កម្មវិធី "ឆ្នាំមិត្តភាពវៀតណាម-រុស្ស៊ី" ត្រូវបានបើកជាផ្លូវការ
កប.អនឡាញ - ក្នុងក្របខ័ណ្ឌនៃដំណើរទស្សនកិច្ចផ្លូវការនៅសហព័ន្ធរុស្ស៊ី នាយប់ថ្ងៃទី២២ ឧសភា តាមម៉ោងក្នុងតំបន់លោកនាយករដ្ឋមន្រ្តីវៀតណាម Nguyen Xuan Phuc និងលោកនាយករដ្ឋមន្រ្តីរុស្ស៊ី Dmitry A. Medvedev បានអញ្ជើញចូលរួមពិធីបើក “ឆ្នាំវៀតណាមនៅរុស្ស៊ី និងឆ្នាំរុស្ស៊ីនៅវៀតណាម” ដែលរៀបចំឡើងនៅសាលប្រគំតន្ត្រី Zaryadye នៅរដ្ឋធានីម៉ូស្គូ។
មានប្រសាសន៍ក្នុងពិធីបើក លោក Nguyen Xuan Phuc បានចាត់ទុកថា ក្នុងឱកាសរំលឹកខួបលើកទី៧០ នៃទិវាបង្កើតទំនាក់ទំនងការទូតវៀតណាម-រុស្ស៊ី ប្រទេសទាំងពីរបានរៀបចំ “ឆ្នាំវៀតណាមនៅរុស្ស៊ី និងឆ្នាំរុស្ស៊ីនៅវៀតណាម” ក្នុងបំណងពង្រីកថែមទៀតនូវទំនាក់ទំនងមិត្តភាពជាប្រពៃណីល្អប្រសើរ និងកិច្ចសហប្រតិបត្តិការលើគ្រប់ជ្រុងជ្រោយរវាងប្រទេសទាំងពីរ។ នេះគឺជាព្រឹត្តិការណ៍ដ៏សំខាន់ក្នុងប្រវត្តិសាស្រ្តនៃទំនាក់ទំនងវៀតណាម-រុស្ស៊ីដោយមានសកម្មភាពជាច្រើននៅប្រទេសទាំងពីរ។
|
|
លោក Nguyen Xuan Phuc និងលោក Dmitry A. Medvedev អញ្ជើញចូលរួមពិធីបើក “ឆ្នាំវៀតណាមនៅរុស្ស៊ី និងឆ្នាំរុស្ស៊ីនៅវៀតណាម” (រូបថត៖ vnanet.vn) |
លោក Dmitry A. Medvedev បានចាត់ទុកថា ព្រឹត្តិការណ៍នេះបានបញ្ជាក់លើការប្ដេជ្ញាចិត្តរបស់ភាគីទាំងពីរក្នុងការពង្រឹង និងពង្រីកទំនាក់ទំនងកិច្ចសហប្រតិបត្តិការលើច្រើនវិស័យរុស្ស៊ី-វៀតណាម។ លោកបញ្ជាក់ថា ប្រទេសរុស្ស៊ីអបអរសាទរចំពោះជោគជ័យរបស់វៀតណាមក្នុងបុព្វហេតុអភិវឌ្ឍសេដ្ឋកិច្ច សង្គម និងពង្រឹងនិងពង្រីកកិត្យានុភាពនៃប្រទេសជាតិក្នុងតំបន់និងលើឆាកអន្តរជាតិ។
បន្ទាប់ពីសុន្ទរកថារបស់ថ្នាក់ដឹកនាំទាំងពីររូប ភ្ញៀវអញ្ជើញប្រមាណ ៧០០ នាក់បានវាយតំលៃខ្ពស់ចំពោះទស្សនីយភាពសិល្បៈដោយមានឈ្មោះ “មាតុភូមិរបស់ខ្ញុំ-វៀតណាម” ដែលសំដែងដោយក្រុមសិល្បករជាតិវៀតណាម៕
បកប្រែដោយ Huyen Trang