លោកស្រី Le Thi Thu Hang អនុរដ្ឋមន្ត្រីក្រសួងការបរទេស ជួបជាមួយបញ្ញវន្តវ័យក្មេងវៀតណាមទូទាំងពិភពលោក

ក្នុងក្របខ័ណ្ឌនៃវេទិកាបញ្ញវន្តវ័យក្មេងវៀតណាមជាសាកលលើកទី៦ ឆ្នាំ២០២៥ នៅទីក្រុងហាណូយ នាព្រឹកថ្ងៃទី១៩ ខែកក្កដា ឆ្នាំ២០២៥ លោកស្រី Le Thi Thu Hang អនុរដ្ឋមន្ត្រីក្រសួងការបរទេសវៀតណាម បានជួបជាមួយប្រតិភូជាង ៧០ នាក់ដែលជាបញ្ញវន្តវៀតណាមមកពី ២០ ប្រទេស និងតំបន់ដែនដីជុំវិញពិភពលោកចូលរួមវេទិកានេះ។

លោកស្រី Le Thi Thu Hang អនុរដ្ឋមន្ត្រីក្រសួងការបរទេសវៀតណាម មានប្រសាសន៍ក្នុងជំនួបជាមួយបញ្ញវន្តវ័យក្មេងវៀតណាមមកពី ២០ ប្រទេស និងតំបន់ដែនដី

វេទិកាឆ្នាំនេះប្រព្រឹត្តទៅក្នុងបរិបទពិសេសមួយ។ ប្រទេសរបស់យើងកំពុងឈានចូលដំណាក់កាលអភិវឌ្ឍន៍ថ្មី ដោយមានសេចក្តីប្រាថ្នាចង់ក្លាយជាប្រទេសអភិវឌ្ឍន៍ដែលមានប្រាក់ចំណូលខ្ពស់នៅឆ្នាំ ២០៤៥។ វិទ្យាសាស្រ្ត និងបច្ចេកវិទ្យា នវានុវត្តន៍ និងការធ្វើបរិវត្តកម្មឌីជីថលកំពុងក្លាយជាកម្លាំងចលករស្នូលនៃការអភិវឌ្ឍ។ នេះជាបញ្ហាប្រឈម និងជាឱកាសដ៏ល្អដើម្បីបញ្ចេញនូវសក្តានុពលទាំងអស់ ប្រមូលផ្តុំធនធានទាំងអស់ រួមទាំងជនជាតិវៀតណាមនៅឯបរទេស ដើម្បីសម្រេចបាននូវគោលដៅអភិវឌ្ឍប្រទេសជាតិ។

លោស្រី Le Thi Thu Hang បានអះអាងថា បក្ស រដ្ឋ និងក្រសួងការបរទេស តែងតែយកចិត្តទុកដាក់យ៉ាងជ្រាលជ្រៅចំពោះសហគមន៍ជនវៀតណាមនៅក្រៅប្រទេស រួមទាំងកម្លាំងអ្នកជំនាញ និងបញ្ញវន្តវៀតណាមនៅបរទេសផងដែរ។ លោក To Lam អគ្គលេខាបក្ស ថ្មីៗនេះបានស្នើឱ្យក្រសួង និងស្ថាប័ននានា លើកឡើងគោលនយោបាយអនុគ្រោះពិសេស ដើម្បីទាក់ទាញអ្នកជំនាញឈានមុខយ៉ាងហោចណាស់ ១០០ នាក់ឱ្យត្រឡប់មកធ្វើការនៅក្នុងប្រទេសវិញ។ នេះជាការបង្កើតលក្ខខណ្ឌអំណោយផលសម្រាប់អ្នកជំនាញ និងបញ្ញវន្តវៀតណាមនៅឯបរទេស ចូលរួមចំណែកអភិវឌ្ឍន៍ប្រទេស។

លោកស្រី Le Thi Thu Hang តាងនាមថ្នាក់ដឹកនាំក្រសួងការបរទេស បានស្វាគមន៍ប្រតិភូវ័យក្មេងវៀតណាមនៅក្រៅប្រទេសមកចូលរួមវេទិកា

លោកស្រី Le Thi Thu Hang បានឲ្យដឹងថា នាពេលខាងមុខ ក្រសួងការបរទេសនឹងសម្របសម្រួលជាមួយក្រសួង ស្ថាប័នពាក់ព័ន្ធ ដើម្បីបន្តបង្កើតក្របខ័ណ្ឌ និងគោលនយោបាយច្បាប់អំណោយផល ដើម្បីឲ្យអ្នកជំនាញ និងបញ្ញវន្តវៀតណាមនៅក្រៅប្រទេសមានអារម្មណ៍ល្អៗ រួមចំណែកក្នុងការអភិវឌ្ឍប្រទេស កសាងបរិយាកាសការងារដោយសមភាព បើកចំហ និងទាក់ទាញ ជូនចំពោះជនជាតិវៀតណាមនៅបរទេស ហើយមានសម្ភារៈបរិក្ខារគ្រប់គ្រាន់ និងទំនើប ប្រាក់ខែសមរម្យ ដើម្បីពង្រីកសមត្ថភាពស្រាវជ្រាវ និងការច្នៃប្រឌិតរបស់ជនជាតិវៀតណាមនៅបរទេស

លោកស្រីអនុរដ្ឋមន្ត្រីបានសម្តែងក្តីសង្ឃឹមថា បញ្ញវន្តវ័យក្មេងវៀតណាមនៅក្រៅប្រទេសនឹងបន្តរួបរួម និងសមាហរណកម្មល្អក្នុងសង្គមប្រទេសសាមី លើកកំពស់តួនាទីសកម្មក្នុងសហគមន៍ និងជាស្ពានតភ្ជាប់ទំនាក់ទំនងមិត្តភាពរវាងវៀតណាម និងប្រទេសផ្សេងៗ។ ទន្ទឹមនឹងនោះ បន្តចូលរួមចំណែកជាធនធាន និងបញ្ញាក្នុងការអភិវឌ្ឍប្រទេស តាមរូបភាពជាច្រើនដូចជា៖ រួមចំណែកពីចម្ងាយតាមរយៈការបង្រៀន ការផ្លាស់ប្តូរបទពិសោធន៍ ការចែករំលែកអាថ៌កំបាំងបច្ចេកវិទ្យា ទំនាក់ទំនងជាមួយសាជីវកម្មបរទេស និងស្ថាប័នស្រាវជ្រាវ គាំទ្រការបណ្តុះបណ្តាលធនធានមនុស្ស... ឬត្រឡប់មកប្រទេសដោយផ្ទាល់ដើម្បីស្រាវជ្រាវ ធ្វើការ ចាប់ផ្តើមអាជីវកម្ម និងចូលរួមក្នុងគម្រោងសំខាន់ៗរបស់ប្រទេស៕

បកប្រែដោយ Duy Hoan