ប្រធានរដ្ឋសភាវៀតណាម លោកស្រី Nguyen Thi Kim Ngan ជួបពិភាក្សាការងារជាមួយថ្នាក់ដឹកនាំនៃគណបក្សកុម្មុយនីស្តបេឡារុស្ស
កប.អនឡាញ - នាល្ងាចថ្ងៃទី ១៣ ធ្នូ តាមម៉ោងក្នុងតំបន់ ប្រធានរដ្ឋសភាវៀតណាម លោកស្រី Nguyen Thi Kim Ngan បានជួបពិភាក្សាការងារជាមួយលេខាទីមួយនៃគណបក្សកុម្មុយនីស្តបេឡារុស្ស លោក Sokol A.N និងថ្នាក់ដឹកនាំគណបក្សកុម្មុយនីស្តបេឡារុស្ស។
នៅក្នុងបរិយាកាសមិត្តភាព និងការយោគយល់គ្នាទៅវិញទៅមក លោកស្រីប្រធានរដ្ឋសភាបានសម្តែងនូវសេចក្តីរីករាយដែលបានជួបថ្នាក់ដឹកនាំ និងសមាជិកនៃគណបក្សកុម្មុយនីស្តបេឡារុស្ស និងបានពាំនាំនូវការផ្តាំផ្ញើសួរសុខទុក្ខពីថ្នាក់ដឹកនាំនៃបក្សកុម្មុយនីស្តវៀតណាមជូនចំពោះថ្នាក់ដឹកនាំនៃគណបក្សកុម្មុយនីស្តបេឡារុស្ស។
|
|
ប្រធានរដ្ឋសភាវៀតណាម លោកស្រី Nguyen Thi Kim Ngan ជួបពិភាក្សាការងារជាមួយថ្នាក់ដឹកនាំនៃគណបក្សកុម្មុយនីស្តបេឡារុស្ស |
លោកស្រីប្រធានរដ្ឋសភាបានវាយតម្លៃខ្ពស់ចំពោះទំនាក់ទំនងរវាងបក្សកុម្មុយនីស្តវៀតណាម និងគណបក្សកុម្មុយនីស្តបេឡារុស្ស។ ភាគីទាំងពីរបានផ្លាស់ប្តូរសារអបអរសាទរ និងមានជំនួបផ្លាស់ប្តូរនិងធ្វើការជាមួយគ្នាជាប្រចាំ។ លោកស្រីប្រធានរដ្ឋសភាក៏បានបង្ហាញនូវគោលបំណងចង់ឱ្យទំនាក់ទំនងរវាងបក្សកុម្មុយនិស្តទាំងពីរបន្តអភិវឌ្ឍបង្ថែមទៀត ហើយបន្តយន្តការផ្លាស់ប្តូរការពិគ្រោះយោបល់ និងសកម្មភាពផ្លាស់ប្តូរគណៈប្រតិភូនាពេលខាងមុខ។
លោកស្រីប្រធានរដ្ឋសភាបានស្នើឲ្យភាគីទាំងពីរគួរតែបង្កើនថែមទៀតនូវការផ្លាស់ប្តូរគណៈប្រតិភូ និងការជួបជុំគ្នាបន្តផ្លាស់ប្តូរព័ត៌មានស្តីពីទ្រឹស្តី និងបទពិសោធន៍នៃការងារកសាងបក្ស ហើយបន្តសម្របសម្រួលយ៉ាងជិតស្និទ្ធជាមួយគ្នាលើបណ្តាវេទិកាពហុភាគី។
លេខាទី ១ នៃគណបក្សកុម្មុយនិស្តបេឡារុស្ស លោក Sokol A.N ឲ្យដឹងថា លោកមានចំណាប់អារម្មណ៍យ៉ាងខ្លាំងចំពោះអត្រាកំណើនរបស់ប្រទេសវៀតណាមក្នុងរយៈពេលប៉ុន្មានឆ្នាំថ្មីៗនេះក្រោមការដឹកនាំរបស់បក្សកុម្មុយនិស្តវៀតណាម។ លោកសម្តែងនូវជំនឿជឿជាក់ថា កំណើនសេដ្ឋកិច្ចរបស់វៀតណាមនាបច្ចុប្បន្ននឹងមិនត្រឹមតែត្រូវបានរក្សាប៉ុណ្ណោះទេ ថែមទាំងនឹងកើនឡើងនាពេលខាងមុខទៀតផង។
លោក Sokol A.N ក៏បានជម្រាបជូនលោកស្រីប្រធានរដ្ឋសភាវៀតណាមអំពីសកម្មភាពរបស់គណបក្សកុម្មុយនីស្តបេឡារុស្សនាបច្ចុប្បន្ន។ លោកបានលើកឡើងថាចំណងសាមគ្គីភាពរវាងប្រជាជននៃប្រទេសទាំងពីរវាងគណបក្សកុម្មុយនីស្តបេឡារុស្ស និងបក្សកុម្មុយនិស្តវៀតណាមនឹងរួមចំណែកក្នុងការពង្រឹងទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការលើគ្រប់ជ្រុងជ្រោយរវាងបេឡារុស្ស និងវៀតណាម៕
បកប្រែដោយ Thanh Cong