ជម្រុញទំនាក់ទំនងវៀតណាម-ឡាវឲ្យអភិវឌ្ឍយ៉ាងជាក់ស្តែង និងចីរភាពនៅក្នុងសម័យកាលថ្មីនេះ

ក្នុងក្របខ័ណ្ឌនៃដំណើរទស្សនកិច្ចនេះ នៅរសៀលថ្ងៃទី១២ ខែវិច្ឆិកា លោក Ho Duc Phoc ឧបនាយករដ្ឋមន្ត្រី បានជួបជាមួយលោក Thongloun Sisoulith អគ្គលេខាបក្ស និងជាប្រធានរដ្ឋឡាវ និងជួបពិភាក្សាជាមួយលោក Saleumxay Kommasith ឧបនាយករដ្ឋមន្ត្រីឡាវ។

លោក Ho Duc Phoc ឧបនាយករដ្ឋមន្ត្រី ជួបជាមួយលោក Thongloun Sisoulith អគ្គលេខាបក្ស និងជាប្រធានរដ្ឋឡាវ (រូបថត៖ chinhphu.vn)

នៅក្នុងជំនួបជាមួយលោក Thongloun Sisoulith អគ្គលេខាបក្ស និងជាប្រធានរដ្ឋឡាវ លោក Ho Duc Phoc បានរាយការណ៍ជូនលោក Thongloun Sisoulith អំពីលទ្ធផលនៃកិច្ចពិភាក្សាជាមួយលោក Saleumxay Kommasith ឧបនាយករដ្ឋមន្ត្រីឡាវ។ ភាគីទាំងពីរបានវាយតម្លៃចំពោះស្ថានភាពសហប្រតិបត្តិការរវាងប្រទេសទាំងពីរនាពេលកន្លងមកនេះ ពិនិត្យឡើងវិញនូវការអនុវត្តគម្រោងសហប្រតិបត្តិការសំខាន់ៗ ពិភាក្សាអំពីវិធានការដើម្បីដោះស្រាយការលំបាក និងឧបសគ្គ ព្រមទាំងដឹកនាំក្រសួង និងស្ថាប័នពាក់ព័ន្ធនៃប្រទេសទាំងពីរឲ្យសហការយ៉ាងជិតស្និទ្ធ ដើម្បីជម្រុញឲ្យទំនាក់ទំនងវៀតណាម-ឡាវអភិវឌ្ឍយ៉ាងជាក់ស្តែង និងចីរភាពនៅក្នុងសម័យកាលថ្មីនេះ។ ភាគីទាំងពីរបានឯកភាពគ្នាលើខ្លឹមសារសំខាន់ៗមួយចំនួន និងដំណោះស្រាយសំខាន់ៗសម្រាប់គម្រោងជាក់លាក់មួយចំនួន។

លោក Ho Duc Phoc បានសម្តែងនូវក្តីសង្ឃឹមថា ថ្នាក់ដឹកនាំជាន់ខ្ពស់ឡាវនឹងបន្តយកចិត្តទុកដាក់ និងដឹកនាំស្ថាប័នពាក់ព័ន្ធរបស់ឡាវ បន្តបង្កើតលក្ខខណ្ឌអំណោយផលសម្រាប់ធុរកិច្ចវៀតណាមក្នុងការវិនិយោគនៅប្រទេសឡាវ ជាពិសេសលើកទឹកចិត្តសាជីវកម្មធំៗរបស់វៀតណាមឲ្យវិនិយោគ និងធ្វើអាជីវកម្ម រួមចំណែកដល់ការកសាង និងការអភិវឌ្ឍសេដ្ឋកិច្ចសង្គមរបស់ប្រទេសឡាវ។

សូមរំលឹកថា នៅរសៀលថ្ងៃដដែលនោះ ក្នុងកិច្ចពិភាក្សាជាមួយលោក Saleumxay Kommasith ឧបនាយករដ្ឋមន្ត្រីឡាវ លោក Ho Duc Phoc បានលើកឡើងដំណោះស្រាយមួយចំនួន ដើម្បីដោះស្រាយការលំបាក និងឧបសគ្គនៅពេលខាងមុខ។ ទន្ទឹមនឹងនោះ ចែករំលែកបទពិសោធន៍របស់វៀតណាមក្នុងការផ្តោតលើការកសាងហេដ្ឋារចនាសម្ព័ន្ធ ច្បាប់ និងការបង្កើនចំណូលថវិកា៕

បកប្រែដោយ Thuy Anh