វៀតណាមធ្វើជាអធិបតីនៃកិច្ចប្រជុំក្រុមបណ្តាប្រទេសជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ
កប.អនឡាញ - នាថ្ងៃទី ២៥ ខែវិច្ឆិកា វៀតណាមបានអញ្ជើញជាអធិបតីភាព រួមជាមួយន័រវែស និងអាហ្វ្រិកខាងត្បូង រៀបចំកិច្ចប្រជុំប្រទេសទាំង១០ ដែលជាសមាជិកមិនអចិន្រ្តៃយ៍កំពុងកាន់តំណែង (E10) និងប្រទេសចំនួន ៥ ដែលជាសមាជិកមិនអចិន្រ្តៃយ៍ទើបជាប់ឆ្នោត (I5) ក្រោមប្រធានបទ “កិច្ចខិតខំប្រឹងប្រែងរួមគ្នាដើម្បីក្រុមប្រឹក្សាសន្តិសុខអង្គការសហប្រជាជាតិប្រកបដោយប្រសិទ្ធភាព៖ បទពិសោធន៍ និងមេរៀនល្អៗ សម្រាប់សមាជិកមិនអចិន្រ្តៃយ៍ដែលទើបជាប់ឆ្នោត” តាមប្រព័ន្ធវីដេអូ និងការជួបជុំដោយផ្ទាល់នៅទីក្រុងហាណូយ។
កិច្ចប្រជុំនេះមានការចូលរួមពីប្រតិភូអន្តរជាតិ និងក្នុងស្រុកជាង ១០០ នាក់ តំណាងប្រទេស E10-I5 នៅឯរដ្ឋធានីហាណូយ គណៈប្រតិភូនៅទីក្រុងញូវយ៉ក និងតំណាងស្ថានទូតនៃប្រទេសនានាប្រចាំទីក្រុងហាណូយ រួមទាំងក្រសួង ស្ថាប័ននានាដែលចំណុះក្រុមការងារអន្តរក្រសួងស្តីពីក្រុមប្រឹក្សាសន្តិសុខផងដែរ។
|
|
ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេសវៀតណាម លោក Pham Binh Minh ថ្លែងក្នុងកិច្ចប្រជុំ (រូបថត៖ baochinhphu.vn) |
ព្រឹត្តិការណ៍នេះមានអត្ថន័យសំខាន់ និងជាក់លាក់ព្រោះនេះជាកិច្ចប្រជុំអន្តរជាតិជាលើកដំបូងដែលរៀបចំឡើងដោយវៀតណាមក្នុងក្របខ័ណ្ឌក្រុមប្រឹក្សាសន្តិសុខអង្គការសហប្រជាជាតិចាប់តាំងពីអាណត្តិដំបូង (២០០៨-២០០៩) រហូតមកទល់បច្ចុប្បន្ននេះ ដែលបង្ហាញពីការចូលរួមចំណែកយ៉ាងសកម្មរបស់វៀតណាម និងការជំរុញកិច្ចសហប្រតិបត្តិការរវាងបណ្តាប្រទេស E10 ដើម្បីលើកកំពស់ប្រសិទ្ធភាពនៃសកម្មភាពរបស់ក្រុមប្រឹក្សាសន្តិសុខក្នុងការថែរក្សាសន្តិភាព និងសន្តិសុខអន្តរជាតិ។
ថ្លែងសុន្ទរកថានៅឯទីក្រុងហាណូយ ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេសវៀតណាម លោក Pham Binh Minh បានបញ្ជាក់ថា ឆ្នាំ ២០២០ គឺជាឆ្នាំដ៏លំបាកសម្រាប់សហគមន៍អន្តរជាតិ។ ក្នុងបរិបទនោះ លោកឧបនាយករដ្ឋមន្រ្តីបានស្វាគមន៍ចំពោះកិច្ចខិតខំប្រឹងប្រែងរួមគ្នារបស់សហគមន៍អន្តរជាតិក្នុងការថែរក្សាសន្តិភាព កិច្ចសហប្រតិបត្តិការ និងការអភិវឌ្ឍ ដោយបញ្ជាក់ពីជំនឿទំនុកចិត្តរបស់បណ្តាប្រទេសជាសមាជិកអង្គការសហប្រជាជាតិលើតួនាទីដ៏សំខាន់របស់ពហុភាគីនិយម និងតួនាទីសម្របសម្រួលរបស់អង្គការសហប្រជាជាតិក្នុងកិច្ចការពិភពលោក។ លោកឧបនាយករដ្ឋមន្ត្រីក៏បានសង្កត់ធ្ងន់លើការប្តេជ្ញាចិត្ត និងអាទិភាពរបស់វៀតណាមនៅក្រុមប្រឹក្សាសន្តិសុខក្នុងអាណត្តិរបស់ខ្លួនដូចជា៖ ការលើកកម្ពស់ពហុភាគីនិយម និងដំណោះស្រាយពហុភាគីដើម្បីដោះស្រាយជម្លោះ; ពង្រឹងការសន្យាអន្តរជាតិ និងការគោរពធម្មនុញ្ញអង្គការសហប្រជាជាតិ និងច្បាប់អន្តរជាតិ; ជំរុញកិច្ចសហប្រតិបត្តិការរវាងអង្គការសហប្រជាជាតិ និងអង្គការក្នុងតំបន់ និងមហាអនុតំបន់; ការបង្ការទប់ស្កាត់ជម្លោះ; ការពារជនស៊ីវិល ជាពិសេសក្រុមជនងាយរងគ្រោះ និងហេដ្ឋារចនាសម្ព័ន្ធសំខាន់ៗក្នុងជម្លោះប្រដាប់អាវុធ និងការស្ថាបនាឡើងវិញបន្ទាប់ពីជម្លោះ រួមទាំងការជំនះគ្រាប់បែក និងគ្រាប់មីនជាដើម៕
បកប្រែដោយ Duy Hoan