ជំរុញទំនាក់ទំនង វៀតណាម - ម៉ាឡេស៊ី ឱ្យកាន់តែស៊ីជម្រៅពីមួយថ្ងៃទៅមួយថ្ងៃ
កប.អនឡាញ - នារសៀលថ្ងៃទី ២៣ ខែតុលា នៅទីស្នាក់ការក្រសួងការបរទេស ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេសវៀតណាម លោក Pham Binh Minh បានជួបសន្ទនាជាមួយរដ្ឋមន្រ្តីក្រសួងការបរទេសម៉ាឡេស៊ី លោក Hishammuddin Hussein តាមរយៈប្រព័ន្ធវីដេអូ។
នៅក្នុងកិច្ចសន្ទនា លោករដ្ឋមន្ត្រី Hishammuddin Hussein បានអះអាងថា ម៉ាឡេស៊ី មានគោលបំណងចង់ជំរុញទំនាក់ទំនងភាពជាដៃគូយុទ្ធសាស្ត្រ រវាងប្រទេសទាំងពីរឲ្យកាន់តែស៊ីជម្រៅលើគ្រប់វិស័យ។ លោកបានអបអរសាទរចំពោះជោគជ័យរបស់វៀតណាម ក្នុងការបង្ការ និងប្រយុទ្ធប្រឆាំងនឹងជំងឺរាតត្បាត Covid-19 ព្រមទាំងស្នើឱ្យប្រទេសទាំងពីររៀបចំលក្ខណចាំបាច់ទាំងអស់ដើម្បីបើកឲ្យមានការហោះហើរត្រង់ឡើងវិញនាពេលឆាប់ៗ។ លោករដ្ឋមន្ត្រីការបរទេស ម៉ាឡេស៊ី ក៏បានអបអរសាទរវៀតណាម ចំពោះជោគជ័យក្នុងនាមជាប្រធានអាស៊ាន និងជាសមាជិកមិនអចិន្រ្តៃយ៍នៃក្រុមប្រឹក្សាសន្តិសុខ អង្គការសហប្រជាជាតិ តាំងពីដើមឆ្នាំមក ជាពិសេស វៀតណាម បានរៀបចំបណ្តាកិច្ចប្រជុំរបស់អាស៊ានប្រកបដោយជោគជ័យ ក្នុងបរិបទនៃការវិវឌ្ឍដ៏ស្មុគស្មាញនៅក្នុងតំបន់ និងនៅលើពិភព។ វៀតណាម រក្សាបានសាមគ្គីភាព និងតួនាទីជាមជ្ឈភាពរបស់អាស៊ាន ក៏ដូចជាបានជំរុញកិច្ចសហប្រតិបត្តិការរវាងអាស៊ាន និងដៃគូនានា។ រដ្ឋមន្រ្តីក្រសួងការបរទេសម៉ាឡេស៊ី លោក Hishammuddin ក៏បានសួរសុខទុក្ខអំពីស្ថានភាពទឹកជំនន់នៅតាមបណ្តាខេត្តភាគកណ្តាលនៃប្រទេសវៀតណាម ព្រមទាំងអះអាងថា ម៉ាឡេស៊ី ត្រៀមខ្លួនជាស្រេចជួយឧបត្ថម្ភវៀតណាម អស់ពីសមត្ថភាពតាមតែអាចធ្វើទៅបាន។
|
|
ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេសវៀតណាម លោក Pham Binh Minh (រូបថត៖ vnanet.vn) |
ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេសវៀតណាម លោក Pham Binh Minh បានថ្លែងអំណរគុណចំពោះប្រទេសម៉ាឡេស៊ី ដែលបានគាំទ្រ និងជួយសម្របសម្រួលឲ្យមានជើងហោះហើរបញ្ជូនពលរដ្ឋវៀតណាម ឲ្យវិលត្រឡប់មកប្រទេសវិញ។ វៀតណាមសន្យាថា នឹងបន្តបង្កលក្ខណៈងាយស្រួលដល់វិនិយោគិន អ្នកជំនាញ និងកម្មករដែលមានសមត្ថភាពខ្ពស់ពីបណ្តាប្រទេស ដែលក្នុងនោះមានប្រទេសម៉ាឡេស៊ី ដើម្បីចូលធ្វើការនៅ វៀតណាម។ លោក Pham Binh Minh ក៏បានស្នើឲ្យម៉ាឡេស៊ី បន្តមានទង្វើមនុស្សធម៌ចំពោះអ្នកនេសាទវៀតណាម ដែលត្រូវបានចាប់ខ្លួននៅ ម៉ាឡេស៊ី ស្របតាមច្បាប់អន្តរជាតិ ក្នុងស្មារតីសាមគ្គីភាពអាស៊ាន។
ភាគីទាំងពីរបានឯកភាពថា នឹងបញ្ចប់កម្មវិធីសកម្មភាពដើម្បីអនុវត្តទំនាក់ទំនងភាពជាដៃគូយុទ្ធសាស្ត្រដំណាក់កាល ២០២០-២០២៥។ ភាគីទាំងពីរក៏បានឯកភាពបង្កើនការផ្លាស់ប្តូរទ្វេភាគី និងជាមួយបណ្តាប្រទេសអាស៊ាន លើបញ្ហាតំបន់ និងអន្តរជាតិ ដែលមានការយកចិត្តទុកដាក់ដូចគ្នា រួមទាំងបញ្ហាសមុទ្រខាងកើត និងសម្របសម្រួលយ៉ាងជិតស្និទ្ធដើម្បីរៀបចំកិច្ចប្រជុំកំពូលអាស៊ាន និង APEC នៅខែវិច្ឆិកា ខាងមុខនេះប្រកបដោយជោគជ័យ៕
បកប្រែដោយ Thanh Cong