ជំរុញកិច្ចសហប្រតិបត្តិការ វៀតណាម-ទីម័រខាងកើត

រដ្ឋមន្រ្តីក្រសួងការបរទេស និងសហប្រតិបត្តិការទីម័រខាងកើត លោក Adaljiza Albertina Xavier Reis Magno បានអបអរសាទរចំពោះជោគជ័យរបស់វៀតណាមក្នុងតួនាទីជាប្រធានអាស៊ានឆ្នាំ២០២០។ លោក Adaljiza Albertina Xavier Reis Magno ក៏បានថ្លែងអំណរគុណការគាំទ្ររបស់វៀតណាមចំពោះទីម័រខាងកើត រួមទាំងការនាំចេញអង្ករទៅកាន់​ទីម័រខាងកើតដែលរួមចំណែកជួយទីម័រខាងកើត​រក្សាស្ថិរភាពសន្តិសុខស្បៀងនៅក្នុងប្រទេស។

ឧបនាយករដ្ឋមន្ត្រី និងជារដ្ឋមន្រ្តីក្រសួងការបរទេសវៀតណាម លោក Pham Binh Minh ជួបសន្ទនាតាមប្រព័ន្ធវីដេអូជាមួយរដ្ឋមន្រ្តីក្រសួងការបរទេស និងសហប្រតិបត្តិការទីម័រខាងកើត លោក Adaljiza Albertina Xavier Reis Magno (រូបថត៖ vnanet.vn)

ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេសវៀតណាម លោក Pham Binh Minh បានសម្តែងក្តីរីករាយដែលការផ្លាស់ប្តូរពាណិជ្ជកម្មរវាងប្រទេសទាំងពីរបន្តកើនឡើង សូម្បីតែនៅក្នុងបរិបទនៃការរីករាលដាលនៃ Covid-19 ប៉ះពាល់ដល់កំណើនសេដ្ឋកិច្ចពិភពលោកក៏ដោយ។ លោកបានបញ្ជាក់ថា វៀតណាមត្រៀមខ្លួនជាស្រេចគាំទ្រ និងសហប្រតិបត្តិការយ៉ាងសកម្មលើវិស័យដែលទីម័រខាងកើតត្រូវការដូចជា កសិកម្ម ជលផល ប្រេងនិងឧស្ម័ន។ល។ លោក Pham Binh Minh បានសង្កត់ធ្ងន់ថា ភាគីទាំងពីរចាំបាច់ត្រូវបង្កើត និងអនុវត្តនូវយន្តការ និងវិធានការណ៍ជាក់លាក់ ដើម្បីទាញយកផលប្រយោជន៍ពីសក្តានុពលនៃកិច្ចសហប្រតិបត្តិការរវាងប្រទេសទាំងពីរ។ នាពេលខាងមុខ លោក Pham Binh Minh បានស្នើឲ្យទីម័រខាងកើតផ្តល់សច្ចាប័នលើកិច្ចព្រមព្រៀងពាណិជ្ជកម្មទ្វេភាគីដែលបានចុះហត្ថលេខានៅឆ្នាំ ២០១៣ និងចុះហត្ថលេខាលើកិច្ចព្រមព្រៀងគាំពារការវិនិយោគទ្វេភាគី កិច្ចព្រមព្រៀងទ្វេភាគីស្តីពីការលើកលែងទិដ្ឋាការសម្រាប់អ្នកកាន់លិខិតឆ្លងដែនការទូតនិងផ្លូវការ; ជួយសម្រួលដល់អង្គភាពអាជីវកម្មវៀតណាម។ល។

ទិដ្ឋភាពនៃកិច្ចសន្ទនា (រូបថត៖ vnanet.vn)

រដ្ឋមន្រ្តីទាំងពីរបានឯកភាពគ្នាពង្រឹងតួនាទីជាស្ពានតភ្ជាប់របស់ក្រសួងការបរទេសទាំងពីរក្នុងការជំរុញកិច្ចសហប្រតិបត្តិការលើគ្រប់វិស័យ រួមទាំងការជំរុញការផ្លាស់ប្តូរគណៈប្រតិភូគ្រប់ជាន់ថ្នាក់ និងអនុវត្តយន្តការនៃគណៈកម្មាធិការចំរុះស្តីពីកិច្ចសហប្រតិបត្តិការទ្វេភាគីក្នុងពេល​ឆាប់ៗដើម្បីបង្កើតក្របខ័ណ្ឌសម្រាប់ការជំរុញកិច្ចសហប្រតិបត្តិការលើវិស័យដែលភាគីទាំងពីរមានសក្តានុពល និងតម្រូវការ។ ភាគីទាំងពីរបានឯកភាពគ្នាសហការក្នុងការអនុវត្តប្រកបដោយប្រសិទ្ធភាពនូវកិច្ចព្រមព្រៀងសហប្រតិបត្តិការពាណិជ្ជកម្មអង្ករ ដែលបានចុះហត្ថលេខានៅឆ្នាំ ២០១៥  និងបង្កើតលក្ខខណ្ឌអំណោយផលសម្រាប់និស្សិតទីម័រខាងកើតមកសិក្សានៅប្រទេសវៀតណាម។ ភាគីទាំងពីរបានបញ្ជាក់ពីការបន្តកិច្ចសហប្រតិបត្តិការ និងការគាំទ្រគ្នាទៅវិញទៅមកនៅអង្គការ និងវេទិកាតំបន់ និងអន្តរជាតិ ជាពិសេសនៅអង្គការសហប្រជាជាតិ។ ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេស លោក Pham Binh Minh បានស្វាគមន៍ និងគាំទ្រដល់សេចក្តីប្រាថ្នារបស់ទីម័រខាងកើតក្នុងការចូលរួមអាស៊ាន៕

បកប្រែដោយ Huyen Trang