វៀតណាមមានបំណងចង់ពង្រឹងថែមទៀតនូវទំនាក់ទំនងភាពជាដៃគូគ្រប់ជ្រុងជ្រោយជាមួយសហរដ្ឋអាមេរិក
កប.អនឡាញ - នារសៀលថ្ងៃទី ១៥ ខែមេសា នៅទីស្នាក់ការមជ្ឈិមបក្ស លោក Nguyen Phu Trong អគ្គលេខាបក្សកុម្មុយនិស្ដវៀតណាម បានទទួលជួបលោក Daniel Kritenbrink ឯកអគ្គរដ្ឋទូតសហរដ្ឋអាមេរិក ប្រចាំវៀតណាម ដែលមកជម្រាបលាក្នុងឱកាសលោកបញ្ចប់បេសកកម្មការទូតនៅប្រទេសវៀតណាម។
នៅក្នុងជំនួបនេះ លោកអគ្គលេខាបក្ស Nguyen Phu Trong បានវាយតម្លៃខ្ពស់ចំពោះការរួមវិភាគទានរបស់លោកឯកអគ្គរដ្ឋទូតក្នុងការអភិវឌ្ឍជាក់ស្តែង និងប្រសិទ្ធភាពនៃទំនាក់ទំនងទ្វេភាគី។ ជាមួយនឹងគោលនយោបាយការបរទេសប្រកបដោយឯករាជ្យ ស្វ័យភាព សន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ ពហុភាគីនីយកម្មនៃទំនាក់ទំនងការបរទេស និងចូលរួមយ៉ាងសកម្មក្នុងការធ្វើសមាហរណកម្មអន្តរជាតិ វៀតណាមមានបំណងចង់ពង្រឹងថែមទៀតនូវទំនាក់ទំនងភាពជាដៃគូគ្រប់ជ្រុងជ្រោយរវាងវៀតណាម និងសហរដ្ឋអាមេរិក។
|
|
លោក Nguyen Phu Trong អគ្គលេខាបក្សកុម្មុយនិស្ដវៀតណាម ទទួលជួបលោក Daniel Kritenbrink ឯកអគ្គរដ្ឋទូតសហរដ្ឋអាមេរិក ប្រចាំវៀតណាម (រូបថត៖ vnanet.vn) |
លោកឯកអគ្គរដ្ឋទូត Daniel Kritenbrink បានអបអរសាទរលោកអគ្គលេខាបក្ស Nguyen Phu Trong និងថ្នាក់ដឹកនាំថ្មីនៃបក្សកុម្មុយនិស្តវៀតណាម។ លោកបានវាយតំលៃខ្ពស់ចំពោះការរីកចម្រើនយ៉ាងស្វាហាប់ តួនាទី និងកិត្យានុភាព ក៏ដូចជាការរួមវិភាគទានយ៉ាងសកម្មរបស់វៀតណាម ក្នុងបញ្ហាតំបន់ និងពិភពលោក។ ព្រមទាំងលោកជឿជាក់ថា ក្រោមការដឹកនាំរបស់ថ្នាក់ដឹកនាំថ្មី វៀតណាមនឹងបន្តមានការអភិវឌ្ឍយ៉ាងខ្លាំងក្លាថែមទៀត។
លោកឯកអគ្គរដ្ឋទូត Daniel Kritenbrink បានសម្តែងនូវក្តីសោមនស្សរីករាយដោយបានឃើញការអភិវឌ្ឍយ៉ាងវិជ្ជមាន និងមានប្រសិទ្ធិភាពនៃទំនាក់ទំនងវៀតណាម - សហរដ្ឋអាមេរិក ក្នុងរយៈពេលកន្លងមក ព្រមទាំងបញ្ជាក់សាជាថ្មីថា សហរដ្ឋអាមេរិកយកចិត្តទុកដាក់យ៉ាងខ្លាំង និងមានបំណងចង់ពង្រឹង និងធ្វើឲ្យប្រសើរថែមទៀតនូវទំនាក់ទំនងភាពជាដៃគូគ្រប់ជ្រុងជ្រោយជាមួយវៀតណាម ដោយឈរលើមូលដ្ឋានគោរពឯករាជ្យភាព អធិបតេយ្យភាព បូរណភាពទឹកដី និងរបបនយោបាយរបស់គ្នាទៅវិញទៅមក។ លោកឯកអគ្គរដ្ឋទូត បានសន្យាថា នាពេលខាងមុខក្នុងឋានៈណាក៏ដោយក៏លោកនឹងបន្តគាំទ្រ និងរួមចំណែកដល់ទំនាក់ទំនងវៀតណាម - សហរដ្ឋអាមេរិក។
ក្នុងឱកាសនេះដែរ លោកអគ្គលេខាបក្ស Nguyen Phu Trong បានស្នើឲ្យលោកឯកអគ្គរដ្ឋទូត Daniel Kritenbrink ពាំនាំការថ្លែងអំណរគុណជូនចំពោះប្រធានាធិបតីសហរដ្ឋអាមេរិក លោក Joe Biden ដែលបានផ្ញើសារអបអរសាទរលោកដែលត្រូវបានបោះឆ្នោតជ្រើសតាំងជាអគ្គលេខាបក្សកុម្មុយនិស្តវៀតណាម ព្រមទាំងលោកសូមអញ្ជើញលោកប្រធានាធិបតីសហរដ្ឋអាមេរិក មកបំពេញទស្សនកិច្ចនៅប្រទេសវៀតណាមនាពេលឆាប់ៗនេះ៕
បកប្រែដោយ Pham Diep