ពង្រឹងកិច្ចសហប្រតិបត្តិការរវាងបក្សកុម្មុយនីស្តវៀតណាមនិងគណៈបក្សពលកម្មម៉ិកស៊ិក
កប.អនឡាញ - នៅថ្ងៃទី ១៨ ខែកញ្ញា លោក Hoang Binh Quan សមាជិកគណៈកម្មាធិការមជ្ឈិមបក្ស ប្រធានគណៈទាក់ទងបរទេសមជ្ឈិមបក្សកុម្មុយនីស្តវៀតណាម បានជួបសន្ទនាជាមួយលោក Alberto Anaya អគ្គលេខាគណៈបក្សពលកម្មម៉ិកស៊ិក តាមរយៈប្រព័ន្ធវីដេអូ ដើម្បីពង្រឹងទំនាក់ទំនង មិត្តភាពជាប្រពៃណីនិងកិច្ចសហប្រតិបត្តិការរវាងបក្ស និងប្រជាជននៃប្រទេសទាំងពីរក្នុងបរិបទនៃការរីករាលដាលនៃ Covid-19 ដែលកំពុងមានការវិវឌ្ឍយ៉ាងស្មុគស្មាញ។
|
|
ទីដ្ឋភាពនៃជំនួបសន្ទនា (រូបថត៖ vnanet.vn) |
លោក Hoang Binh Quan បានវាយតម្លៃខ្ពស់ចំពោះកិច្ចសហប្រតិបត្តិការរវាងបក្សទាំងពីរ។ លោកថ្លែងអំណរគុណយ៉ាងជ្រាលជ្រៅចំពោះការគាំទ្ររបស់លោក Alberto Anaya និងគណៈបក្សពលកម្មម៉ិកស៊ិកសម្រាប់ប្រទេសវៀតណាម ជាពិសេសការគាំទ្រវៀតណាមចំពោះបញ្ហាសមុទ្រខាងកើត ការជំរុញទំនាក់ទំនងទ្វេភាគី និងការអនុវត្ដប្រកបដោយប្រសិទ្ធភាពនូវកិច្ចព្រមព្រៀងរវាងបក្សទាំងពីរសម្រាប់ដំណាក់កាល ២០១៩ - ២០២៤។
លោក Alberto Anaya បានអះអាងថា គណៈបក្សពលកម្មម៉ិកស៊ិក ជានិច្ចកាលគាំទ្រទស្សនៈនិងជំហររបស់វៀតណាមលើបញ្ហាសមុទ្រខាងកើតនិងគាំទ្រការដោះស្រាយជម្លោះនៅសមុទ្រខាងកើតដោយសន្តិវិធី ដោយឈរលើមូលដ្ឋានច្បាប់អន្តរជាតិ។
លោក Alberto Anaya បានបញ្ជាក់ពីបំណងចង់ពង្រីកទំនាក់ទំនងសហប្រតិបត្តិការរវាងគណៈបក្សពលកម្មម៉ិកស៊ិកនិងបក្សកុម្មុយនីស្តវៀតណាមឲ្យកាន់តែជិតស្និទ្ធថែមទៀត ហើយបង្កើតមូលដ្ឋានគ្រឹះនយោបាយដ៏សំខាន់មួយសម្រាប់ពង្រឹងទំនាក់ទំនងសហប្រតិបត្ដិការវាងរដ្ឋ រដ្ឋសភានិងប្រជាជននៃប្រទេសទាំងពីរម៉ិកស៊ិក - វៀតណាម៕
បកប្រែដោយ Pham Diep