ថ្លែងមតិក្នុងពិធីបើកសម័យប្រជុំលើកទី១០ រដ្ឋសភានីតិកាលទី ១៤ ប្រធានរដ្ឋសភាវៀតណាម លោកស្រី Nguyen Thi Kim Ngan បានសង្កត់ធ្ងន់ថា សម័យប្រជុំលើកទី ១០ នេះបានប្រព្រឹត្តទៅក្នុងបរិបទដែលស្ថានភាពពិភពលោក និងក្នុងស្រុកមានការវិវឌ្ឍយ៉ាងស្មុគស្មាញ និងមិនអាចប៉ាន់ស្មានបាន។ ជំងឺរាតត្បាតកូវីដ១៩ បានផ្ទុះឡើងយ៉ាងខ្លាំងនៅលើពិភពលោក សេដ្ឋកិច្ចពិភពលោកបានធ្លាក់ចុះ។ ប្រទេសទាំងមូលបានអនុវត្តគោលដៅ ភារកិច្ច និងដំណោះស្រាយជាច្រើនដើម្បីគ្រប់គ្រងរោគរាតត្បាត បង្កើតលក្ខខណ្ឌអំណោយផលសម្រាប់ការស្តារឡើងវិញ និងការអភិវឌ្ឍសេដ្ឋកិច្ចសង្គម។ តាមការប៉ាន់ស្មាន អត្រាកំណើនសេដ្ឋកិច្ចពេញមួយឆ្នាំមានជាង ២% ដែលជាអត្រាកំណើនវិជ្ជមានបើប្រៀបធៀបនឹងប្រទេសជាច្រើននៅលើពិភពលោក និងក្នុងតំបន់។
ប្រធានរដ្ឋសភា លោកស្រី Nguyen Thi Kim Ngan បានសង្កត់ធ្ងន់ថា៖ “រដ្ឋសភានឹងអនុម័តសេចក្តីព្រាងច្បាប់ចំនួន ៧, សេចក្តីព្រាងសម្រេចចិត្តចំនួន ៣ និងផ្តល់យោបល់លើសេចក្តីព្រាងច្បាប់ចំនួន ៤ ផ្សេងទៀត ដើម្បីធានាបានល្អថែមទៀតនូវសិទ្ធិមនុស្ស សិទ្ធិពលរដ្ឋ ការពារមាតុភូមិ រក្សាសន្តិសុខសណ្តាប់ធ្នាប់សង្គម បំពេញតាមតម្រូវការអភិវឌ្ឍន៍សេដ្ឋកិច្ចសង្គម និងការធ្វើសមាហរណកម្មអន្តរជាតិ។ រដ្ឋសភានឹងពិចារណា ហើយអនុម័តសេចក្តីសម្រេចចិត្តស្តីពីការចូលរួមកម្លាំងរក្សាសន្តិភាពរបស់អង្គការសហប្រជាជាតិ - នេះគឺជាការងារដ៏មានអត្ថន័យមួយដែលបង្ហាញពីស្មារតីមនុស្សធម៌ និងការប្តេជ្ញាចិត្តនយោបាយប្រកបដោយចីរភាព និងយូរអង្វែងរបស់បក្ស រដ្ឋ ស្តីពីការបំពេញបេសកកម្មរក្សាសន្តិភាពអន្តរជាតិ។ ប្រការនេះបានបញ្ជាក់បន្ថែមទៀតថា វៀតណាមចូលរួមយ៉ាងសកម្ម និងមានទំនួលខុសត្រូវចំពោះសហគមន៍អន្តរជាតិ។ រដ្ឋសភានឹងពិភាក្សា និងផ្តល់យោបល់លើសេចក្តីព្រាងឯកសារដែលនឹងដាក់ជូនមហាសន្និបាតបក្សលើកទី ១៣ ព្រមទាំងកំណត់ថ្ងៃបោះឆ្នោតសកលសំរាប់ការបោះឆ្នោតជ្រើសតាំងសមាជិកសភានីតិកាលទី១៥ នៃរដ្ឋសភា និងការបោះឆ្នោតជ្រើសរើសសមាជិកក្រុមប្រឹក្សាប្រជាជនគ្រប់លំដាប់ថ្នាក់សម្រាប់អាណត្តិ ២០២១-២០២៦។
នៅក្នុងសម័យប្រជុំនេះ លោកនាយករដ្ឋមន្រ្តី Nguyen Xuan Phuc បានបង្ហាញរបាយការណ៍ស្តីពីការអនុវត្តផែនការអភិវឌ្ឍន៍សេដ្ឋកិច្ចសង្គមសម្រាប់ឆ្នាំ ២០២០ និងរយៈពេល ៥ ឆ្នាំ (២០១៦-២០២០); គម្រោងអភិវឌ្ឍន៍សេដ្ឋកិច្ចសង្គមសម្រាប់ឆ្នាំ២០២១, ទិសដៅសំខាន់ៗ ភារកិច្ច និងដំណោះស្រាយមួយចំនួនសម្រាប់ការអភិវឌ្ឍន៍សេដ្ឋកិច្ចសង្គមក្នុងដំណាក់កាល ២០២១ - ២០២៥។ ប្រធានគណៈកម្មាធិការមជ្ឈិមរណសិរ្សមាតុភូមិវៀតណាម លោក Tran Thanh Man បង្ហាញរបាយការណ៍បូកសរុបមតិយោបល់ពីអ្នកបោះឆ្នោត និងប្រជាជនដែលដាក់ជូនសម័យប្រជុំលើកទី ១០ រដ្ឋសភា នីតិកាលទី ១៤ ៕
បកប្រែដោយ Duy Hoan
Type the code from the image