លោក Vo Van Thuong ប្រធានរដ្ឋវៀតណាម ទទួលជួបគណៈប្រតិភូជាន់ខ្ពស់បក្សកុម្មុយនិស្តគុយបា

នារសៀលថ្ងៃទី៣ ឧសភា នៅវិមានប្រធានរដ្ឋ លោក Vo Van Thuong ប្រធានរដ្ឋវៀតណាម បានទទួលជួបគណៈប្រតិភូជាន់ខ្ពស់បក្សកុម្មុយនិស្តគុយបា។

លោក Vo Van Thuong ប្រធានរដ្ឋវៀតណាម បានសម្តែងក្តីរីករាយចំពោះការអភិវឌ្ឍដ៏ល្អនៃទំនាក់ទំនងរវាងបក្សទាំងពីរ និងប្រទេសទាំងពីរ ក្នុងរយៈពេលប៉ុន្មានឆ្នាំកន្លងមកនេះ អះអាងនូវទំនាក់ទំនងសាមគ្គីភាពពិសេស និងជាគំរូល្អរវាងវៀតណាម និងគុយបា ដែលត្រូវបានកសាងឡើងដោយលោកប្រធានហូជីមិញ និងលោកប្រធាន Fidel Castro និងត្រូវបានពូនជ្រំដោយថ្នាក់ដឹកនាំ និងប្រជាជនគ្រប់ជំនាន់នៃប្រទេសទាំងពីរ គឺជាទ្រព្យសម្បត្តិដែលមិនអាចកាត់ថ្លៃបាន និងជាប្រភពនៃកម្លាំងដ៏ខ្លាំងក្លារបស់ប្រជាជាតិទាំងពីរ ដែលគួរតែត្រូវបានរក្សា និងបន្តរីកចម្រើនកាន់តែខ្លាំងក្នុងស្ថានភាពថ្មី។

លោក Vo Van Thuong ប្រធានរដ្ឋវៀតណាម  និងលោក Roberto Morales Ojeda លេខាប្រចាំការនៃគណៈលេខាមជ្ឈិមបក្សកុម្មុយនិស្តគុយបា (រូប​ថត៖ vnanet.vn)

លោក Vo Van Thuong ប្រធានរដ្ឋវៀតណាម បានសម្តែងនូវជំនឿយ៉ាងមុតមាំថា ដោយមានស្មារតីបដិវត្តន៍ខ្លាំងក្លា ភាពក្លាហាន និងបទពិសោធន៍នៃការដឹកនាំដ៏ឈ្លាសវៃ និងការគាំទ្រដ៏ធំធេងរបស់ប្រជាជនគុយបា បណ្តាកងកម្លាំងជឿនលឿន និងមិត្តភក្តិអន្តរជាតិនោះ បក្ស រដ្ឋ និងប្រជាជនគុយបា នឹងបន្តទទួលបានជោគជ័យធំជាងមុនលើមាគ៌ាការពារសមិទ្ធផលបដិវត្តន៍ កសាងសង្គមនិយម។

លោក Roberto Morales Ojeda បានសម្តែងនូវសេចក្តីសោមនស្សរីករាយ និងចំណាប់អារម្មណ៍យ៉ាងខ្លាំងដោយបានដឹកនាំគណៈប្រតិភូជាន់ខ្ពស់បក្សកុម្មុយនិស្តគុយបា អញ្ជើញមកបំពេញទស្សនកិច្ចនៅវៀតណាម និងបានឃើញការផ្លាស់ប្ដូរដ៏អស្ចារ្យនៃកិច្ចការផ្លាស់ប្តូរថ្មីនៅវៀតណាម។ លោកបានសម្តែងការកោតសរសើរចំពោះប្រពៃណីប្រវត្តិសាស្ត្រ នៃការតស៊ូដើម្បីឯករាជ្យជាតិរបស់ប្រជាជនវៀតណាម និងសមិទ្ធផលដ៏ធំធេង មានអត្ថន័យជាប្រវត្តិសាស្ត្ររបស់ប្រជាជនវៀតណាមក្នុងកិច្ចការផ្លាស់ប្តូរថ្មីដែលដឹកនាំដោយបក្សកុម្មុយនិស្តវៀតណាម និងវាយតំលៃខ្ពស់​ចំពោះ​សមិទ្ធផលធំៗរបស់វៀតណាម រួម​ទាំង​គំរូផ្លាស់ប្តូរថ្មី និងមាគ៌ាឆ្ពោះទៅកសាងសង្គមនិយម គឺជាការអនុវត្តប្រកបដោយភាពច្នៃប្រឌិត នៃលទ្ធិម៉ាក្ស-លេនីន និងសតិអារម្មណ៍របស់​លោក​ប្រធាន​ហូជីមិញទៅក្នុងលក្ខខណ្ឌជាក់លាក់ និងជាក់ស្តែងនៅវៀតណាម។

ទិដ្ឋភាពនៃជំនួប (រូប​ថត៖ vnanet.vn)

លោក Roberto Morales Ojeda បានអះអាងថា បក្ស រដ្ឋ និងប្រជាជនគុយបាយកចិត្តទុកដាក់ជាពិសេសក្នុងការពង្រឹងទំនាក់ទំនងសាមគ្គីភាពពិសេសជាមួយវៀតណាម ដែលតែងតែចែករំលែកការលំបាក និងបញ្ហាប្រឈមរបស់គុយបា ហើយសង្កត់ធ្ងន់ថា គុយបាមានឆន្ទៈបង្កើតលក្ខខណ្ឌអំណោយផលសម្រាប់សហគ្រាសវៀតណាមមកបណ្តាក់ទុននៅគុយបា។ លោកក៏សង្កត់ធ្ងន់ផងដែរថា ភាគីទាំងពីរគួរតែបន្តពង្រឹង និងធ្វើឲ្យស៊ីជម្រៅថែមទៀតនូវចំណងមិត្តភាពពិសេសដែលបានកសាងឡើងដោយលោកប្រធានហូជីមិញ និងលោកប្រធាន Fidel Castro ហើយបន្តផ្ទេរទៅជំនាន់ក្រោយៗទៀត៕

បកប្រែដោយ Duy Hoan