សោភណភាពដូចដើមនៃកោះទាំង ៤,០០០ នៅតាមទន្លេមេគង្គ
កប.អនឡាញ - មានចម្ងាយពីរដ្ឋធានី វៀង ច័ន្ទ ៩០០ គ.ម, Pakse នៃខេត្ត Champasak ជិត ១៨០ គ.ម និងជាប់ព្រំដែននឹងខេត្ត ស្ទឹង ត្រែង នៃព្រះរាជាណាចក្រកម្ពុជា រមណីយដ្ឋាន Siphandone (ភាសាឡាវមានន័យថា កោះទាំង ៤,០០០) កំពុងក្លាយទៅជា “ឋានសួគ៌” សម្រាប់ការលំហែកាយ ការលេងកំសាន្ត នៅប្រទេសឡាវដែលល្បីឈ្មោះនឹងរហស្សនាមថា ប្រទេសសម្បូរទៅដោយដំរីរាប់លានក្បាល។
ការដែលជាប្រទេសគ្មានសមុទ្រដូចឡាវទេ ប៉ុន្តែមានកោះរហូតដល់ ៤,០០០ ដោយស្ថិតនៅតំបន់ឆ្ងាយដាច់ស្រយាលនោះ បានទាក់ទាញចំណាប់អារម្មណ៍ភ្ញៀវទេសចរជាច្រើនយ៉ាងកុះករមកលេងកំសាន្ត និងស្វែងយល់នៅទីនេះ។
តំបន់ប្រជុំកោះជារមណីយដ្ឋានទេសចរណ៍ដ៏ល្បីនេះ ត្រូវបានកកើតឡើងដោយធម្មជាតិ ដោយសារតែទន្លេមេគង្គនោះត្រូវបិទបាំងដោយល្បាក់ទឹកយក្ស២ ដែលមានបណ្តោយរាប់សិបគីឡូម៉ែត្រគឺ Phapheng និង Somphamit បានបង្កើតឡើងតំបន់លិចទឹកមួយដ៏ធំល្វឹងល្វើយដ៏ស្រស់ស្អាតដោយមានទាំងកោះធំ តូចរាប់ពាន់ផង។ នៅទីនេះក៏មានជ្រោយដីខ្សាច់រាប់រយសែនស្អាត ដែលតិចឃើញ តិចបាត់ក្នុងចរន្តទឹកនៃទន្លេមេគង្គ។ ដោយសាររមណីយដ្ឋាននេះស្ថិតក្នុងតំបន់ឆ្ងាយដាច់ស្រយាល ហេតុដូច្នេះផ្លូវគមនាគមន៍សម្រាប់ធ្វើដំណើរនៅជួបការលំបាក នាំមកឲ្យតំបន់នេះនៅរក្សបានភាពបុរាណដ៏ទាក់ទាញអារម្មណ៍ ហើយបានក្លាយទៅជាគោលដៅមួយក្នុងចំណោមរមណីយដ្ឋានដែលមិនអាចរំលងបានក្នុងដំណើរដើរលេងកំសាន្តនៅប្រទេសសម្បូរទៅដោយដំរីរាប់ពាន់ក្បាលសម្រាប់ភ្ញៀវទេសចរដែលមានចំណូលចិត្តចង់ស្វែងយល់ពីធម្មជាតិផងដែរ។
ទោះបីមានកោះរហូតដល់ ៤,០០០ ក្តី ក៏ប៉ុន្តែមកទល់បច្ចុប្បន្ននេះមានត្រឹមតែកោះបីគឺ៖ Don Khong, Don Khon និង Don Det ដែលមានគ្រប់លក្ខណៈសម្បត្តិដើម្បីភ្ញៀវអាចស្នាក់នៅបាន។ ភ្ញៀវទេសចរដែលមកលេងកំសាន្តនៅទីនេះស្ទើរតែទាំងអស់មានចំណាប់អារម្មណ៍ថា Siphandone ជារមណីយដ្ឋានស្អាតបំផុត ប្រជាជននៅទីនេះរាក់ទាក់រួសរាយណាស់។ មកទីនេះភ្ញៀវទេសចរអាច ចូលក្នុងសកម្មភាពលេងកំសាន្តជាច្រើនដូចជា ជិះទូក ស្វែងយល់ ជួលពោងដើម្បីបណ្តែតតាមទន្លេមេគង្គ ហើយពិសេសបរិយាកាសដ៏ស្ងប់ស្ងាត់នៅទីនេះសមនឹងជាកន្លែងសម្រាប់ភ្ញៀវអាចលំហែកាយយ៉ាងស្រួល។ ចំពោះភ្ញៀវដែលចូលចិត្តស្វែងយល់ ពួកគេអាចជួលម៉ូតូ កង់ ហើយជិះចូលបណ្តាភូមិ និងទស្សនាល្បាក់ទឹក Somphamit ដ៏មហិមា មកទស្សនាក្បាលម៉ាស៊ីនភ្លើង ស្ពានកំពង់ផែដែលពីមុនពួកអាណានិគមនិយមបារាំងបានប្រើប្រាស់ដើម្បីដឹកជញ្ជូនទំនិញឆ្លងកាត់ល្បាក់ Khon Phapheng នេះ (ដោយសារតែល្បាក់ទឹកនេះធំសម្បើមណាស់ កប៉ាលដឹកទំនិញឆ្លងមិនរួចឡើយ)។
ទន្ទឹមនឹងនោះ សកម្មភាពមួយដែលភ្ញៀវមិនអាចរំលងបានគ្រាមកកាន់ Siphandone នោះគឺទៅទស្សនាសត្វផ្សោតទឹកសាប Irrawaddy។ ប៉ុន្តែមិនមែនពេលណាក៏ជួបសំណាងបានឃើញផ្សោតនោះទេដោយសារផ្សោតនេះស្ថិតក្នុងបញ្ជីសៀវភៅក្រហមដែលរងគ្រោះផុតពូជ។ ដោយមានកោះ ៤,០០០ និងល្បាក់ទឹក២ដ៏មហិមា ពោលគឺធំបំផុតនៅអាស៊ីអាគ្នេយ៍នោះបានគួបផ្សំនឹងការដែរប្រជាជននៅទីនេះរួសរាយរាក់ទាក់ ហេតុដូច្នេះក្នុងប៉ុន្មានឆ្នាំចុងក្រោយនេះ Siphandone បានក្លាយទៅជាគោលដៅមកដល់គួរឲ្យទាក់ទាញអារម្មណ៍របស់ភ្ញៀវ ទេសចរលោកខាងលិចហើយជាពិសេសសម្រាប់អ្នកមានចំណូលចិត្តស្វែងយល់ពីវប្បធម៌នៅតំបន់នេះ៕
បកប្រែដោយ Minh Trung