ការប្រកួតកីឡាអាស៊ីលើកទី១៨ (ASIAD 18)
ថាមពលអាស៊ី និងអត្តសញ្ញាណឥណ្ឌូនេស៊ី
កប.អនឡាញ - ការប្រកួតកីឡាអាស៊ីលើកទី១៨ (ASIAD 18) ត្រូវបានបើកជាផ្លូវការនៅថ្ងៃទី១៨ ខែសីហា នៅឯពហុកីឡដ្ឋាន Bung Karno ដ៏ល្បីឈ្មោះនៃប្រទេសឥណ្ឌូនេស៊ីដែលមានចំណុះជិត៨ម៉ឺនកៅអី។
ប្រសិនបើការប្រកួតកីឡាអាស៊ី Jakarta នៅឆ្នាំ១៩៦២ ត្រូវបានធ្វើឡើងជាលើកដំបូងនៅប្រទេសឥណ្ឌូនេស៊ី ដែលគ្រានោះប្រទេសនេះត្រូវខិតខំប្រឹងប្រែង និងឆ្លងកាត់ការលំបាក់ជាច្រើនដើម្បីរៀបចំឲ្យបានព្រឹត្តិការណ៍នោះ ក៏ប៉ុន្តែនៅ ASIAD Jakarta-Palembang ឆ្នាំ២០១៨ នេះ ឥណ្ឌូនេស៊ីបានបង្ហាញខ្លួនជាប្រទេសមួយដែលមានការអភិវឌ្ឍដ៏អស្ចារ្យលើគ្រប់វិស័យ។
ការដែលគណៈរៀបចំបានបង្កើតភ្នំសិប្បនិម្មិតមួយដែលមានទម្ងន់ ៦០០តោន ប្រវែង១៣៥ម៉ែត្រ និងកម្ពស់២៦ម៉ែត្រ នៅពហុកីឡាដ្ឋាន Bung Karno ក្នុងពិធីបើកការប្រកួតកីឡាអាស៊ីលើកទី១៨នេះ បានបង្ហាញថាប្រទេស ឥណ្ឌូនេស៊ី បានត្រៀមរៀបចំសម្រាប់ការប្រកួតកីឡាអាស៊ីលើកនេះពិតជាហ្មត់ចត់មែនទែន។ ភ្នំសិប្បនិម្មិតនេះគឺជាសមិទ្ធិផលរបស់កម្មករចំនួន ៣៥០ នាក់ ដែលបានខិតខំធ្វើការក្នុងរយៈពេល៣ខែ ហើយនិងប្រើប្រាស់ដើមឈើ ផ្កាចំនួន ១២,៧៧៥ ដើម និងទឹក ១៤០,០០០ លីត្រដើម្បីធ្វើជាទឹកជ្រោះមួយនៅលើកំពូលភ្នំ។ រូបភាពនៃភ្នំដើមឈើ ទឹកជ្រោះនេះ គឺជានិមិ្មត្តរូបរបស់ប្រទេសឥណ្ឌូនេស៊ី ដែលពោរពេញទៅដោយសោភណ្ឌភាពនៃធម្មជាតិ និងភាពសម្បូរបែបនៃវប្បធម៌។
|
|
ការបាញ់កាំជ្រួចនៅពហុកីឡដ្ឋាន Bung Karno (រូបថត៖twitter.com/Opening Ceremony Asian Games 2018) |
Asian Games មួយដ៏ទំនើប និងរួសរាយរាក់ទាក់នៅប្រទេសឥណ្ឌូនេស៊ីបានបង្ហាញដល់សហគមន៍អាស៊ីតាមរយៈប្រព័ន្ធផ្លូវរថភ្លើងលើស្ពានអាកាស ភូមិអត្តពលកម្មដែលទើបនឹងសាងសង់ និងក្រុមអ្នកស្ម័គ្រចិត្តយ៉ាងច្រើនកុះករ។ ដើម្បីសម្រេចបានសមិទ្ធិផលទាំងនេះ ប្រទេសឥណ្ឌូណេស៊ីប្រហែលបានចំណាយថវិកាជាង២ពាន់លានដុល្លារ ដើម្បីរៀបចំព្រឹត្តិការណ៍កីឡាមួយដែលគេរំពឹងថានឹងក្លាយជា«ព្រឹត្តិការណ៍ដ៏អស្ចារ្យបំផុតនៅក្នុងប្រវត្តិសាស្ត្រនៃការប្រកួតកីឡានៅលើពិភពលោក» ពីមុនរហូតមកដល់ពេលនេះ៕
បកប្រែដោយ Thanh Cong