បក្សកុម្មុយនិស្តវៀតណាមគឺជាការលើកទឹកចិត្តដ៏ធំធេងសម្រាប់ចលនាបដិវត្ត និងវឌ្ឍនភាពនៅលើពិភពលោក
កប.អនឡាញ - ការចាប់បដិសន្ធិរបស់បក្សកុម្មុយនិស្តវៀតណាមមានអត្ថន័យយ៉ាងធំធេងដោយមិនត្រឹមតែចំពោះប្រវតិ្តសាស្រ្តប្រជាជាតិវៀតណាមប៉ុណ្ណោះទេថែមទាំងសំរាប់ចលនាបដិវត្តពិភពលោកទៀតផង។ នោះគឺជាការបញ្ជាក់របស់អគ្គលេខាបក្សកុម្មុយនីស្តអាហ្សង់ទីន លោក Victor Kot ដែលជាអ្នកតែងតែផ្តល់មនោសញ្ចេតនាពិសេសចំពោះប្រជាជន និងបដិវត្តវៀតណាម។
ដោយលើកឡើងនូវតួនាទីរបស់បក្សកុម្មុយនិស្តវៀតណាមក្នុងដំណើរការកសាង និងអភិវឌ្ឍប្រទេសជាតិ លោក Victor Kot បានសង្កត់ធ្ងន់ថា ក្នុងអំឡុងពេលប្រវត្តិសាស្ត្រនៃសតវត្សរ៍ទី ២០ និងបណ្តាទសវត្សរ៍ដំបូងនៃសតវត្សរ៍ទី ២១ ប្រទេសវៀតណាមបានបង្កើតការលើកទឹកចិត្តដ៏ធំធេងសម្រាប់ការបង្កើតចលនាកុម្មុយនិស្តអន្តរជាតិ និងសម្រាប់ការតស៊ូរបស់អ្នកកុម្មុយនិស្ត និងបដិវត្ត ក៏ដូចជាប្រវត្តិសាស្រ្តរបស់មនុស្សជាតិ។ លោកអគ្គលេខាបក្ស Victor Kot បានសម្តែងនូវការកោតសរសើរ និងការគោរពចំពោះប្រវត្តិសាស្ត្រដ៏ត្រចះត្រចង់របស់បក្សកុម្មុយនិស្តវៀតណាមក្នុងរយៈពេល ៩០ ឆ្នាំកន្លងមក ក្នុងតួនាទីជាអ្នកដឹកនាំដ៏សក្តិសមដែលត្រូវបានប្រជាជនវៀតណាមទទួលស្គាល់ក្នុងប្រវត្តិសាស្ត្រនៃការតស៊ូដើម្បីឯករាជ្យជាតិ ក៏ដូចជាតួនាទីដឹកនាំ និងកិត្យានុភាពរបស់បក្សកុម្មុយនិស្តវៀតណាមលើឆាកអន្តរជាតិ។
|
|
អគ្គលេខាបក្សកុម្មុយនិស្តអាហ្សង់ទីន លោក Victor Gorodeki Kot សំណេះសំណាលជាមួយលេខារង នៃគណៈកម្មាធិការបក្សទីក្រុងហាណូយ លោកស្រី Ngo Thi Thanh Hang នៅអគាអនុស្សាវរីយ៍ នៃទីស្នាក់ការបក្សកុម្មុយនីស្តអាហ្សង់ទីន នាថ្ងៃទី ៣០ ខែតុលា ឆ្នាំ២០១៩ ។ រូបថត៖ vnanet.vn) |
យោងតាមលោកអគ្គលេខាបក្សកុម្មុយនីស្តអាហ្សង់ទីនឲ្យដឹងថា ក្រោមការដឹកនាំរបស់បក្សកុម្មុយនិស្តវៀតណាម និងការចូលរួមពីប្រជាជនវៀតណាមទាំងមូល ប្រទេសវៀតណាមទទួលបានជ័យជម្នះដ៏ធំធេងក្នុងការតស៊ូប្រឆាំងនឹងពួកអាណានិគម បើកទំព័រប្រវត្តិសាស្ត្រថ្មីសម្រាប់ប្រជាជន ដែលជាដំបូងបង្អស់គឺការចាប់បដិសន្ធិនៃសាធារណរដ្ឋប្រជាធិបតេយ្យវៀតណាម ហើយបន្ទាប់មកគឺការតស៊ូដើម្បីឯករាជ្យជាតិ និងការវាយឲ្យបរាជ័យចក្រពត្តិនិយម។ មិនត្រឹមតែប៉ុណ្ណោះទេ បន្ទាប់ពីបង្រួបបង្រួមប្រទេសជាតិ បក្សកុម្មុយនិស្តវៀតណាមបានបន្តដឹកនាំប្រទេសជាតិក្នុងការស្តារ និងអភិវឌ្ឍសេដ្ឋកិច្ចដោយមានទិសដៅត្រឹមត្រូវចាប់តាំងពីក្រោយឆ្នាំ ១៩៨៦ កសាងសង្គមថ្មីមួយដោយមានសមិទ្ធិផលលេចធ្លោជាច្រើន។
លោក Victor Kot បានមានប្រសាសន៍ថា ទោះបីនៅមានការលំបាកក៏ដោយ ក៏ជោគជ័យទាំងឡាយរបស់វៀតណាមក្នុងដំណើរការអនុវត្តការផ្លាស់ប្តូរថ្មី និងការអភិវឌ្ឍសេដ្ឋកិច្ចរបស់ប្រទេសជាតិទទួលបានការកោតសរសើរជាច្រើនពីសំណាក់សហគមន៍អន្តរជាតិ។
ទាក់ទិននឹងទំនាក់ទំនងរវាងបក្សកុម្មុយនីស្តអាហ្សង់ទីន និងវៀតណាម លោក Victor Kot មានប្រសាសន៍ថា នេះជាទំនាក់ទំនងប្រវត្តិសាស្រ្តដោយផ្អែកលើលទ្ធិម៉ាក្ស - លេនីន ដែលមានទស្សនៈស្រដៀងគ្នា មានទំនាក់ទំនងមិត្តភាពស្មោះត្រង់ និងគោរពគ្នាទៅវិញទៅមក។ ថ្នាក់ដឹកនាំនៃបក្សកុម្មុយនីស្តអាហ្សង់ទីនជាច្រើនមានទំនាក់ទំនងល្អជាមួយថា្នក់ដឹកនាំបក្សកុម្មុយនិស្តវៀតណាមដូចជា លោកប្រធានហូជីមិញ ឬលោកអគ្គលេខាបក្ស Le Duan និងថ្នាក់ដឹកនាំជាច្រើនទៀត។ ជាពិសេស ក្នុងដំណាក់កាលដែលវៀតណាមត្រូវឆ្លងកាត់ការតស៊ូប្រឆាំងនឹងចក្រពត្តិអាមេរិក ជាសម័យដែលបក្សកុម្មុយនិស្តអាហ្សង់ទីនបានប្រឹងប្រែងអស់ពីសមត្ថភាពដើម្បីជួយគាំទ្រចំពោះការតស៊ូរបស់ប្រជាជនវៀតណាម។
លោកអគ្គលេខាបក្សកុម្មុយនិស្តអាហ្សង់ទីនបានរំលឹកឡើងវិញថា នៅសម័យនោះ បក្សកុម្មុយនិស្តអាហ្សង់ទីនបានបង្កើតចលនាសាមគ្គីជាមួយវៀតណាម ហើយបានផ្សព្វផ្សាយ និងតាមដានយ៉ាងដិតដល់នូវការវិវត្តនៃការតស៊ូបដិវត្តដ៏អង់អាច់ក្លាហានរបស់ប្រជាជនវៀតណាម។
លោក Victor Kot បានបញ្ជាក់ថា ក្នុងរយៈពេលប៉ុន្មានឆ្នាំថ្មីៗនេះ ភាគីទាំងពីរបានផ្លាស់ប្តូរគណៈប្រតិភូគ្រប់លំដាប់ថ្នាក់ដើម្បីពង្រឹង និងពង្រីកទំនាក់ទំនងមិត្តភាពជាប្រណៃណី ហើយទន្ទឹមនឹងនោះក៏បង្ហាញការគាំទ្រចំពោះដំណើរការផ្លាស់ប្តូរថ្មី និងការអភិវឌ្ឍសេដ្ឋកិច្ចប្រកបដោយជោគជ័យរបស់វៀតណាម ក៏ដូចជាតួនាទីដែលកំពុងកើនឡើងរបស់វៀតណាមក្រោមការដឹកនាំរបស់បក្សកុម្មុយនិស្តវៀតណាមក្នុងទំនាក់ទំនងអន្តរជាតិ។
លោកអគ្គលេខាបក្សកុម្មុយនិស្តអាហ្សង់ទីនជឿជាក់យ៉ាងមុតមាំថា ប្រទេសវៀតណាមក្រោមការដឹកនាំប្រកបដោយគតិបណ្ឌិតរបស់បក្សកុម្មុយនិស្តវៀតណាមនឹងបន្តអនុវត្តប្រកបដោយជោគជ័យនូវយុទ្ធសាស្ត្រអភិវឌ្ឍន៍ទាំងឡាយរបស់ប្រទេសជាតិ ក៏ដូចជាទទួលបានសមិទ្ធិផលថ្មីៗនៅក្នុងការកសាងលទ្ធិសង្គមនិយម។ លោកក៏បានបង្ហាញក្តីសង្ឃឹមថា ចំណងសាមគ្គីភាព និងមិត្តភាពរវាងបក្សកុម្មុយនីស្តអាហ្សង់ទីន និងបក្សកុម្មុយនីស្តនិងវៀតណាមនឹងត្រូវបានរឹតបន្តឹង ហើយឆ្ពោះទៅរកជោគជ័យថ្មីៗថែមទៀត៕
បកប្រែដោយ Duy Hoan