ជ័យជំនះដោយឆន្ទៈដែលចង់បានឯករាជ្យ ខ្លួនទីពឹងខ្លួន និងស្មារតីសាមគ្គីភាពអន្តរជាតិដ៏បរិសុទ្ធ
អត្ថបទទី២៖ អនុវត្តសិទ្ធិការពារខ្លួនស្របច្បាប់
កប.អនឡាញ - បន្ទាប់ពីជ័យជម្នះឆ្នាំ១៩៧៥ ប្រជាជនវៀតណាមមានបំណងចង់រួមរស់ក្នុងសុខសន្តិភាព ដើម្បីស្ដារ និងអភិវឌ្ឍន៍ប្រទេសជាតិឡើងវិញ។ វៀតណាមបានអនុវត្តគោលការណ៍បន្ថយកងទ័ពប្រចាំ រួមទាំងយោធភូមិភាគនានានៅភាគខាងត្បូង ដើម្បីផ្តោតទៅលើការផ្សៈផ្សារបួសស្នាមដែលបង្ករឡើងដោយសង្រ្គាម ស្ដារ កសាងប្រទេសជាតិឡើងវិញ។
ប្រឈមមុខនឹងការរំលោភបំពានលើតំបន់ព្រំដែនភាគនិរតីវៀតណាមរបស់កងទ័ព ប៉ុល ពត បក្ស និងរដ្ឋវៀតណាមមានបំណងថា វៀតណាម និងកម្ពុជានឹងចុះហត្ថលេខាលើសន្ធិសញ្ញាស្ដីពីព្រំដែនរវាងប្រទេសទាំងពីរ ក្នុងស្មារតីគោរពឯករាជ្យ អធិបតេយ្យភាព បូរណភាពទឹកដីគ្នាទៅវញទៅមក បន្តអភិវឌ្ឍចំណងសាមគ្គីភាព មិត្តភាពរវាងប្រជាជន នៃប្រទេសទាំងពីរ។ ហើយវៀតណាមបានអនុវត្តយ៉ាងត្រឹមត្រូវនូវកិច្ចព្រមព្រៀងដែលចុះហត្ថលេខានៅជំនួបសំណេះសំណាលរវាងតំណាងវៀតណាម និងកម្ពុជា នៅទីក្រុងភ្នំពេញ នាខែមេសា ឆ្នាំ១៩៧៦។
ដោយព្យាយាមអនុវត្តគោលការណ៍កសាងខ្សែព្រំដែនប្រកបដោយសន្តិភាព និងមិត្តភាពជាមួយកម្ពុជា គណៈកម្មាធិការបក្សយោធាមជ្ឈិមរបស់វៀតណាមបានបញ្ជាឲ្យយោធភូមិភាគ និងខេត្តជាប់ព្រំដែនជាមួយកម្ពុជា ពង្រឹងទំនាក់ទំនងសាមគ្គីភាពជាមួយប្រជាជនកម្ពុជា។ ក្នុងមហាសន្និបាតតំណាងទូទាំងប្រទេសលើកទី៤ របស់បក្ស នាខែធ្នូ ឆ្នាំ១៩៧៦ បក្ស និងរដ្ឋវៀតណាមនៅតែបន្តបញ្ជាក់ពីគោលជំហររបស់ខ្លួនគឺ៖ “ខិតខំអស់ពីកម្លាំងកាយចិត្តដើម្បីការពារ និងអភិវឌ្ឍទំនាក់ទំនងពិសេសរវាងប្រជាជនវៀតណាមជាមួយប្រជាជនឡាវ និងកម្ពុជា ពង្រឹងចំណងយុទ្ធសាមគ្គីភាព ទំនុកទុកចិត្ត កិច្ចសហប្រតិបត្តិការដ៏យូរអង្វែង និងជួយគ្នាទៅវិញទៅមកលើគ្រប់វិស័យរវាងវៀតណាម ជាមួយកម្ពុជា និងឡាវ តាមគោលការណ៍សមភាព គោរពឯករាជ្យ អធិបតេយ្យភាព និងបូរណភាពដែនដីរបស់គ្នា គោរពផលប្រយោជន៍របស់គ្នា។
|
|
កម្លាំងកាំភ្លើងធំវៀតណាមការពារព្រំដែនភាគនិរតីវៀតណាម នាខែកញ្ញា ឆ្នាំ១៩៧៧ (រូបថត៖ vnanet.vn) |
ទោះបីជា វៀតណាមមានការខិតខំប្រឹងប្រែងក្នុងដំណើតការទូតហើយក៏ដោយ ក៏ប៉ុន្តែ ប៉ុល ពត នៅតែបន្តការឃោសនា ដោយសំដៅបំភ្លៃប្រវត្តិសាស្រ្ត បង្កជម្លោះ និងទន្រ្ទានចូលកាន់កាប់ព្រំដែនភាគនិរតីវៀតណាម។ ពួកគេបានវាយបំផ្លាញភូមិដ្ឋាន សម្លាប់មនុស្សយ៉ាងឃោរឃៅ ទាំងមនុស្សចាស់ ទាំងស្រ្តី និងកុមារវៀតណាម។
ដោយឆ្លើយតបតាមការអំពាវនាវជាបន្ទាន់របស់រណសិរ្សសាមគ្គីសង្រ្គោះជាតិកម្ពុជា និងប្រជាជនកម្ពុជា ព្រមទាំងអនុវត្តសិទ្ធិការពារខ្លួនស្របច្បាប់ ការពារអធិបតេយ្យភាព និងបូរណភាពទឹកដី ការពារអាយុជីវិត និងទ្រព្យសម្បត្តិរបស់ប្រជាជន កងទ័ពស្ម័គ្រចិត្តវៀតណាម រួមជាមួយកងកម្លាំងប្រដាប់អាវុធ និងប្រជាជនកម្ពុជាបានវាយផ្ដួលរំលំរបបប្រល័យពូជសាសន៍។
ចាប់ផ្ដើមនៃសង្រ្គាម ពួក ប៉ុល ពត បានធ្វើការវាយសម្រុកជាបន្តបន្ទាប់ដោយមានទ្រង់ទ្រាយធំចំនួន៣ទៅលើតំបន់មួយចំនួនរបស់វៀតណាម។ នាថ្ងៃ៣០ ខែមេសា ឆ្នាំ១៩៧៧ ពួកគេបានធ្វើការវាយសំរុកលើឃុំចំនួន១៤ ក្នុងចំណោមឃុំចំនួន ១៦ ឃុំដែលជាប់ព្រំដែននៃខេត្ត An Giang ដែលវាយបំផ្លាញភូមិដ្ឋាន សាលារៀន មូលដ្ឋានផលិតកម្មជាច្រើនរបស់វៀតណាម។ ក្នុងរយៈពេលប្រមាណ ២០ ថ្ងៃ មនុស្សចំនួន ២២២ នាក់ត្រូវសម្លាប់ និង ៦១៤ នាក់ទៀតរងរបួស ផ្ទះសម្បែង និងទ្រព្យសម្បត្តិជាច្រើនរបស់ប្រជាជនត្រូវវាយបំផ្លាញ។ ប្រឈមមុខនឹងការលុកលុយឈ្លានពានរបស់ពួក ប៉ុល ពត កម្លាំងការពារព្រំដែន និងសេនាជន រួមទាំងកងឈ្លបនៅឃុំ Vinh Xuong ឃុំ Vinh Gia ឃុំ Nhan Hung បានក្រោកឈរឡើងប្រយុទ្ធប្រឆាំងនឹងរាល់សកម្មភាពឈ្លានពានរបស់សត្រូវ។ កងទ័ពវៀតណាមបានកៀងគរកងវរៈសេនាធំមួយ នៃកងពលធំលេខ៣៣០ កងវរៈសេនាធំនាវាមួយ និងកងវរៈសេនាតូចពីរនៃខេត្ត An Giang ដើម្បីវាយបក ដោយកំទេចខ្មាំងចំនួន ៣០០ នាក់ និងបងឲ្យកងទ័ព ប៉ុល ពត ដកថយទៅប្រទេសកម្ពុជាវិញ។ នាថ្ងៃទី២៣ ខែឧសភា ឆ្នាំ១៩៧៧ គណៈកម្មាធិការបក្សយោធាមជ្ឈិមរបស់វៀតណាមបានបញ្ជាឲ្យកងកម្លាំងប្រដាប់អាវុធនៅភាគខាងត្បូង៖ “ប្តេជ្ញាការពារអធិបតេយ្យភាពដែនដីរបស់ខ្លួន ព្រមទាំងគោរពអធិបតេយ្យភាពដែនដីរបស់កម្ពុជា។ បន្តឃោសនានិងចលនាប្រជាជនកម្ពុជា និងឆ្លៀតយកការគាំទ្រពីសាធារណមតិ កសាងព្រំដែនជាមួយកម្ពុជាប្រកដោយស្ថិរភាព វាយកម្ទេចរាល់ឧបាយកលដែលចង់បំបែកបំបាក់ទំនាក់ទំនងរវាងប្រទេសទាំងបីនៅឧបទ្វីបឥណ្ឌូចិន”។
អនុវត្តតាមសារាចររបស់គណៈកម្មាធិការបក្សយោធាមជ្ឈិមរបស់វៀតណាម អង្គភាពនានានៃយោធភូមិភាគទី៥ យោធភូមិភាគទី៧ យោធភូមិភាគទី៩ យោធភូមិភាគទី៣ និងយោធភូមិភាគទី៤ បានរៀបចំកងកម្លាំង និងមធ្យោបាយ កសាងផែនការ និងត្រៀមខ្លួនជាស្រេចសម្រាប់ការប្រយុទ្ធ។ អង្គភាពពាក់ព័ន្ធមួយចំនួនទៀតក៏ត្រៀមខ្លួនជាស្រេចសម្រាប់វាយខ្មាំងនៅគ្រប់ទិសទីដែរ ។
|
|
កងទ័ពស្ម័គ្រចិត្តវៀតណាមទទួលបានជ័យជម្នះជាបន្តបន្ទាប់នៅកម្ពុជា (រូបថត៖ vnanet.vn) |
ពីថ្ងៃទី២៥ ខែកញ្ញា ឆ្នាំ១៩៧៧ កងទ័ព ប៉ុល ពត បានប្រមូលកងពលធំចំនួន៩ រួមជាមួយកម្លាំងមូលដ្ឋាន ធ្វើការវាយសំរុកដោយទ្រង់ទ្រាយធំទី២ទៅលើ ខេត្ត An Giang ខេត្ត Kien Giang ខេត្ត Long An ខេត្ត Dong Thap និងឆ្ពោះទៅខេត្ត Tay Ninh ដោយបង្កឧក្រិដ្ឋកម្មជាច្រើនចំពោះប្រជាជនវៀតណាម។ ជាពិសេស នៅឃុំចំនួន៣ នៃស្រុក Tan Bien ស្រុក Ben Cau ខេត្ត Tay Ninh ពួក ប៉ុល ពត បានសំលាប់មនុស្សជាងមួយពាន់នាក់។
ប្រឈមមុខនឹងស្ថានភាពថ្មីនៃសង្រ្គាម អគ្គសេនាធិការដ្ឋានវៀតណាមបានសម្រេចចិត្តចាត់បញ្ជូនផ្នែកមួយនៃកងកម្លាំងទ័ពស្រួចចំណុះក្រសួងការពារប្រទេសវៀតណាម ទៅវាយបកទៅនឹងការវាយសម្រុករបស់កងទ័ព ប៉ុល ពត នៅតំបន់ជាច្រើននៅតាមព្រំដែន ដណ្ដើមយកឡើងវិញនូវតំបន់ដែលត្រូវកងទ័ព ប៉ុល ពត កាន់កាប់។
នាថ្ងៃទី១៥ ខែវិច្ឆិកា ឆ្នាំ១៩៧៧ កងទ័ព ប៉ុល ពត បានធ្វើការវាយសំរុកថ្មីក្នុងបំណងទន្រ្ទានកាន់កាប់ទីរួមខេត្ត Tay Ninh។ ដោយហេតុនោះ ពីថ្ងៃទី៥ ខែធ្នូ ឆ្នាំ១៩៧៧ ដល់ថ្ងៃទី៥ ខែមករា ឆ្នាំ១៩៧៨ អង្គទ័ពលេខ៤ អង្គទ័ពលេខ៣ យោធភូមិភាគទី៧ យោធភូមិភាគទី៩ បានប្រមូលកងពលធំចំនួន៨ សម្រាប់វាយបកខ្មាំងនៅតាមផ្លូវលេខ៧ លេខ១ និងលេខ២ ដែលបោសសំអាតកងទ័ព ប៉ុល ពត និងវាយកំទេចកងពលធំ ប៉ុល ពត ចំនួន៥ ហើយធ្វើឲ្យផែនការកាន់កាប់ទីរួមខេត្ត Tay Ninh របស់ ប៉ុល ពត ត្រូវបរាជ័យ។
នាថ្ងៃទី៣១ ខែធ្នូ ឆ្នាំ១៩៧៧ កងទ័ព ប៉ុល ពត បានចេញសេចក្តីប្រកាសដោយមូលបង្កាច់កងទ័ពវៀតណាមថា “វៀតណាមឈ្លានពានកម្ពុជា” ។ នៅថ្ងៃដដែល រដ្ឋាភិបាលវៀតណាមបានចេញសេចក្តីថ្លែងការណ៍ស្ដីពីបញ្ហាព្រំដែនវៀតណាម-កម្ពុជា ដែលថ្លែងច្បាស់ថា គោលជំហរ និងគោលការណ៍របស់វៀតណាមគឺ៖ ប្ដេជ្ញាការពារឯករាជ្យ អធិបតេយ្យភាព និងបូរណភាពទឹកដីរបស់ខ្លួន គោរពឯករាជ្យ អធិបតេយ្យភាព និងបូរណភាពទឹកដីរបស់កម្ពុជា ធ្វើអស់ពីកម្លាំងកាយចិត្តដើម្បីការពារចំណងយុទ្ធសាមគ្គីភាព និងមិត្តភាពវៀតណាម-កម្ពុជា វែកញែកឧបាយកល និងឧក្រិដ្ឋកម្មរបស់ពួក ប៉ុល ពត ចំពោះប្រជាជនវៀតណាមនៅខេត្តតាមព្រំដែននិរតីវៀតណាម។
ក្នុងស្មារតីស្ថាបនា និងយុត្តិធម៌ បក្សនិងរដ្ឋវៀតណាមមានបំណងដោះស្រាយបញ្ហាព្រំដែនរវាងប្រទេសទាំងពីរវៀតណាម និងកម្ពុជា តាមរយៈកិច្ចពិភាក្សាសន្តិភាព គោរពគ្នាទៅវិញទៅមក ដែលទទួលបានការគាំទ្រពីសាធារណមតិពិភពលោក។ ប៉ុន្តែការខិតខំប្រឹងប្រែងរបស់រដ្ឋាភិបាលវៀតណាមសំដៅបង្កើតតំបន់គ្មានកងទ័ពតាមខ្សែព្រំដែនត្រូវបាន ប៉ុល ពត បដិសេធដែលពួកគេបន្តបំផុសសង្គ្រាមឈ្លានពានព្រំដែនភាគនិរតីវៀតណាម៕
បកប្រែដោយ Thuy Anh