ការរក្សាទំនាក់ទំនងសាមគ្គីភាពដ៏អស្ចារ្យ ស្មោះត្រង់រវាងវៀតណាម និងឡាវ
កប.អនឡាញ - កាលពីថ្ងៃទី ២ ខែធ្នូ ឆ្នាំ ១៩៧៥ សមាជប្រជាជនជាតិឡាវ បានចេញសេចក្តីសម្រេចចិត្តជាប្រវត្តិសាស្ត្រមួយ ដើម្បីបង្កើតសាធារណរដ្ឋប្រជាធិបតេយ្យប្រជាមានិតឡាវ ដែលគូសបញ្ជាក់ពីជ័យជំនះដែលប្រជាជនឡាវសម្រេចបាន ក្រោមការដឹកនាំនៃបក្សបដិវត្តឡាវ រំដោះប្រជាជនឡាវឲ្យរួចផុតពីចក្រពត្តិនិយម និងអាណានិគមនិយម ដែលបញ្ចប់បដិវត្តប្រជាជាតិប្រជាធិបតេយ្យ និងបើកយុគសម័យនៃប្រជាជនឡាវក្លាយជាម្ចាស់ពិតប្រាកដនៃជោគវាសនារបស់ខ្លួន ដណ្តើមបានឯករាជ្យជាតិ។
ក្នុងនាមជាសមមិត្ត មិត្តជិតស្និត នាថ្ងៃទី២ ខែវិច្ឆិកា បក្សរដ្ឋនិងប្រជាជនវៀតណាម សូមចែករំលែកសេចក្តីសប្បាយរីករាយជាមួយបក្សរដ្ឋ និងប្រជាជនឡាវ ក្នុងឱកាសរំលឹកខួបលើកទី ៤៤ នៃទិវាឯករាជ្យជាតិឡាវ។
យើងទាំងអស់គ្នាមានសេចក្តីត្រេកអរចំពោះសមិទ្ធិផលដ៏ធំធេង ដែលបក្សរដ្ឋ និងប្រជាជនឡាវសម្រេចបានក្នុងដំណើរការបដិវត្តដ៏រុងរឿងរបស់ខ្លួន។ ក្នុងរយៈពេល ៤៤ ឆ្នាំកន្លងមក ក្នុងបរិបទនៃការលំបាក និងបញ្ហាប្រឈមជាច្រើន ប្រជាជន ឡាវក្រោមការដឹកនាំដ៏ឈ្លាសវៃរបស់គណបក្សប្រជាធិបតេយ្យប្រជាជនឡាវ បានពង្រីកប្រពៃណីបដិវត្តនៃការតស៊ូ និងការខិតខំប្រឹងប្រែង និងសម្រេចបានសមិទ្ធិផលដ៏អស្ចារ្យគួរអោយកោតសរសើរជាច្រើនក្នុងបុព្វហេតុកសាង និងអភិវឌ្ឍសេដ្ឋកិច្ចសង្គម ក៏ដូចជាការការពារជាតិ សន្តិសុខ ការកែលំអជីវភាពរស់នៅរបស់ប្រជាជន និងការពង្រីកទំនាក់ទំនងកិច្ចការបរទេស។
បក្ស រដ្ឋ និងប្រជាជនវៀតណាមជានិច្ចកាលយកចិត្តទុកដាក់យ៉ាងខ្លាំងចំពោះការរក្សាទំនាក់ទំនងសាមគ្គីភាពដ៏ស្មោះត្រង់ រវាងវៀតណាមនិងឡាវ ហើយពង្រឹង និងពង្រីកដោយឥតឈប់ឈរនូវទំនាក់ទំនងមិត្តភាព សាមគ្គីភាពពិសេស និងកិច្ចសហប្រតិបត្តិការគ្រប់ជ្រុងជ្រោយរវាងប្រទេសទាំងពីរ។
ក្នុងបរិបទនៃស្ថានភាពពិភពលោក និងតំបន់មានការប្រែប្រួលយ៉ាងស្មុគស្មាញនាពេលបច្ចុប្បន្ននេះ ប្រទេសទាំងពីរមានកាលានុវត្តន៍ភាពអភិវឌ្ឍជាច្រើន ប៉ុន្តែក៏ប្រឈមនឹងបញ្ហាថ្មីៗជាច្រើនទៀតផង។ ជាមួយនឹងការខិតខំប្រឹងប្រែងរបស់បក្ស រដ្ឋ និងប្រជាជននៃប្រទេសទាំងពីរ យើងជឿជាក់ថា ទំនាក់ទំនងសាមគ្គីភាពពិសេស វៀតណាម-ឡាវនឹងទទួលបានផ្លែផ្កាដោយឥតឈប់ឈរ ដើម្បីផលប្រយោជន៍របស់ប្រជាជននៃប្រទេសទាំងពីរ ដើម្បីសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍនៅក្នុងតំបន់ និងនៅលើពិភពលោក៕
បកប្រែដោយ Huyen Trang