វៀតណាមជំទាស់ចំពោះឧប្បត្តិហេតុដែលនាវាចិនបានរឹបអូសទ្រព្យសម្បត្តិអ្នកនេសាទវៀតណាមនៅប្រជុំកោះ Hoang Sa
កប.អនឡាញ - នៅឯសន្និសីទកាសែតប្រចាំនៃក្រសួងការបរទេស នៅរសៀលថ្ងៃទី២០ ខែមិថុនា ឆ្លើយសំណួរពីអ្នកយកព័ត៌មានអំពីប្រតិកម្មរបស់វៀតណាមចំពោះឧប្បត្តិហេតុនាពេលថ្មីៗនេះ គឺនាវានេសាទវៀតណាមមួយចំនួនដែលនេសាទនៅប្រជុំកោះ Hoang Sa ត្រូវបណ្តេញចេញ និងរឹបអូសទ្រព្យសម្បត្តិដោយនាវាចិន អ្នកនាំពាក្យក្រសួងការបរទេសវៀតណាមលោកស្រី Le Thi Thu Hang បានសង្កត់ធ្ងន់ថា៖ "វៀតណាមមានមូលដ្ឋានគតិយុត្តិ និងភស្តុតាងជាប្រវត្តិសាស្ត្រពេញលេញដើម្បីអះអាងនូវអធិបតេយ្យភាពរបស់ខ្លួនចំពោះប្រជុំកោះ Hoang Sa និង Truong Sa ដែលស្របតាមច្បាប់អន្ដរជាតិ"។
|
|
អ្នកនាំពាក្យក្រសួងការបរទេសវៀតណាមលោកស្រី Le Thi Thu Hang |
សកម្មភាពដែលបានលើកឡើងខាងលើនៃនាវារបស់ចិនបានរំលោភលើអធិបតេយ្យភាពរបស់វៀតណាមចំពោះប្រជុំកោះ Hoang Sa និងរំលោភច្បាប់អន្តរជាតិ និងរាល់កិច្ចព្រមព្រៀងស្តីពីគោលការណ៍ជាមូលដ្ឋានសម្រាប់ណែនាំដោះស្រាយរាល់បញ្ហាកើតមានឡើងនៅលើសមុទ្ររវាងវៀតណាម និងចិន ដែលគំរាមកំហែងដល់សុវត្ថិភាព និងទ្រព្យសម្បត្តិរបស់អ្នកនេសាទវៀតណាមដែលកំពុងធ្វើប្រតិបត្តិការជាធម្មតានៅក្នុងដែនសមុទ្រនេះ។
វៀតណាមជំទាស់ជាដាច់ខាតចំពោះទង្វើរបស់ភាគីចិនដែលបានរៀបរាប់ខាងលើ ដោយទាមទារឱ្យចិនមានវិធានការចាត់ការយ៉ាងតឹងរឹងចំពោះកម្មាភិបាល និងនាវាចិនដែលបានរំលោភបំពានច្បាប់ និងសងសំណងឲ្យបានសមហេតុសមផលចំពោះអ្នកនេសាទវៀតណាម និងមានរបៀបអប់រំកម្មាភិបាលចិនមិនឲ្យមានឧប្បត្តិហេតុដូចនេះកើតមានឡើងជាបន្តទៀតឡើយ។
អ្នកនាំពាក្យរបស់ក្រសួងការបរទេសវៀតណាមលោកស្រី Le Thi Thu Hang បានឱ្យដឹងថា នៅថ្ងៃទី១៩ ខែមិថុនា ឆ្នាំ២០១៩ អ្នកតំណាងក្រសួងការបរទេសវៀតណាមបានមានទំនាក់ទំនងជាមួយតំណាងនៃស្ថានទូតចិននៅទីក្រុងហាណូយដើម្បីជំទាស់នឹងទង្វើខាងលើរបស់ភាគីចិន ដោយស្នើឱ្យភាគីចិន ធ្វើការពិនិត្យឡើងវិញ និងមានវិធានការសងសំណង សមហេតុសមផលដល់អ្នកនេសាទវៀតណាម។
* ឆ្លើយសំណួរពីអ្នកយកព័ត៌មានអំពីប្រតិកម្មរបស់វៀតណាមចំពោះឧប្បត្តិហេតុនាវាចិនបានបុកលិចទូកនាសាទហ្វ៊ីលីពីន អ្នកនាំពាក្យក្រសួងការបរទេសវៀតណាម លោកស្រី Le Thi Thu Hang និយាយថា៖ “នាវាទាំងអស់ដោយមានរួមទាំងនាវានេសាទ នៅពេលដែលធ្វើសកម្មភាពនៅលើសមុទ្រត្រូវតែមានភារកិច្ចអនុវត្តនូវគ្រប់បទបញ្ញត្តិ និងច្បាប់អន្តរជាតិ ជាពិសេសគឺអនុសញ្ញានៃអង្គការសហប្រជាជាតិស្តីពីច្បាប់សមុទ្រឆ្នាំ១៩៨២ (UNCLOS) និងគំនិតផ្តួចផ្តើមរបស់អង្គការនាវាចរណ៍អន្តរជាតិ (IMO)។ អាស្រ័យហេតុនោះ នាវានេសាទទាំងអស់ត្រូវតែមានភារកិច្ចជួយដល់អ្នកនេសាទរងគ្រោះនៅលើសមុទ្រ។
បកប្រែដោយ Minh Trung