងញៀនតាមផ្លូវសមុទ្រ
កប.អនឡាញ - នាព្រឹកថ្ងៃទី ៩ ខែកញ្ញា សិក្ខាសាលានៃក្រុមការងារអាស៊ានលើកទី ៤ ស្តីពីការប្រយុទ្ធប្រឆាំងនឹងឧក្រិដ្ឋកម្មគ្រឿងញៀនតាមផ្លូវសមុទ្របានប្រព្រឹត្តទៅនៅទីក្រុងហាណូយនៃប្រទេសវៀតណាម។ សិក្ខាសាលានេះមានការចូលរួមពីប្រតិភូចំនួន ៦០ នាក់ដែលតំណាងឱ្យប្រទេសអាស៊ានចំនួន ៩ លេខាធិការដ្ឋានអាស៊ាន និងប្រទេសចិន។
នេះជាសិក្ខាសាលាស្ថិតក្នុងសន្និសីទជាបន្តបន្ទាប់ដែលរៀបចំឡើងតាមគំនិតផ្តួចផ្តើមរបស់ក្រសួងនគរបាលនៃប្រទេសម្ចាស់ផ្ទះវៀតណាមក្នុងបំណងពិភាក្សារកដំណោះស្រាយដើម្បីឆ្លើយតបឱ្យបានទាន់ពេលវេលាចំពោះការវិវឌ្ឍន៍ដ៏ស្មុគស្មាញនៃស្ថានភាពឧក្រិដ្ឋកម្មគ្រឿងញៀននៅក្នុងតំបន់នាពេលកន្លងមក។
នៅក្នុងសិក្ខាសាលានេះ ប្រតិភូទាំងឡាយបានចែករំលែកព័ត៌មានថ្មីៗស្តីពីស្ថានភាពឧក្រិដ្ឋកម្មទាក់ទងនឹងគ្រឿងញៀនតាមផ្លូវសមុទ្រ។ ប្រតិភូទាំងឡាយបានទទួលស្គាល់នូវកិច្ចខិតខំប្រឹងប្រែង និងលទ្ធផលជាវិជ្ជមាននៃកិច្ចសហប្រតិបត្តិការរវាងបណ្តាប្រទេសអាស៊ានក្នុងការប្រយុទ្ធប្រឆាំងនឹងឧក្រិដ្ឋកម្មគ្រឿងញៀនតាមផ្លូវសមុទ្រ ហើយពិភាក្សាអំពីការលំបាក និងឯកភាពលើដំណោះស្រាយមួយចំនួនក្នុងការគ្រប់គ្រងគ្រឿងញៀនតាមផ្លូវសមុទ្រ។ សិក្ខាសាលាក៏បានឯកភាពថា យន្តការសហប្រតិបត្តិការនេះគឺជាក្របខ័ណ្ឌនៃកិច្ចសហប្រតិបត្តិការដ៏សំខាន់មួយរបស់តំបន់ បន្តដើរតួនាទីជាវេទិកាសម្រាប់ការផ្លាស់ប្តូរព័ត៌មាន ការចែករំលែកបទពិសោធន៍ និងពង្រឹងកិច្ចសហប្រតិបត្តិការរវាងបណ្តាប្រទេសក្នុងការប្រយុទ្ធប្រឆាំងនឹងឧក្រិដ្ឋកម្មគ្រឿងញៀនតាមផ្លូវសមុទ្រ៕
បកប្រែដោយ Duy Hoan